Éx 2
2
Moisés nech'e iche p'ante
1Iche p'ante hin'o tä iyej wichi tä tälhe letes Leví. Lham iyej atsinha tä äp häpe t'at Leví lhayis elh. 2Wet atsinhatso hich'otshan p'ante wet iwo lhäsa. Tä hiw'en tä wuj tä isilataj häp lhäs, iskat pajtha tres iwel'as.#Heb 11.23 3Mat tä paj nemhit ihanej iwoyneje tä fwetaj iskatlhi. Tä mälhyejtso, tachuma hal'äy tä hätet iwoye tuskalis wet yen lehiya. Wet y'ilenejlhi alquitrán tä häpe honhat lhits'i tä ichalaj, wet ikasoyej asnajlhäklä lhits'i häpkhilek inät nitiyäjaho. Tä wak'alh, ithatho han'äfwaj häp lech'o, wet itihi lechowej häp tuskalis tä iche tewok lhip. 4Wet häp han'äfwaj lechita takasit tä atofwehlä, mat iyahne t'at yämthilek hiw'enej m'ak chik mälhyej.
5Tä paj Egipto kaniyat lhäse ihoye tewok tä t'uhläk inay. Tä nichäte, lakawos tsinhay ilunche t'at lhip, wet lham hiw'ene lehi tä ihi lechowej häp tuskalis. Wet ichen elh lakawo wet yok:
–¡Mäyeh!
6Tä lakawo'tsinha ihäne, lham ifwoyenpe wet hiw'en tä han'äfwaj tä ihi wet tafwlhi. Wet iyahin wet hip'altsen wet yok:
–Hebreo lhayis tä lhäs han'äfwajna.
7Wet han'äfwaj lechita ihoye, wet tahuyej wet yok:
–¿Hä lehuminchek ot'äne atsinha tä Hebrea tä t'uyehen nä'tshas wet itifwkatla häp han'äfwajna?
8Niyat lhäse yok:
–Is t'at, mäh hoye.
Wet atsinha lhutsha yik tä ihoye han'äfwaj lako, wet t'äne. 9Tä nichäte niyat lhäse, tahuyej atsinha wet yok:
–Chuma han'äfwajna wet uye n'oho. Owohla lahaya achumet.
Wet lako ichäj han'äfwaj wet hiw'enho lakat'os. 10Wet tä thaläkw p'ante, lako yachaje niyat lhäse. Wet yen lhäsa, wet yen lheya Moisés, tsi yok:
–Tälho inät tä otonphä.#2.10 Häp n'olhey Moisés yiwitej n'olhämet p'ante yok, Otonphä.
Moisés yikch'oye Egipto tä ilethan, ihoye honhat tä Madián
11Tä Moisés nech'e häpe hin'o tä thaläkw p'ante, wet iche ifwala tä lham ihoye lepuhfwas Hebreo lhayis wet hiw'en tä äytaj lechumet lhamel. Wet hiw'en Egipto lhele elh tä ipäjlhi Hebreo. 12Tä iyahin lhipey, hiw'en tä newache hin'ok hiw'enej, wet ilän Egipto lhele wet ipotejpe holo.
13Tä ifwala elh p'ante yachajo tä ihoye iyhäj, wet hiw'en tä nech'e lhamel Hebreo lhayis tä tataywek. Wet ihoye wet tay'ätshane elh tä ipäjlhi elh wet yok:
–¿Chipte tä lepäjlhi Hebreo tä äp ahäpe t'at Hebreo?
14Hin'otso nichulho Moisés wet yok:
–¿Atsi tä ayen olhamel oka niyata yämthilek letetshan olhamel, wet äp n'okalelhthayajwo tä iyej olhamel? ¿Hä let'uhläk letech'ayen n'oyej Egipto lhelen'aj lelän?
Tä Moisés iläte, wuj tä noway wet letichunhayaj yok, “Wichi ihanej t'at m'ak tä owoye naji.”
15Tä Egipto kaniyat ihanej tä Moisés ilän Egipto lhele, ne'tek sip'äl t'ukwe yämthilek õ'län. Mat Moisés yik tä ilethan, ihoye honhat tä Madián yämthilek yen lew'eta. Tä nichäte p'ante honhattso, wet tatayphäwhäye n'opek.
16Wet iche sacerdote tä ihi honhattso, lhey Reuel, wet iche siete leles tsinhay. Wet ifwalatso lhamel ihoye n'opek yämthilek itonphä inät wet itsäyho tson'atas lhäthis wet iyäynej lajcha läy. 17Matkat iyhäj tson'ataswos nämhen wet ichen atsinhay. Mat Moisés nephä wet ihoye lhamel wet yok:
–¡Ch'anlhaye atsinhay!
Tä iwoyetso, lham itonphä inät wet iyäynej Reuel leläy.
18Tä lhamel yäple lajcha, wet lajcha tay'ätshane lhamel wet yok:
–¿Chiwoye tä yofwajkwet lenämhen?
19Lhamel nichulho lajcha wet yok:
–Iche hin'o tä Egipto lhele, lham tach'ot n'oyehen tä hin'ol tä tson'ataswos fwetaj ichen n'ohen. Wet äp lham t'at tä itonphä inät wet hiw'enho lhaläy.
20Tä Reuel iläte, wet yok:
–¿Chip ihitso hin'o? ¿Chipte tä ka'änayaye? ¡Mähen äne yämthilek tufw lhäk kana!
21Tä mälhyejtso, Moisés ihoye wet ihi t'at Reuel lew'et. Tä paj p'ante, Reuel hiw'enho lhäse tä lhey Séfora wet iyej. 22Tä paj iwo lhäsa wet Moisés yen lheya Gersón. Tsi yok:
–Tä oihi honhat tä ka'oka honhata, ohäpe t'at hin'o tä w'enha lhamej.#2.22 Häp n'olhey Gersón yiwitej n'olhämet p'ante yok, Hin'o tä w'enha lhamej.
23Tafwaytshi p'ante wujpe ifwalas, wet y'il p'ante Egipto kaniyat. Mat kamaj Israel lhayis hiw'en tä äytaj m'ak tä õ'woyeje tä õyen kwenkaya, wet lhamel t'änch'oye Dios. 24Wet Dios iläte lhamel lelhakli, wet nitichunche lhämet tä iwoyeje p'ante Abraham, lhäy'e Isaac, lhäy'e Jacob. 25Tä mälhyejtso, iyahin Israel lhayis wet wuj tä hip'altsen.#Gén 15.13-14
Currently Selected:
Éx 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.