Abd 1
1
Letes ihi Edom lheley
1Häp täja Lhawuk Dios lhämet tä ifwenho Abdías tä yäme honhat tä Edom.
Y'aläte Lhawuk silätyaj.
Lhawuk silätyajwo yik tä ihoye
wichi tä i'pe honhat, wet ifwenho tä yok,
“¡Mäh n'ekhen, n'awo lhaka'tshayaja,
n'attayhlä häp Edom!”
Wet Lhawuk Dios ifwenho Edom lheley wet yok:
2-3“M'ak tä alechäjejwethä ikan amejen
tä lhen haw'eta chenhas tä atoschephä lechowej
wet lhoyaykwe, Nehit katsik ikalhla n'amhi.
Mat oayenla häpeya wichi tä lajit lahaya,
atehit'ala iwoye wichi iyhäj tä i'pe honhat,
wet wujlak oay'ayhatchehchä.
4Tej tä aletonitchephä,
atet iwoye afwenche iyhäjkottaj
wet tet iwoyek lhen haw'eta katetsel,
mat oaithatla honhate.”
Wet Lhawuk yok:
5-6“Edom lheley, amel tä letälhe ates Esaú,
chik wichi ilanhi akäs lhay,
iche t'at lhachal tä imälhehi tä lhay ihi.
Wet chik nämhen etantses chik honatsi
yämthilek t'etane akäywet tä alewuk,
ichäjlat m'ak tä lhamel iwatlä, tajlhame.
Mat chik näm atayhfwas,
imälhehilawek tä aiwasthiche,
matche tä aisohlawethä.
Lhamel t'etanhiyela nilhok akäywet,
wet niwohit m'akfwaj chik imälhehila amejen.
7Wet wichi tä lefwetaj lhaithatla amejen
ikanlat amejen wet ayokwesila
tä lheyayhi aka honhat.
Tej tä häpehen akalay'is tä let'ekhaye,
mat lhamel tatay at ahilähen
wet iwoyej at amehen lakanyaj.
Lhamel yok, Edom lheley lehanyaj ihihit'a.”
8Wet Lhawuk äp yok:
“Ifwala chik otasnhila Edom,
otäyhthila nilhokej laka hin'ol tä ahantses
wet osohiyeja lehanyaj häp lhamel tä lew'et
honhat tä iche chenhas tä lewuk Esaú.
9Wet Temán kanifwotaj
ichetthiyejchela lenowayhyaj,
lhäy'e wichi tä ihi honhat
tä chenhas tä lewuk Esaú
wohit'ala elh chik imälhehi,
nofwiyeja tä õ'länhen.
M'ak tä tamenej tä Lhawuk itiyej letes Edom lheley
10“Han'äfwlhi ihla amejen,
amel tä letälhe ates Esaú,
wet attäy pajla'tha tiyäj'attsiy,
häp tä lewit'äyen wet lelänhen
apuhfwas tä tälhe letes Jacob.
11Tä sip'äl tä w'enha lhamej tä häpehen letayhfwas
iwasthiche Jerusalén lepe p'otes
wet äp isoyej lakäywet tä ihi,
amel alethatej at kanhi,
tek letach'otaye Jerusalén lheley.
Wet tä lhamel ikoyej suerte
tä t'uhläk kalelhäj elh tä lewuk
m'ak tä isoyej Jerusalén,
amel häte lhen ama.
12Wuj tä ni'isa tä let'ischeyej apuhfwas wit'äyhyaj,
wet isit'a tä a'käjejlhi tä lew'en
Judá lheley letäyhyaj ifwalatso.
Häte isit'a tä leläkwlhi lhamel
häp ifwala tä wuj tä lelhakli ihi,
13wet isit'a tä letiyäjo oka hupuy
häp ifwala tä leteläythayaj ihi oka wichi.
Häte isit'a tä let'ischeyej lhamel
wet letachuma lakäywet
häp ifwala tä lewit'äyhyaj ihi,
14wet isit'a tä leniwhi n'äyhäy tä tajwek
wet lelänhen hin'ol tä ilethanhen.
Häte isit'a tä lhachaje letayhfwas
häp hin'ol tä lhayämthen
häp ifwala tä lelhakli ihi lhamel.
15Wet m'ak tä lewoyeje aiyhäj,
häte amel õ'wohiyeja amehen täjtso,
õ'wohla lahaya amejen.”
Lhawuk itihiyeja lakalelhthayaj häp wichi tä i'pe honhat, wet iwujyenla Israel
Wet Lhawuk yok:
“Tott'a alhoho oka ifwala
häpkhilek otiyej okalelhthayaj
nilhokej wichi tä i'pe honhat.
16Ifwalas tä pajche otiyej owäk oka wichi
tä oi'pe chenaj tä ot'amajchet,
mälhyej chik oyäynej lhamel häp lhät tä tapay.
Mat chik nichäte ifwala tä okalelhthayaj,
wichi tä i'pe honhat lhamenla t'at
chik oyäynhiyeja täjtso,
wet lhamel w'oknhasiyejawethä
yämthilek nilhokej nofwila.
17Mat häp chenaj Sión häpkhila lhip tä ot'amajchet,
wet ihichela iyhäj chik ilethane.
Wet wichi tä tälhe letes Jacob
yachajiholak ikalhi laka honhates.
18Lhamel tä tälhe letes Jacob,
lhäy'e iyhäj tä tälhe letes José,
tehlat iwoye itäj, y'uho t'at,
wet iwunhihola lhamel tä tälhe letes Esaú,
wet nofwila imälhewek lhamel,
wet niwohit elh lhamel chik tafwayhla.
Olham tä Awukn'o olhämet täjtso.
19“Judá lhayis tä tälhe lhip tä tapinhiye,
lhamel yenla laka honhata häp Edom,
wet lhamel tä ihi honhat tä w'awulhchä
tä iwhäye lewomekitaj,
lhamel lhayenla lewuka
häp Filisteo lhayis kahonhat.
Häte yenla laka honhata
häp Efraín kahonhates, lhäy'e Samaria,
wet lhamel tä tälhe letes Benjamín
yenla laka honhata Galaad.
20Häp Israel lhayis tä wuj
yikhilach'oye honhates tä kalew'etesa,
wet yenla laka honhata
häp honhat tä lewuk Canaán lhayis,
pajla'tha nichäte Sarepta
tä ihi lhip tä tafwojhiye.
Wet wichi tä tälhe Jerusalén
tä lhamel ihi honhat tä kalew'eta tä lhey Sefarad,
lhamel lhayenla lewuka häp hupuy
tä ihi Judá lhip tä tapinhiye.
21Wet lhamel ikalhihichela letayhfwas,
wet lhamel ihohla'pe chenaj Sión,
wet itihiyeja letes häp letayhfwas Edom lhayis.
Wet olham tä ohäpe Awuk Dios olhamlak Oniyat.”
Currently Selected:
Abd 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.