Salmos 91
91
Nocon Ifoan noco cushumisi
1Ifo Diosin nantifi finoncoian. Nanton ahuamamishti huatiro. Ascan ratora futsa a fu rafuaiton cushusharai ahuun nomuran shinanmasharai ahuara chacafoancai a ratutiroma.
2Un Ifo Diosihuunoa yoi isca huaquin, —Ifo Diosi uhuun Numamisi. Ua cushuanocai ahuara chacafo uqui nocotiroma. Uacai ahuusca huatiroma. Uhuun Ifo Diosi un icoinra huairan, —ishon un yoishquin.
3Futsafoan cunu muran noco pacumapai cafisca huai. Ascafia nocon Ifo Diosin nocon Numamisi non aton cunu muran pacunonma. Ascan pau curushcoinin noco namatirofia nocon Ifoan noco cushuaino nan pau curushcoinfiashon noco namaima.
4Tacaranun ahuun facufo ahuun putao nonanmanri cushua cuscan nocori nocon Ifoan cushua ahua chaca nocoqui nocononma. Non afu rafuashucai non ahuara chacaquin ratuima. Nococai raqui potayamafain noco cushua ahuara chacacai nocoqui nocotiroma noco chaca huamashquin.
5-6Ascan Ifo Diosin no fu rafuano yamu ahuara musucoinin noco ratumapai. Ascafiacai noco ahuaton ratumatiroma. Shafatari noco pianpaiyaifoanno nonricai ratutiroma. Faquish yafi ahuara chacacoin nan pau isincoinfoya ahuara futsa musucoinfoan noco ratumapaifiai nanfoquiricai non ratuima. Fari masafinin racano yorafo pau curushcoin fuchitirofiai nocon Ifo no fu icaino non ratutiroma.
7Ascan man icano mil yora nayamarai diez mil nafiatirocun ratuyamacahuun. Nocon Ifoan noco cushuanocai ahuara chaca nocoqui nocotiroma.
8Icon ahuara chacacai nocoqui nocotiroma. Asca nan ahuara chaca huamisifo nocon Ifoan ato onaitimaiton non ointiro.
9-10Nocon Diosicai tsoan finontiroma. Nantofin nantifi finoanquin. Man a fu rafuaino mato cushusharainocai maton pushu ano ahuara chaca nocotiroma.
11Nocon Ifo Diosin ahuun oinmatifo nan a fu nai muran icafo matoqui nichishquin mato cushunon. Man raquira futsa caiton mato cushushquin.
12Ascan man toquiriqui otisicaini man pacupaiyaiton nocon Ifo Diosin mato mutsoinifoantiro man pacunonma.
13Ascatari man masharoqui nocofiacai mato ahuusca huatiroma. Rono paupari man puamafiaitocai mato nasaima. Masharo uhuapari matoqui nocofiaquicai mato ahuusca huaima.
14Nocon Ifo Diosin yoiquin isca huani, —Nan ua noicoinyainfin un numatiroquin. Nanton yoimisi cuscan Diosin uhuun numamisiran ishon yoimisicun un numafain un cushushquin.
15Ua cunaiton un cumashquin. Ahuara chaca finoaintian un a fu iishquin. Un numafain un ahuunoa yoiquinshara huashquin.
16Un chai nimapacui isharanon. Ascatan un numashquin u fu nipanon, —ishon nocon Ifo Diosin yoini.
Currently Selected:
Salmos 91: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
