Rom 12
12
Lhan'okhayaj tä matche tä is chik y'awoyeje Dios
1Tä mälhyejtso, ipuhfwas, tä Dios iti n'amejen lep'altsenyaj, olhaip'altsen amehen tä oyok, a'achajaye lham. A'enay häpeya Dios t'awayhat tä iläy tä lham t'amajchetes wet äp akäjejlhi. Häp täjtso han'okhayaj tä matche tä is chik lewoyeje häp Dios. 2Yej lekänaye m'ayhay tä iche fwalas tä y'ehina, tej che õyok, “Häp tä is alhoho.” Mat nech'aynhiche atichunhayajay, häpkhilek nech'e w'enha lhamej m'ak tä lewoye wet letäfwenhiyeja Dios lenech'ethayaj, wok oyok, letäfwenhiyeja m'ak tä is tä Dios akäjejlhi, lhäy'e tä is alhoho.
3Dios iti n'oyej lep'altsenyaj wet yen n'oye laka apóstol. Wet häp tä ofwel amhohen nilhokej amel: Isit'ak elhpej letichunhayaj fwetaj lham lhäy'e lhip tä le'isyaj ihi wet nech'e lhaichäjlhi. Mat is che elhpej lhaitetshan, wet ämay ische alhoho atichunhayajay, w'awlhatej achayaj tä wuj wok niwuja tä Dios iti amejen elhpej.
4Tsi lhek yahinya lhat'isan, wujpe lhipey, wet elhpej lhip w'enha lhamej lechumet tä iwoye. 5Wet n'amel tä n'ahäpehen Dios leles n'amälhyej'attso. Tej tä n'awujpe, mat y'alhaip'ajtitejwek Cristo wet n'aweihalhahchä.#1~Cor 12.12 6Wet w'enhache lhamej n'otw'ayhtes tä häpe lhakhajyhayajay tä Dios hiw'en n'amhomche, häp tä isej lep'altsenyaj tä itiyej elhpej. Tä mälhyejtso, chik ahäpe elh tä Dios laka profeta, enlhi t'at profeta lechumet, en asilätyajayej wichi m'ak tä Dios laka Espíritu ifwel amho, w'awulhej achayaj tä iti amej. 7Chik ahäpe iyhäj lech'otfwa, ch'otehen t'at. Chik ahäpe elh tä ichufwenhen lepuhfwas, chufwenhen t'at. 8Chik lekhajyenhen apuhfwas, khajyenhen t'at. Chik lew'enho apuhfwas m'ak tä i'amej, is chik tälho t'at ahusek. Chik õne'tek let'uye achumet tä häpe Dios leles, is chik lhäy'e lhip tä let'uye. Chik ahäpe elh tä hip'altsen iyhäj, en akäjyaja tä lewoye.#1~Cor 12.4-11
Häp lhakeyes tä isen
9Is chik ahumnhayaj häpe m'ak tä matche. N'äyiho m'ak tä ni'isa, mat ap'ajtayej m'ak tä is. 10Humnhen aiyhäj tä alepuhfwaswekej Cristo.#Juan 13.34 Yej lhenay w'et m'ayeka apuhfwas, mat len'ohyaj tä letiyej elhpej nuhatpe han'ohyaj tä lhamel iti amej.#Fil 2.3
11Akhajyenhen, yej n'etäjwethä, mat mälhtejwek ahusey tä lech'otyeneje Lhawuk lechumet.
12Is chik a'akäsejwethä aniwhayaj tä i'amejen. Ämay letumlä ateläythayajay tä nichät amehen, wet yej leyej tä lewopej alhyaja.
13Ch'otayeje aiyhäj tä Dios leles häp m'ak tä iwatlä, wet uyehen lhamel tä t'isiyakay amehen.#Heb 13.2; 1~Ped 4.9
14Käpfwayeje m'ak tä is häp lhamel tä t'uhläk awit'äyhyaj ihi.#Luc 6.27-28; 1~Cor 4.12-13; 1~Tes 5.15; 1~Ped 2.22-23; 3.9 Yej takäpfwayeje lewit'äyhyaj lhamel.
15Chik elh chik häpe lakäjyaj ihi, häte is chik amel a'akäswethä. Chik elh chik häpe lhafwyhayaj ihi, häte is chik amel letafwchehchä.
16Aw'awlhatayejchä achowhal. Yej alechäjwethä, mat en akalay'isa iyhäj tä w'et m'ayhayhas t'at. Wet yej fwetajay wuj tä lehanche m'akejen.#Prov 3.7
17Yej wo hayahlä m'ak tä ni'isa elh chik häpe, mat akhajyenhen tä lewoyepej m'ak tä is tä lhewej wichi. 18Wet chik lehanayej lewoyneje yämthilek atamsekis iyeji nilhokej wichi, woyaye t'at. 19Ipuhfwas tä oalehumnhay, oyachajo tä oyok: Isit'a chik amel lewo hayahlä m'ak tä ni'isa elh chik häpe, mat ch'anlhayaye chik lham Dios iwo haya. Tsi Dios lhämet tä ihi Lehi yok, “Olham t'at tä owohla lahaya, yokwe Lhawuk.”#Deut 32.35 20Wet lhip elh yok, “Chik atayhfwa nichuyu, w'enho lhäk, wok chik ichim, w'enho inät, häpkhilek wuj tä len'äfwlhatej m'ak tä ni'isa tä iwoye.”#Prov 25.21-22 21Yej tach'anlhaye chik ikalh amhi m'ak tä ni'isa, mat is chik am tä lekalheji häp m'ak tä is tä lewoye.
Currently Selected:
Rom 12: WCHB
Highlight
Copy
Compare
Share
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
