Juan 15
15
Jesús häpe uva lhile tä matche
1Jesús tujlhache lhämet wet yok:
–Ohäpe uva lhile tä matche,#Isa 5.1-7 wet Ojcha häpe elh tä yenlhi. 2Wet olhacha chik niwoya lhaya, lham yiset. Mat olhacha tä iwo lhaya, tajlhama tä yisetlä lepesey yämthilek lhäy'e lhip tä iwo lhaya. 3Amel pajche anojwethä wet aisen t'at, tsi olhämtes tä ofwelpej amhohen häp tä aisayej. 4Asatyenay n'oyej, mälhyej tä olham osat amejen. Ihichet'a uva lhacha chik ihanej lhaiwoyneje chik iwo lhaya. Tajlhama chik hap'akej lefwetes, wet häp tä iwo lhaya. Häp tä hätet iwoye täjtso, chik amel kap'akaya n'oyej, tek lehanayej lewoyneje yämthilek lewo aya.
5“Ohäpe uva lhile wet amel ahäpehen olhachal. Elh tä sat n'oyej wet olham osatej, häp tä wuj lhay tä iwoye. Tsi chik kahäpeya olham, niwohit m'ak chik lehanayej lewoyneje chik lhenlhi. 6Elh tä lhaknisatyena n'oyej õ'thatla alhoye wet tamchäyhla, hätehlat iwoye hal'ä lhachal tä õ'hutwek wet õ'thatho itäj tä õ'wunho.
7“Chik amel alesatyenay n'oyej wet chik äp lesatyen amejen olhämtes, alhaye m'ak at chik häpe chik lewatlä, wet Dios itihlat amejen. 8Chik wuj lhay tä lewoyaye, häp tä lhain'älit Ojcha lewujyaj wet äpte n'äl tä ahäpehen t'at ochufwenkay tä matchehen. 9Hätet iwoye tä Ojcha ihuminn'o, wet mälhyejtso tä oaihumnhen. Yej aletiyayej kanhihlä ohumnhayaj tä oti amejen. 10Chik lewoyaye olhämtes, häpkhilek lheyayhi t'at ohumnhayajna, hätet iwoye tä olham owoye Ojcha lhämtes wet oihi t'at lham lehumnhayaj.
11“Owoynejetso olhämtes tä ofwel amhohen, häpkhilek okäjyaj tä in'oyej i'amejen wet nittäya lhip akäjyaj. 12Häp täja olhämet tä one'tek lewoyaye: Humnhen aiyhäj hätet iwoye tä olham oaihumnhen.#Juan 13.34; 15.17; 1~Juan 3.23; 2~Juan 5 13Wet häp n'ohumnhayaj tä lhäy'e lhip tä wuj häpe t'at tä hin'o iwompe lepuhfwas häp lham lew'atshancheyaj. 14Chik amel lewoyaye m'ak tä one'tek lewoyaye, ahäpehen t'at opuhfwas. 15Oleyej tä oayen okawosa, tsi n'okawo ihanhiyejt'a m'ak tä lewuk iwoye. Mat oayen opuhfwasa, tsi otäfwnhat amejen nilhokej m'ak tä Ojcha ifwel n'oho. 16Amenhit'ak letatshupiyay n'oye, mat olham t'at tä ottshupi amehen, wet one'tek lhekhen wet lhämay wuj lhay tä lewoyaye, häp lhay tä nittäya. Wet chik mälhyejtso, m'ak at chik häpe chik let'alhayeje Ojcha häp tä isej olhey, hiw'enla amhohen. 17Häp täja m'ak tä one'tek lewoyaye, oyok, Humnhen aiyhäj.
Honhat leles n'äyiho Jesús lhäy'e Dios leles
18“Chik honhat leles n'äyi amhomche, hanayej tä olham tä ichunkatn'o tä n'äyi n'oho. 19Chik amel ahäpkhihen honhat leles, lhamel tä honhat leles aihumnhen t'at, hätet iwoye tä lhaihumnhen. Mat tä ot'ä amhihen tä lheyayej lhamel, häp tä tamenej tä n'äyi amhomche, tsi nemhit ahäpehen honhat leles.#Juan 17.14-18 20Tichunache olhämetmat ofwel amhohen tä oyok, Elh tä n'okawo inuhit'a'pe lewuk.#Juan 13.16; Mat 10.24; Luc 6.40 Tä wichi iti n'oyej laka'tshayaj, häte itihla amejen laka'tshayaj. Wet tä lhamel tach'ahuye olhämtes, häte tach'ahuhiyela amel ämtes. 21Iwohiyeja amehen m'ayhay tä oyämetso, häp tä lehänaylhin'o tä tamenej, wet nitäfwenhiyejt'a Elh tä lechenekn'o. 22Chik n'am nämhiye lhamel wet n'am tahuyhiyej, letes ihihit'a. Mat athana letes tatäyhit'a. 23Tä lhamel n'äyi n'oho, häte n'äyiho häp Ojcha. 24Letes ihihit'an'e chik n'am nenhilhi m'ayhay tä oiyejen lhamel tä niwoya elh chik ihanej iwoyneje tä yenlhi. Mat tej tä hiw'enejpej m'ayhaytso, lhamel n'äyi n'oho wet häte n'äyiho häp Ojcha. 25Mat iwohiyet'ak lhaknäma matche Dios lhämet tä ihi Lehi tä yok, Niwohit m'ak chik tamenej tä n'äyi n'oho.#Sal 35.19
26“Mat ochenla amehen Hach'otfwa tä tälhe Ojcha. Lham häpe Espíritu tä hin'älit m'ak tä matche, wet chik näm yämla n'oye. 27Wet amel häte lhenla ämetan'o, tsi lheyay n'oyej tälhe tä owo tesa ochumet.
Currently Selected:
Juan 15: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.