Ester 9
9
Judío lhayis ikalhi letayhfwas
1Ifwala trece, häp iwel'a doce, häp iwel'a tä õyen lheya Adar, häpe ifwala tä wichi lhaiwaklhathen yämthilek iwoye rey lhämet. Wichi tä Judío lhayis letayhfwas yok:
–Nofwila lhamel.
Mat tek mälhyejtso, tsi Judío lhayis tä ikalhi lhamel. 2Wet nilhokej rey Asuero laka honhates, Judío lhayis lhaihutchewek tä ihiche hupuy tä lew'et yämthilek tatayhlä wichi tä fwetaj inuye. Mat ihichet'a wichi chik fwetaj tatayhlä lhamel, tsi wichi wuj tä nowaye. 3Nilhokej niyatey tä ihi rey niyatyaj, lhäy'e gobernadores tä ihiche honhates, lhäy'e rey leniyatfwas, lhamel tach'ote t'at Judío lhayis, häp tä lhamel nowaye Mardoqueo. 4Tsi häpe hin'o tä wuj len'ohyaj ihi tä ihi rey lewukwe, wet letoyaj y'ajpe nilhokej honhates tä ihi rey niyatyaj, wet ifwalapej t'aytshi lakhajyhayaj.
5Wet Judío lhayis ilänhen letayhfwas wet ihämtej wichi tä n'äyiho lhamel, iwoyeje m'ak tä ihuminche. 6Wet hupuy tä lhamya Susa iche quinientos hin'ol tä Judío lhayis ilänhen. 7Häte ilän Parsandata, Dalfón, Aspata, 8Porata, Adalías, Aridata, 9Parmasta, Arisay, Ariday, lhäy'e Vayzata. 10Lhameltso häpehen Amán leles tä ihi diez, häp Judío lhayis tayhfwa tä lhamya. Mat tachumhiyet'a lakäywetes.
11Wet ifwalatso rey ihanej wichi tä Judío lhayis ilänhen tä ihi Susa. 12Wet tahuyej reina Ester wet yok:
–Judío lhayis ilänhen quinientos hin'ol lhäy'e diez Amán leles tä ihi Susa. Chik mälhyejtso, ¿chiwoye honhates iyhäj tä ihi oniyatyaj? Fwel n'oho atsi m'ak tä lewatlä. Ow'enla amho.
13Ester nichulho wet yok:
–Ika niyat, chik lehuminche, wahnej Judío lhayis tä ihi Susa yämthilek m'ak tä iwoye ifwalana mälhyej ämet tä lewoye, häte is chik iwoyek ifwala. Wet is chik lhamel ifwuhatwethä diez Amán leles lep'itseyhay.
14Wet rey ne'tek õ'woye täjtso, wet õ'fwenho wichi tä ihi Susa, wet õ'fwuhatwethä diez Amán leles lep'itseyhay. 15Wet Judío lhayis tä ihi Susa lhamel yachajo tä lhaihutwek ifwala tä catorce, häp iwel'a tä lhey Adar. Wet ilänhen trescientos iyhäj letayhfwas, mat tachumhiyet'a lakäywetes. 16-18Tä mälhyejtso, täkwfwas ifwalas tä lhamel lhaihutwek tä iwo laka'tshayaja, häp ifwala tä trece wet catorce. Wet ifwala quince lhamel iwo t'elakw'eta wet yen lakäjyaja.
Mat iyhäj tä ihiche honhates tä ihi rey niyatyaj, ts'ilak ifwala trece tä lhamel lhaihutwek wet tatayhlä wichi tä inuye. Wet iche setenta y cinco mil (75.000) hin'ol tä lhamel ilänhen, mat tachumhiyet'a lakäywetes. Wet häp ifwala catorce lhamel iwo t'elakw'eta wet yenlhi lakäjyaj tä wuj. 19Häp tä tamenej tä Judío lhayis tä ihiche lew'etes, wok oyok, ihiche hupuy tä newache n'olafwek tä lep'ot, lhamel iwopej lakäjyaja häp ifwala catorce, iwel'a tä lhey Adar. Nekchämpej nekchämpej lhamel yenlhi lakäjyaj ifwalatso, wet wuj tä akäswethä, wet hiw'en lhamhomche t'awayhtes.
