1~Juan 5
5
Y'akalhi honhat lakhajyhayaj
1Elh chik häpe chik t'ekhaye tä Jesús häpe N'ofwayhthi tä Dios Chenek, häpe t'at Dios leles elh. Wet elh chik ihumin hin'o tä leles ihi, ts'ilakhit'a elh tä n'ojcha tä ihumin, mat häte leles. 2Häp tä hätet iwoye, chik y'ahumin Dios wet y'awoye lhämtes, y'ahanej tä y'ahumnhen lham leles häte. 3Wet tä y'awoye lhämtes, y'an'älit tä y'ahumin t'at Dios.#Juan 14.15; 2~Juan 6 Wet lhämtes tek choyhat,#Deut 30.11; Mat 11.30 4tsi elh chik häpe tä Dios leles elh ikalhipej häp honhat lakhajyhayaj. Wet m'ak tä n'aisej yämthilek y'akalhi honhat lakhajyhayaj häpe t'at lhat'ekhahyaj. 5Tsi elh chik t'ekhaye Jesús wet imatitche tä häpe Dios Lhäs, ikalhi t'at m'ak tä tälhe honhat.
Häp lhamel tä yäm kalelhäj häpet Dios Lhäs
6Tä Jesucristo näm honhatena, täkwfwas n'otetnhay tä iyej. Häpe inät tä õ'bautisaynej lhäy'e lew'oyis tä nitsäyhchä yäk y'il. Ts'ilakhit'a inät, mat häte häp lew'oyis. Wet Espíritu tä Dios T'amajchet lham t'at tä yäm kalelhäj täjtso, wet Espíritu tä Dios T'amajchet häpe Elh tä matche. 7Tä mälhyejtso, tres lhamel tä yäme: 8häp Espíritu tä Dios T'amajchet, lhäy'e inät, lhäy'e lew'oyis. Wet lhamelna niwohit elh chik w'enha lhamej tä yäme. 9Y'akachuhit'a m'ak tä hin'ol yäme, mat häp m'ak tä Dios yäme lhäy'e lhip tä laha ihi, tsi lham yäme lham Lhäs.#Juan 5.37; 8.18 10Wet elh tä ichaye Dios Lhäs, itihi t'at lehusek häp Dios lhämettso. Mat elh tä ikachuye Dios, yen häpeya Dios tä w'et yämlhi t'at, tsi tek imatitche Dios lhämet tä yämeje Lhäs. 11Wet lhämetna yäme tä Dios hiw'en n'amhohen lhaw'atshancheyaj tä t'un, wet lhaw'atshancheyajna ihi t'at häp Lhäs. 12Wet häp tä elh tä Dios Lhäs iyej, häte lew'atshancheyajtso iyej t'at. Mat elh chik Dios Lhäs newayej, häte lew'atshancheyajtso ihiyejt'a.#Juan 3.36
N'ow'atshancheyaj tä t'un
13Ochen amehen olhämetna yämthilek lehanayej ihi tä i'amejen haw'atshancheyaj tä t'un, häp amel tä lechayaye häp Dios Lhäs.#Juan 20.31
14Wet lhafwawalhyaj ihihit'a tä y'ehi tä Dios tatache, tsi y'ahanej t'at chik y'at'alheje m'ayek tä yiwetej lham lenech'ethayaj, lham tach'ahu n'amehen. 15Wet tä y'ahanej tä tach'ahuye lhat'alhyajay, häte y'ahanej tä it n'amejen häp m'ak tä y'at'alheje.#Mat 7.7-11; Juan 15.7,16; 16.23-24; 1~Juan 3.21-22
16Elh chik häpe chik hiw'en lepuhfwa tä iwoye lech'isukyaj tä nich'atyayej yämthilek ilän lehusek, is chik iwo let'alhyaja'pe, wet Dios hiw'enhihola lew'atshancheyaj häp lepuhfwa - mat oyok, chik häpe n'och'isukyaj tä nich'atyayej. Tsi iche häp n'och'isukyaj tä hich'atej wet ilän t'at elh lehusek, wet n'och'isukyajtso oyok, isit'ak lewo alhyaja'pe. 17Nilhokej m'ak tä ni'isa tä õ'woye häpe n'och'isukyaj. Mat iche t'at n'och'isukyaj tä ilänhit'a hin'o lehusek.
18N'amel y'ahanej tä elh chik häpe tä yen Lajchaya Dios, ileyej lech'isukyaj, tsi Dios Lhäs Jesucristo häp tä t'uye wet ahättaj isakanhiyejt'a.
19Wet y'ahanej tä n'ahäpehen Dios leles, mat honhat imälhewek tä ichufwi ahättaj lakhajyhayaj.
20Häte y'ahanej tä Dios Lhäs nämte wet ifwoyenche lhahusey yämthilek y'antäfwelej Dios tä matche. Wet y'alhaip'ajtitwekej häp lham tä matche, wok oyok, y'ap'akej Lhäs Jesucristo. Lham häpe Dios tä matche wet äp n'ow'atshancheyaj tä t'un.#Juan 17.3
21Ilesas, amaj amejenlä häp n'ochufwenyajay tä kamatachehen.
Currently Selected:
1~Juan 5: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.