Juan 4
4
Atsinha Samaritana nilhoke Jesús
1Fariseo lhayis ihanch'oye tä wujpe wichi tä ihänlhi Jesús, inu'pe wichi tä yen lehäneka Juan. Häte itoyne tä lhamel tä Jesús ibautisaynhen inu'pe lhamel tä Juan ibautisaynhen, 2(tej tä kahäpeya lham Jesús tä ibautisaynhen, mat lechufwenkay t'at tä iwoye täjtso).
3Tä Jesús ihanej tä Fariseo lhayis ihanch'oye m'ak tä iwoye, yikch'oye Judea wet yäple Galilea, 4wet iwohiyet'ak ninuyakwe n'äyij tä inukwe honhat tä Samaria. 5Wet nichäte hupuy tä lhey Sicar tä ihi honhattso, tott'aho honhat lhip p'ante Jacob yachaje lhäs José yämthilek lhayen lewuka.#Gén 33.19; Jos 24.32 6Wet Jacob lepek p'ante häp tä ihi lhiptso, wet tä Jesús nichäte, wet tatayphäwhäye, tsi wuj tä y'elej len'äyij wet ifwala nichätho t'at lechowej.
7-8Wet tä lechufwenkay yikhen tä ihoye hupuy yämthilek ichäj lhäk, näm atsinha tä lew'et Samaria tä t'ukwe inät. Wet Jesús tahuyej tä yok:
–W'en n'oho lhiphaj inät.
9Mat tä Judío lhayis nena iyhäja Samaritano lhayis, häp tä atsinha nichulho wet yok:
–Am ahäpe Judío wet olham ohäpe atsinha tä Samaritana. ¿Chipte tä mälhyejtso tä let'alhej n'oye inät?
10Jesús nichulho wet yok:
–Che letäfwnhiyej m'ak tä Dios yen n'otw'ayhata, lhäy'e hin'o tä t'alhej ame inät, amhin'e t'at che let'alheje wet lham hiw'enhin'e amho inät tä n'ow'atshancheyaj.
11Wet atsinha yok:
–Mat lhek yahinya, lew'enhit'a lehi yämlek letonphä inät, wet n'opekna wuj tä atojchä inät tä ihi. ¿Chi letälhthi inät tä n'ow'atshancheyaj? 12¿Hä am lenu'pe p'iya olhamel otes Jacob tä hin'äy p'ante n'oyejen lepekna tä häpe t'at lepek tä lham iyäyej p'ante inät tä tälho, lhäy'e leles, lhäy'e tä iyäynejen p'ante leläy?
13Jesús nichulho wet yok:
–Elh che häpe tä iyäyejpej inätna, yachajihola tä ichimpej. 14Mat elh che iyäyej inät che olham ow'enhihola nemla yachajo che ichimpej. Tsi häp inät che olham ow'enhihola lhayenla ts'ifwikahi, yämlek nichäte lew'atshancheyaj tä t'un.#Juan 7.37-39
15Tä atsinha iläte, wet yok:
–Woye tä owoye, w'en n'oho inättso häpkhilek nemhit ochim, wet äp nemla ohopej kana che owatlä inät.
16Jesús ifwenho wet yok:
–Mäh äne ayej hach'efwa, wet tapila kana.
17Mat atsinha yok:
–Och'efwa ihihit'a.
Jesús nichulho wet yok:
–Matche ämet tä lhok, “Och'efwa ihihit'a.” 18Tsi pajche hach'efwas cinco tä leleyejpej, wet häp elh tä lhewej athana häpkhit'a hach'efwa. Matche t'at ämettso.
19Tä atsinha iläte täjtso, wet yok:
–Iwuk, nech'e ow'en tä ahäpe t'at profeta. 20Häpet olhamel ochätilis p'ante Samaritano lhayis, lhamel yen at lew'eta häp chenajna tä n'okwiyejpej Dios, mat amel Judío lhayis lhämaye tä ts'ilak Jerusalén tä is che wichi ihoye yämlek iwo len'okhayaja.
21Jesús nichulho wet yok:
–Atsinha, yej kachu tä oyok, nämla lewhäy tä amel nemla lehoyaye chenajna wok lehoyaye Jerusalén yämlek len'okwihiyeja häp Lhajcha. 22Amel Samaritano lhayis tek lehanayej elh tä häpe tä len'okwiyayej. Mat olhamel ohanej t'at Elh tä on'okwiyej, tsi häp tä isej Judío lhayis Dios ifwel tä iche n'ofwayhyaj. 23Mat nek lewhäy, wet häpe t'at athana, tä wichi itihiyeja Lhajcha häp len'okhayaj tä matche, häp tä isej Espíritu tä T'amajchet lakhajyhayaj. Tsi häp täjtso tä Lhajcha t'uhläk wichi iwoyeje tä n'okwiyej. 24Dios häpe Espíritu, wet häp tä wichi tä n'okwiyej iwohiyet'ak lhamel nitiyayej len'okhayaj tä matche, häp tä isej Espíritu tä T'amajchet.
25Tä atsinha iläte täjtso, wet yok:
–Ohanej tä nämlapa N'ofwayhthi tä Dios Chenek, wet che näm häpkhilek ikalelhät n'ohohen nilhokej m'ayhay.
26Jesús nichulho wet yok:
–Häp hin'o tä lhämetso, häp tä yämlhi amho, tsi ohäpe t'at.
