Dan 10
10
Daniel lew'enek tä iwhäye p'ante tewok tä lhey Tigris
1Tä nichäte tres nekchämis tä Ciro iwo leniyatyajahi honhat tä Persia, wet iche p'ante m'ak tä Dios hin'ältej Daniel tä äp lhey Beltsasar. Häpe m'ak tä matche wet äp häpe m'ak tä atha. Mat Daniel wuj tä itetshan wet nech'e nitäfwelej m'ak tä häpe.
2Ifwalastso olham tä ohäpe Daniel ofwitajayaj ihi tres semanas. 3Wet ot'ekhit'a, olhäk akäjit'a, otufwit'a itshäwet wet n'am yäyej hat'es. Wet nemhit olhailejlhi pajtha noj tres semanas.
4Wet iwel'a tä ichun, häp ifwala tä veinticuatro, olham Daniel otkasitwhäye tewokitaj tä lhey Tigris. 5Wet tä oyahin kanhi, wet iwelkate tä ow'ene hin'o tä lew'uyis ipelas, wet lakawak tä inayhit lhamej häpe t'at oro tä ts'ilak. 6Wet hin'otso t'isan matche tä isi, wet tate'pe lhäy'e lhip tä isi, hätet iwoye lep. Wet tatelhoy mälhyej iwoye n'ochäkw, lak'ehen, wet takweyey lhäy'e takäläy wuj tä isiche, hätet iwoye bronce tä õ'lejlhi. Wet tä t'än, lepak äytaj, mälhyej iwoye wichi tä wuj lepakas.#Apoc 1.13-15
7Wet tajlhama olham Daniel tä õ'päyen n'oye ow'enek, wet hin'ol tä in'oyej hiw'enhiyet'a. Mat lhamel wuj tä lenowayhyaj ihi, wet inukwe alhoho tä lhaiskathen. 8Tä mälhyejtso, olham otefwaji tä omälhehchä tä oyahne m'ak tä n'äl. Wet wuj tä onowaye wet otte'pe w'enha lhamej, wet olät lhame tä nemhit okhajyhayaj ihi. 9Wet tä oläte lepak, wet otwelkayhen. 10Tä paj wet iche n'otkwey tä itsokn'o wet ineyhatphän'o, wet pajtha otihi honhat otkwech'ol lhäy'e okamchetey. 11Wet hin'otso yok:
–Daniel, Dios aihumin. Lhek nephä, ch'ahuye m'ak tä ofwel amho, tsi õ'chenn'o ame.
Wet otkasit t'at, otchettiyejche onowayhyaj. 12Wet hin'otso yok:
–Daniel, yej noway. Tsi tälhe tä nech'e alet'ayhatchä wet let'alhe Dios chik itäfwnhat amej m'ayhay tä atha, wet Dios iläte t'at alhyaj. Wet häp tä tamenej tä oho ame. 13Häp ángel tä niyatej Persia tatay n'ohlä veintiún ifwalas. Mat Miguel#Apoc 12.7 tä tafwaype ángeles tä lhamenya, lham iho n'oye wet tach'ot n'oye, tsi olham otefwaji tä oiyej niyatey tä reyes tä ihi häp Persia. 14Onäm, ohanhat amej m'ak tä ihiyeja aka wichi chik ifwalas tä tatay alhoho. Tsi haw'enektso hin'älit m'ak tä ihihila lewhäytso.
15Tä iwoyetso, wet olham Daniel oyahinchä, otsamajchä honhat wet nemhit okalhik otahuy. 16Tä mälhyej'attso, yokwet n'äl elh tä hin'o t'at. Wet tachumpe opästey wet nech'e oyachajo tä otahuy tä oyok:
–Iwuk, m'ak tä õ'päyen n'oye wuj tä äytajche wet hiw'en n'oho tä laj okhajyhayaja. 17¿Chip iwoye chik oyämlhi amho tä laj okhajyhayaja lhäy'e tä oyalh tatäy?
18Wet hin'otso yachajo tä tachum n'o'pe, yachaj n'oye okhajyhayaj. 19Wet yäm n'oye tä yok:
–Yej noway, atamsek ihi. Dios wuj tä aihumin. ¡Akhajyen, äm otle t'un!
Wet olham Daniel tä õyämlhi n'oho, wet olät lhame tä yachajo tä okhajyhayaj ihi. Wet oyok:
–¡Iwuk, ämlhi n'oho, tsi lenachaj n'oye okhajyhayaj!
20-21Wet nech'e hin'otso yäm n'oye, yok:
–¿Hä lehanej m'ak tä tamenej tä onäm ame? Tetshan, ofwel amho m'ak tä õ'lesayen p'ante tä ihi n'olhämet lehi tä häpe m'ak tä matche. Athana oyäpil yämthilek ottayhlä häp ángel tä niyatej Persia. Wet chik noj tä ottayhlä lham, wet nech'e nämla ángel tä tälho honhat tä Grecia. Wet tä ottayhlä lhameltso, ts'ilak Miguel tä tach'ot n'oye, häp ángel tä tach'ote wichi tä Israel lhayis.
Currently Selected:
Dan 10: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.