Ef 2
2
Y'atfwayhen häp tä n'aisej Dios lep'altsenyaj
1Fwalas tä pajche amel ahäpehen lep'itseyhay t'at tä lheyayhi akachuhanyajay lhäy'e hach'isukyajay. 2Tsi lenuyaykwe t'at m'ak tä ni'isa len'äyij, wet lehänay honhatna lakey, wet lewoyaye lenech'ethayaj häp ahättaj tä lhayen niyatayej tä tumphä, häp lham tä tachumhilhi wichi tä niwoyaye Dios lhämet.#Ef 6.11-12
3Wet häpet olhamel tä ohäpehen Judío lhayis, olhamel häte, fwalas tä tajyämetso, owoye t'at tähestso. Ohän t'at olhamel onech'ethayajay, owoye m'ak tä ot'isanis ne'tek owoye, lhäy'e otichunhayajay. Wet m'ak tä ohäpehen p'ante tamenej tä t'uhawet n'oyejen Dios lewäk, mälhyet iwoye wichi iyhäj.
4Matkat Dios wuj tä hap'altsentsaj wet lhäy'e lhip tä ihumnhen n'amel, 5wet tä kamaj n'ahäpehente lep'itseyhay tä y'ehi lhach'isukyajay, lham hiw'enhomche lhahusey lew'atshancheyaj, mälhyej iwoye tä yachajo tä iläyit Cristo t'isan.#Col 2.13 Tä mälhyejtso, häpe t'at Dios lep'altsenyaj tä aifwayhthen. 6Dios inuhatchephä lhahusey tä tälho t'ilek, mälhyej iwoye tä inuhatphä Cristo Jesús tä tälho n'op'itseyhay, wet itayyenchephä n'amel tä y'ewej lham tä ipuleye. 7Häp täja tä iwoye, tä t'uhläk fwalas tä itay alhoho õhw'en häp lep'altsenyaj tä lhäy'e lhip tä wuj tä takäpfwayej n'amehen tä n'aisej Cristo Jesús.
8Tä mälhyejtso, häpe t'at Dios lep'altsenyaj tä aifwayhthen, häp tä aisej achayaj. Häp afwayhyaj amel lekalhihit'a, mat Dios t'at tä yen awayhata. 9Wet häp tä isit'a che elh che häpe lhaichäjlhi, tsi lefwayhyaj tälhiyet'a m'ak tä iwoye. 10N'ahäpehen Dios lhenhay, lham n'ainech'ayneji tä y'ap'akej Cristo Jesús, yämlek y'awoye m'ayhay tä isen tä yiwete m'ak tä pajche iwaklhat tä t'uhläk y'awoye.
Cristo yäm weihalhahchä wichi
11Tä mälhyejtso, lhek tichunache fwalas tä pajche, amel tä ahäpehen wichi tä kahäpeya Judío lhayis, tä n'otetnek tä õyiset t'äj lhip newayej asanis. Wet wichi tä lhaiwujyenejen häp n'otetnektso tä iyejwethä lhamel t'isanis, lhamel iwo lheya amel wet yok, “Wichi tä kan'olhijtshaya.” 12Wet häp lewhäytso Cristo ihit'a amejen, ahäpehen wichi tä nitäfwelayej Dios tä matche, aw'enha lhamejlä Dios laka wichi tä häpe Israel lhayis, wet Dios lhämtes p'ante hit'untejche tä ifwenhomche lhamel, y'ajit'a amehen. Tek letäfwelayej Dios tä matche, wet niwohit m'ak che lenihiyaych'oye tä lheyayhi honhat. 13Matche, pajche a'tofwetlä häp Dios. Mat athana nemhit amälhyejentso, tsi aisej tä lep'akayej Cristo Jesús tä itsäyhchä lew'oyis wet y'il atapehen, yämlek itott'ayen amehen häp Dios.
14Cristo häpe lhatamsek, lham n'aip'ajtitwek, olhamel tä Judío lhayis wet amel tä akahäpeya, yämlek n'aweihalhahchä. Tsi häp tä iwasthi n'on'äyihyaj tä hätet iwoye n'olafwek tä n'aiw'enhathen. Tä y'il tä i'pe cruz, 15wet wak'alh t'at lechumet häp Ley p'ante tälhe Moisés tä õne'tek wichi iwoye, lhäy'e lakeyes tä lewos ifwenhopej wichi.#Col 2.14 Wet häp tä olhamel tä ohäpehen Judío lhayis, lhäy'e amel tä aw'enha lhamejen, n'aip'ajtitwek, yämlek täkwfwasna n'ahäpe weihalhahchä wet nech'ayek tä y'ewej häp lham. Häp täjtso n'otamsek tä lham yenlhi. 16Wet häte häp tä isej t'ilektso tä i'pe cruz, n'a'isyenwek, nemhit y'an'äyi lhamhomche, wet hiw'en n'amhohen lhatamsek tä iyeji Dios yämlek n'ahätet iwoye t'isan weihalha.#Col 1.20
17Cristo nek yämlek iwo silätayej lhämtes tä häpe n'otamsek häp amel tä pajche a'tofwehlä Dios, lhäy'e wichi tä pajche tott'aye.#Isa 57.19 18Tsi Cristo iwo lhan'äyija wet y'asakane Lhajcha, häp tä n'aisej Espíritu tä T'amajchet tä y'ap'akejwek. 19Tä mälhyejtso, nemhit ahäte iwoye wichi tä ihi honhat tä kalew'eta. Mat nech'e amel lhäy'e nilhokej lhamel tä Dios t'amajchetes, lhalew'etfwas t'at, wet ahäpehen Dios lew'et lheley iyhäj.
20Ahätet iwoye hup tä õ'neyhatphä tä lheyaype lefwetes tä häpe apóstoles lhäy'e profetas. Wet lefwetes tä häpe tunte tä lhamya häpe t'at Cristo Jesús.#Isa 28.16; Mat 21.42 21Wet i'pe tuntena, häp lhipey tä õyenejlhi mälhewek hup, y'uy lhamhomche wet yiklhayejphä t'at, yämlek häpe Dios Lew'et tä T'amajchet. 22Wet häp tä mälhyej'attso häp amel tä lep'akayej Cristo, alep'ajtitaywek yämlek ahäpe Dios Lewukwe tä laka Espíritu yen lew'eta.#1~Cor 3.16-17; 1~Ped 2.4-5
Currently Selected:
Ef 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.