N'okäjyaj tä lhey Purim
20Mardoqueo ilesayen m'ayhay tä iche, wet ichene laka cartas nilhokej Judío lhayis tä ihiche rey Asuero niyatyaj tä lew'etes ni'tofwaye lhäy'e iyhäj tä atosehen. 21Ne'tek Judío lhayis, chik nichätepej nekchäm, wet iwo lakäjyaja häp ifwala catorce lhäy'e quince, häp iwel'a tä lhey Adar. 22Häp ifwalas täkwfwasna tä Judío lhayis ikalhi letayhfwas, häp iwel'a tä lhamel lelhakli wuj tä äytaj mat nech'e häpe t'at lakäjyaj. Wet ifwalas täkwfwasna is chik Judío lhayis iwo lakäjyaja, wet is chik hiw'en lhamhomche t'awayhtes wet äp iwo t'awayhtesa iyhäj tä p'elitses.
23Wet Judío lhayis iwoye t'at m'ak tä Mardoqueo ne'tek iwoye, wet lhamel iwo tesa tä yenpej lakäjyaja tähestso. 24Tsi Amán, häp Judío lhayis letayhfwa tä häpe Hamedata lhäs tä letes p'ante Agag, lham pajche ikoyej p'ante suerte tä t'uhläk ilänhen lhamel yämthilek nofwej. 25Matkat tä reina Ester ihoye rey, wet rey ne'tek õ'lesayen lhämet tä yok, “Nilhok m'ak tä ni'isa tä Amán t'uhläk iwoyeje Judío lhayis, is chik nichätpe lham Amán.” Wet mälhyej p'antetso Amán lhäy'e leles õ'fwuhatwethä. 26-27Häp tä tamenej tä õyen lheya Purim häp ifwalas täkwfwasna. Tälhe t'at n'olhämet p'ante yok, Pur, tä yiwithi n'olhämet tä yok, Okoyej suerte.
Wet Judío lhayis yen tichunhayaja tä is chik iwoye t'at mälhyej Mardoqueo lhämet tä ilesayen tä ichene lhamel, lhäy'e m'ak tä lhamel hiw'enpe. Wet lhamel yok:
–Is chik lhakey t'at täja, pajla'tha nichäte lhales tä lepes lheley, lhäy'e nilhokej wichi tä lhayen häpeya Judío lhayis. Tä n'amel y'anchätepej nekchäm, is chik y'en lhakäjyaja häp ifwalas täkwfwasna, mälhyej tä õne'tek y'awoye. 28Wet is chik y'alhokej n'amel y'enpej lhatichunhayaja ifwalastso tä Purim, wet y'en lhat'amajcheta tä y'ehiche lhaw'etes, honhat at chik häpe chik y'ehi, yämthilek nittäya pajla'tha tiyäj'attsiy.
29Wet reina Ester tä Abihail lhäse, lhäy'e Mardoqueo, lhamel ilesayen elh laka carta tä yäm kalelhäj häp carta tä ichun tä yäme n'okäjyaj tä Purim. 30Wet ichene nilhokej Judío lhayis tä ihiche ciento veintisiete (127) honhates tä ihi rey Asuero niyatyaj. Ilesayen lhämtes tä isen lhäy'e tä kalelhäjen, 31ne'tek Judío lhayis iwopej lakäjyaja tä nichäte lakäjyaj tä lhey Purim, häp ifwalas tä lewhäy, mälhyej tä Mardoqueo lhäy'e reina Ester ne'tek lhamel iwoye, lhäy'e leles, pajla'tha nichäte lepes lheley. Häte yenlhi lhämet tä hip'ajtej tä ne'tek Judío lhayis yen keya tä lhaichuyhathen wet t'änch'oye Dios. 32Wet Ester lhämet yäm kalelhäj m'ayhayna tä yäme Purim, wet õ'lesayen tä ihi lehi.
Currently Selected:
Ester 9: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.