Neh 2
2
Rey Artajerjes iwahnej Nehemías tä ihoye Jerusalén
Häp ifwalastso olham ohäpe hin'o tä ihänepej hat'es häp niyat Artajerjes. 1Wet tä ifwala elh, iwel'a tä lhey Nisán, tä nech'e veinte nekchämis tä Artajerjes niyatej Persia, ifwalatso tä õ'häne hat'es häp rey, lham hiw'en tä wuj tä ofwitajayaj in'oyej. 2Wet tay'ätshan n'oye wet yok:
–¿Atsi m'ak tä tamenej tä afwitajayaj ihi? N'äl tä häpkhit'a t'inhayaj chik ailän, mat iche p'iya m'ak tä lhen atichunhayaja.
Tä oläte, wuj tä onoway, 3wet ofwenho tä oyok:
–¡Ika niyat, is chik lajit lepesa tä leläy! ¿Chiwoyek ofwitajayaj newa n'oyej tä wasi hupuy tä ochätilis lep'itseyhay ihi wet õ'wunhomche lepelis?#2~Rey 25.8-10
4Rey tay'ätshan n'oye wet yok:
–¿Wet atsi m'ak tä lewatlä?
Tä mälhyejtso, ot'alhe Dios tä pule Lewuk, 5wet nech'e onchulho rey wet oyok:
–Ika niyat, chik a'akäjlhi n'oyej tä ohäpe okawo, wet häpe m'ak tä lehuminche, chen n'oye honhat tä Judá, häp hupuy tä õtjänhihlä ochätilis lep'itseyhay, wet onech'aynhihila.
6Wet rey tä lech'efwa tatayphäwhäye, nichulh n'oho wet yok:
–¿Chihätefwas ifwalas tä w'awulho chik lhek, wet chihlahätek letapil?
Wet olham okalelhtho lewhäy tä otpinla, wet lham iwoye t'at wet tach'anlha n'oye tä oyik. 7Häte ofwenho rey tä oyok:
–¿Hä is chik lew'en n'oho ämet tä alesaynek wet lechene niyatey tä ihi honhat tä tumej tewokitaj Éufrates lhip elh, häpkhilek lhamel tach'anlha n'oyek onukwe laka honhat yämthilek onchäte Judá? 8Wet elh ämet chik lechene Asaf, häp hin'o tä t'uye tayhi tä alewuk, häpkhilek hiw'en n'oho hal'ä wet oyenejlhi lepe p'otes häp hup tä takhajay tä sip'äl ihi tä t'uye oka Dios Lew'et, häte n'olafwek tä hupuy lep'ot, lhäy'e hup tä olham owukwehila.
Wet rey hiw'en n'oho nilhokej m'ak tä ot'alhe, tsi oisej t'at oka Dios lech'otyaj tä iti n'oyej. 9Häte rey ichen n'okwe sip'äl tä iwo lew'uteya, lhäy'e laka niyatey, yämthilek t'u n'oye tä onukwe n'äyij. Wet tä onchäte gobernadores tä tumej tewokitaj Éufrates lhipna, ow'enho rey lhämet tä ichene lhamel. 10Matkat niyat tä lhey Sambalat tä tälhe Horón, lhäy'e niyat elh tä lhey Tobías tä tälhe Amón, lhamel wuj tä nhuminache tä iche elh tä näm yämthilek tach'ote Israel lhayis.
Nehemías itetshan n'olafwek tä Jerusalén lep'ot
11Tä ilepese onchäte Jerusalén. Wet tä tajyäme tres ifwalas tä oihi, 12oyik tä honatsi, olhäy'e iyhäjfwas hin'ol, mat ofwenhihot'a elh chik häpe tä Dios yen otichunhayaja yämthilek oyenlhi Jerusalén tä onech'aynhi. Wet ts'ilak olham tä owo ow'uteya. 13Honatsitso onuphä tä otälhche lepe tä tumejlä honhat tä w'awulhchä, wet ottaye ts'ifwik tä lhey M'akitaj. Tä otälhe, wet otiyäje lepe tä tumejlä basuraw'et, wet oyahinlhi t'at n'olafwek tä Jerusalen lep'ot tä nichät katsi wet õ'wunhomche lepelis. 14Wet otujlhache tä oyik tä oyahinlhi, wet ohoye lepe tä tumejlä ts'ifwik. Tä otälhe, wet otiyäje inätw'et tä lhey Rey Nayhthi, mat ow'ute nemhit isakantshi. 15Wet tä kamaj honatsi i'pe honhat, onukwe t'at tewok lhäyij tä lhey Cedrón. Tä oleyej tä oyahinlhi n'olafwek, otpilche lepe tä tumejlä honhat tä w'awulhchä.
16Wet niyatey ihanhiyejt'a lhip tä ohoye wet ihanhiyejt'a m'ak tä owoye. Wet olham tek okalelhtho Judío lhayis, wok oyok, sacerdotes, lhäy'e hin'ol tä wichi laka niyatey, lhäy'e wichi tä tach'othiyela n'ochumet.
Nehemías inityenej wichi yämthilek inech'aynhi n'olafwek
17Wet ofwenho lhamel wet oyok:
–Lew'en tä wuj tä atha lhan'äyij, tsi Jerusalén wasi wet õ'wunhomche lepelis. ¡Huwa, n'enlhi n'olafwek, häpkhilek wichi nem n'ailäkwethä!
18Wet tä ofwenho lhamel m'ak tä Dios iwoyej n'oye tä tach'ot n'oye, lhäy'e rey lhämet, lhamel nichulh n'oho wet yok:
–¡Huwa, n'enlhi!
Wet nilhokej lhamel y'ajwek tä lhaikhajyenhen tä yenlhi lechumet. 19Matkat Sambalat, niyat tä tälhe Horón, lhäy'e niyat elh tä lhey Tobías tä tälhe Amón, tä lhamel ihanch'oye täjtso, lhäy'e Gesem tä häpe Árabe, lhamel wuj tä iläkwlhi olhamel wet iwoyej n'oyehen lhämet tä fwetaj lajit lahaya olhamel. Wet yok:
–¿Atsi m'ak tä lewoyaye? ¿Hä lefwetajay letatayhlä häp rey?
20Olham onchulho lhamel wet oyok:
–Dios tä pule Lewuk tach'otla n'oyehen. Olhamel ohäpehen lakawos, wet owohla tesa tä oyenlhi n'olafwek wet wak'alhila. Amel y'ajit'a amehen, haw'ethit'a Jerusalén wet tek alewuhuy.
Currently Selected:
Neh 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.