27Wet nech'e nämhen lechufwenkay, wet lhamel wuj tä iseltejen tä hiw'en Jesús tä yämhoplhi atsinha. Mat ihichet'a elh che yok, “¿Atsi m'ak tä lewatlä?”, wok yok, “¿Chipte tä lhämhoplhi atsinhana?”
28Wet atsinha hin'äy lhäkwe wet yik tä yäple hupuy. Tä nichäte, wet ifwenhomche wichi tä yok:
29–Lhuyay, yahnaye häp hin'o tä ifwel n'oho nilhokej okeyes tä owoye. ¿Etp'i häpe N'ofwayhthi tä Dios Chenek?
30Tä wichi iläte, wet lhamel tälhomche lew'etes wet ihoye Jesús. 31Wet tä kamaj wichi nichätaye, lechufwenkay inityenej Lewuk tä yok:
–Maestro, tuj ayej m'akfwaj.
32Mat lham nichulho wet yok:
–Olham ow'en t'at olhäk tä otuj, häp m'ak tä amel katäfwelayej.
33Wet lechufwenkay tay'ätshan lhamehen tä yok:
–¿Hä ichen'e elh che ichäje lhäk?
34Mat Jesús yok:
–M'ak tä olham olhäk häpe t'at tä owoye lenech'ethayaj häp Elh tä lechenekn'o, yämthilek wak'alh lechumet. 35Amel lhoyaykwe, “Tatäy cuatro iwel'as wet häpkhilek õ'lanhi yachuyaj.” Mat olham oyok, Lhek yahinay yachuyaj, y'o t'at yämthilek õ'lanhi. 36Wet elh tä ilanhi ikalhi t'at lakaha, wet lhay tä ihutwek häpe lhamel tä nichätho lew'atshancheyaj tä t'un, yämthilek elh tä tutchey lhäy'e elh tä ilanhi lakäjyaj ihi lhamejen. 37Oyok, matche t'at n'olhämet tä yok, “Hin'o tutchey wet elh ilanhi yachuyaj.” 38Olham ochen amehen yämthilek lelanayhi yachuyaj tä ka'amelak achumetay p'ante. Matche, iyhäj tä yenlhi p'ante, mat nech'e amel t'at tä lewo kotsayej lhamel lechumettso.
Samaritano lhayis ichaye Jesús
39Häp Samaritano lhayis tä lew'et hupuytso, tä lhamel iläte atsinha lhämet tä yok, “Ifwel n'oho nilhokej okeyes tä owoye”, wet wujpe lhamel tä ichaye Jesús. 40Wet tä nichäte Jesús, wuj tä lhaip'altsene wet yok:
–Kasit ayej n'oyejen.
Wet lham iwoye, takasit ayej ifwalas täkwfwas, 41wet wujpe iyhäj tä ichaye tä iläte lham lhämet. 42Wet lhamel tahuyej atsinha wet yok:
–Athana ts'ilakhit'a ämet tä tamenej tä olhamel ochaye, mat nech'e olhamel t'at tä oläte häp lham, wet nech'e ohanej tä matche, lham häpe t'at wichi Lefwayhthi.
Jesús ichesat rey leniyatfwa lhäs
43Tä tajyäme täkwfwas ifwalastso, Jesús yikch'oye Samaria wet tujlhache lew'ekyaj tä ihoye Galilea. 44Tek yäple Jerusalén, tsi mälhyej tä lham yäme tä yok, “Häp profeta che ihi honhat tä lew'et wichi yen w'et m'ayeka.”#Mar 6.4 45Tä nichäte Galilea, wichi tachumlä, tsi lhamel pajche ihoye Jerusalén häp ifwalas tä n'okäjyaj tä Pascua wet hiw'enej nilhokej m'ak tä lham yenlhi.#Juan 2.23
46Tä paj wet lham yachajo tä ihoye Galilea lhip tä lhey Caná, häp hupuy tä lham ihihte tä iwelanhat vinoya häp inät.#Juan 2.1-11 Wet iche rey leniyatfwa tä lew'et hupuy elh tä Capernaum, lhäs t'inhayaj ihi. 47Wet tä hin'otso iläte tä Jesús nämho Galilea tä tälhe Judea, lham yik tä ihoye. Wet wuj tä lhaip'altsene tä yok:
–Iwuk, woye tä owoye, nek n'okwe, hoye ow'et wet chesat olhäs tä eyte y'inhi.
48Mat Jesús nichulho wet yok:
–Che amel kaw'enaya n'otetnhay che leseltejen, tek let'ekhayaye.
49Mat rey leniyatfwa yok:
–¡Iwuk, p'altsenn'o, kelhi, kamaj olhäs n'ila!
50Wet nech'e Jesús yok:
–Mäh äple haw'et. Äs iches, y'inhit'a.
Wet hin'otso t'ekhaye t'at Jesús lhämet tä ifwenho, wet yik. 51Wet tä ihi len'äyij, lakawos lhaichutyenej wet ifwenho tä yok:
–¡Äs iches t'at, y'inhit'a!
52Wet tay'ätshane lakawos tä yok:
–¿Atsin'aj hora tä häpe tä iches?
Lhamel yok:
–Honahaji tä ifwala tatayhchä tä nem chayo t'isan.
53Wet häp han'äfwaj lajcha nech'e lehusekch'oye tä häpenaj t'at häp horatso tä Jesús yok, “Äs iches, y'inhit'a.” Wet lham lhäy'e nilhokej lew'et lheley t'ekhaye Jesús.
54Wet täjtso nech'e dos veces tä Jesús tälhe Judea wet ihoye Galilea, wet dos veces tä yenlhi letetnek.
Currently Selected:
Juan 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.