Mat 2
2
N'ältshantses tä tälhche tä ifwala tälhche t'ukwe han'äfwaj Jesús
1Tä Jesús nech'e iche p'ante ihi hupuy tä Belén ihi honhat tä Judea, häpe t'at lewhäy p'ante hin'o tä lhey Herodes#2.1 Herodes tä Lhamya. häpe niyat. Wet iche häp hin'ol tä n'ältshantses tä lhaichufwenejen tä itetshan katetsel, lhamel tälhche tä ifwala tälhche wet nämho Jerusalén, 2wet tay'ätshanejlhi tä yok:
–¿Chi tä ihi Judío lhayis Kaniyat tä nech'e iche? Tsi olhamel ow'en laka kates tä inuphä, wet häp tä onekhen yämthilek on'okwiyej.
3Tä Herodes iläte, wuj tä lelhakli ihi, lhäy'e nilhokej Jerusalén lheley. 4Wet lham t'äne nilhokej sacerdotes tä len'ohyajay ihiche, lhäy'e hin'ol tä lhayen lewosayej Ley p'ante tälhe Moisés, wet tay'ätshaneje lhamel tä yok:
–¿Atsihila lhip tä häpe tä N'ofwayhthi tä Dios Chenek nichäthihchä?
5Lhamel nichulho tä yok:
–Häpe t'at Belén, häp Judea lhip. Tsi Dios laka profeta lhämet p'ante ihi Lehi tä yok:
6“Häp am, Belén, tä lhehi Judá,
ahäpkhit'a hupuy tä w'et m'ayek t'at
tä lhewej hupuy tä lhamenya tä ihi honhattso.
Tsi tälhila amho Niyat
tä t'uhiyela oka wichi Israel.”#Miq 5.2
7Tä Herodes iläte lhämettso, wet lhaits'ilkatej n'ältshantsestso wet tay'ätshane tä yok:
–¿Atsi lewhäy p'ante n'äl tä lew'enay kates tä lhämayetso?
Tä lhamel ifwenho, 8wet lham ichen wet yok:
–Mähen hoye Belén, ätshanayejlhi tä let'ukwe han'äfwaj. Wet chik lelhokaye, tapil, fwelayhla n'oho häpkhilek olhamtej ohohiyela wet on'okwiyej.
9-10Tä lhamel iläte, yikhen tä yikch'oye, wet nech'e äp n'äl kates p'ante lhamel hiw'en tä inuphä, wet lhamel lhäy'e lhip tä lakäjyaj ihi. Wet äp kates nech'e yik tä ichunch'oye lhamel yäk nichäte lew'et tä han'äfwaj ihi, wet takasitpe. 11Tä lhamel yäm, tiyäjchufwi hup wet hiw'en han'äfwaj lhäy'e lako María, wet takhoschufwi han'äfwaj wet n'okwiyej. Wet ifwoyenche'pe lakhäyhis wet yen t'awayhata häp oro, lhäy'e incienso, lhäy'e mirra.
12Tä tajyäme täjtso, wet lefwilhek ihi tä yok, “Yej lhäplaye Herodes.” Tä mälhyejtso, inukwe n'äyij elh tä yäple laka honhat.
José lhäy'e María iletnhayne lhäs häp Egipto
13Tä n'ältshantses pajche yikhen, Lhawuk laka ángel lhain'ältej José tä imä wet tahuyej tä yok:
–Nephä, chuma han'äfwaj lhäy'e lako wet lethane honhat tä Egipto. Ehila yäk ofwel amho, tsi Herodes t'uhikwela han'äfwaj wet t'uhläk ilän.
14Tä José n'omej lefwilhek, wet nephä, tachuma han'äfwaj lhäy'e lako, wet lhamel yikhen honatsitso tä ihoye Egipto. 15Wet lhamel ihi p'ante yäk y'il Herodes. Wet mälhyejtso tä lhayäm matche Lhawuk lhämet tä ifwenho p'ante häp laka profeta tä yok, “Ot'äne Olhäs tä ihi Egipto.”#Oseas 11.1
Herodes ne'tek õ'länhen nä'tshas
16Tä Herodes nitäfwelej tä n'ältshantses ikanej, lhäy'e lhip tä lewäk ihi. Wet häp tä ichen laka sip'äl, ne'tek ilänhen nilhokej nä'tshas tä hin'ol tä lelemsas tä lew'etes Belén lhäy'e lhipey tä tott'ahomche, tälhe lhamel tä nech'e iche yäk nichäte iyhäj tä laka nekchämes täkwfwas. Tsi häp tä hiw'awlhatej häp fwalas tä n'ältshantses ifwenho. 17Wet mälhyejtso tä lhayäm matche profeta Jeremías lhämet p'ante yok:
18“Pitsaje n'opak tä tumho Ramá
tä häpe n'olhafwyhayaj lhäy'e n'olhakli tä wuj.
Häpe Raquel tä tafwlhi tä y'äyen leles,
wet tek t'uhläk wo elh chik tach'oteje lelhakli,
tsi nemhit ichehen.”#Jer 31.15
José lhäy'e María lhäy'e han'äfwaj Jesús tälhe Egipto wet yäple Israel lhayis
19Mat tä Herodes y'il, Lhawuk laka ángel lhain'ältej José tä imä tä lham ihi p'ante Egipto, wet tahuyej tä yok:
20–Nephä, chuma han'äfwaj lhäy'e lako wet äple Israel lhayis, tsi pajche y'inhen häp lhamel tä t'uhläk ilän han'äfwaj.
21Tä mälhyejtso, José nephä wet yik, ichäj han'äfwaj lhäy'e lako wet yäple Israel lhayis. 22Mat tä ihanch'oye tä Arquelao lhayen niyatayej honhat tä Judea tä yäpnho lajcha Herodes lew'et, nowayek yäple honhattso. Mat Dios iwo lefwilheka wet ifwenho m'ak tä is chik iwoye. Wet häp tä tachuma han'äfwaj lhäy'e lako wet ihoye lhip tä lhey Galilea, 23tä yäm wet yen lew'eta hupuy tä Nazaret. Wet mälhyejtso tä lhayäm matche profetas lhämet p'ante yäme Jesús tä õyenla lheya Nazareno.
Currently Selected:
Mat 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.