Salmos 119
119
Diosin yononi cuscahuunoa yoisharahuun
1Nan nocon Ifo Diosin ato yonoa cuscan huafain tsoan chaca huamisimafin fasi unimashquicaniquin.
2Ascan tsoan nan nocon Ifoan ahuun tsain yoia cuscan amisifin ahuun nomuran nocon Ifon onanpaifain a fu rafucain fasi unimashquiquin.
3Nanscarafoancai ahua chaca huamisifoma. Ascacun Ifoan ato iyopayiaiquiri fotirofo.
4Uhuun Ifon, min noco yononi cuscan non mia nicasharanon.
5Un fasi min tsain tanasharapai. Uncai shinanquin futsa futsa huapaima. Mia fusti un tanasharapai.
6Un ascara shinaincai un rafipaima. Min ua yonoa cuscan fusti un shinain.
7Min noco yononi cuscan fasi shara. Ascacun un nanfo tapishon uhuun nomuran un shinansharai minhuunoa yoiquin shara huashquin.
8Min ua yononi cuscan un aicai. Ua potayamapun.
9¿Ahuuscashomain pushcopan ahuun nomuran shinansharatiroquin ahua chaca huashquima? Min tsain yoia cuscan tanacoianshu pushco isharatiro.
10Uhuun Ifon, uhuun nomuranshon un mia fasi funai mi fu rafushquin. Ascacun ua cushupun min tsain un potanonma.
11Uhuun nomuranshon min tsain shara un nanua mia chaca huashquima.
18Ua cayacafi shinanmasharahuun min tsain shara un fasi tapisharanon.
89Ifon, min tsainfin ipanacaquin. Nan nai muran mi fu icafoan yoimisifo cuscan min tsaincai fianananpacunacama.
97Uhuun Ifon, min tsainfin un fasi noicoincain. Shafatisho min tsainhuunoasi un shinanfafaini.
98Min noco yononi cuscan min ua yoifafainni un nanscacoin huanon. Ascan nan min tsainhuunshon un tapia cuscacai ua noicasmaifoan tsoan tapiama.
103Un mua min tsain fata cuscara shara. Nan fona fata sharafia min tsaincaifin fasi fata sharacoin un muicai.
105Min tsainfin nan uhuun lampara cuscaraquin. Nanhuunshon faquishi muran un oinsharatiro min fai tanasharashquin.
130Ascan futsan min tsain tapisharashon futsafori tapima sharatiro ahuuscashumain non isharatiroquin. Tapisharamafoanri min tsain nicacaquin tapisharatirofo.
131Un fasi min tsain shara fuchipaicoin. Nan chashoanun nomicoinquin unu ayapai ashashaitiro cuscan nanscarifi ai min ua yonopaiyai cuscan un fasi nanscara shara un tapipai.
132Asca tsoan mia noicoiaifin min ahuun ramapaicai. Uhuunoari shinantan uhuun ramapaipun.
133Min tsainman ua iyosharahuu un mia tanasharanon chaca uhuun ifo inonma.
163Nan chanifofin un noicasmacoin. Uncai nan chanifohuunoa nicapaima. Ascan min tsain fustifin un fasi noicoinquin.
165Asca tsoan min tsain noiaifin nantofin ahuun nomuranshon chacafohuunoa shinainmaquin. Nanscara yoracai ahuara chacapan ato pacumatiroma.
176Nan chashoan funotiro cuscan urifi mun funoa. Uhuun Ifon, ua funapun un afanan mi fu inon. Min ua yonoa cuscan un ointiaquimamaquin.
Currently Selected:
Salmos 119: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
