Salmos 103
103
Nocon Ifohuunoa yoisharacahuun
1Uhuun nomuranshon un shinan isca huaquin, —Nocon Ifo Diosihuunoa yoisharahuu, —icashu un yoimua. Uhuun nomuranshon un yoia nan nocon Ifo Diosi fusti sharacoin. Tsoa futsacai a cuscarama.
2Uhuun nomuranshon un shinan isca huaquin, —Nocon Ifo Diosihuunoa yoisharahuun. Nanton nantifi ua shara huashoan cuscan ointiaquimayamahuun, —ishon uhuun nomuranshon un shinan.
3Un chaca hua cuscan nantifi Diosin ua rau hua afanan afohuunoa shinanonma. Un pau futsa futsatapafo fuchia cuscan nantifi Diosin ua caya huamisi.
4Un omitsiscapanacafo muran cacuana nanton ua numa. Nan u fu ishon ua noitan uhuun ramapaimisi.
5Nanton ua fasi ahuara ichapa sharafo ashomisi. Tutucai cuyacoin noyai atsanamisima. Nanscarifi aquin nocon Ifo Diosin ua afanan pushco cuscaran shara ima un atsananonma.
6Yora futsafoan chaca huaquin omitsiscamatirofo. Ascan nocon Ifo Diosicai ascarama. Nantofin noco cayacafi ashosharamisiquin.
7Nocon Ifo Diosin imisi cuscan Moisés tapimapaoni. Ascan ato asho sharamisi cuscan nan Israelifo tapimani.
8Nocon Ifo Diosin nocohuun ramapaicain noco shara huashomisi. Nancai nocoqui funa sinaima. Nocohuun noicai unupacunacama.
9Non chaca huai cuscacai noco yoipacunacama. Nocoquicai sinapacunacama.
10Non chaca huai cuscan noco onaintimapaiquin noco onaintimatiro. Ascafiacai noco asca huapaimisima.
11Noncai nai muran cuyacoin non finontiroma. Nanscarifi aquin non Ifo Diosihuunoa shinansharai nocohuun noiai cusca fasi shara finacaia.
12Fari oaiquiri chashainacahuatiro. Ascatan iquipacutiro. Afanancai noconantirofoma. Nanscarifi ai nocon chaca noco soashonano afanan nocon chaca no fu ipanacama.
13Apan ahuun facuhuun ramapaiquin shinansharatiro cuscan. Nanscarifi ai tsoan Ifo Dioshuunoa yoisharamisifin nocon Ifon Diosiri atohuun ramapaiquin.
14Nan nocon Ifo Diosifin tapiaquin noco maihuunoa onihuani cuscan. Ascashu nocohuun ramapai.
15Nonfin nan fasi yafi charo cuscaraquin. Nanfo samamashta tsasitiro. Nanscarifi ai norifi non samamashta natiro.
16Fasi yafi charo tsasicun fuu foanquin yamarisca huatatiro. Nanscarifi ai non nai yamariscatatiro.
17-18Asca tsoan nocon Ifohuunoa shinansharamisifin atohuuncai noiquin unupacunacama. Aton facufo yafi aton funafori ato yoiyoni cuscan huafain ato yononi cuscari huaifoan ato numashquin nanfo a fu nipanonfo.
19Nocon Ifon Diosin nai muran icaton nantifi iquina. Nannoshon nantifi nai muran icafo non mai ano icafori nantofin aton niaifocoinshon ato yonoaquin.
20Manfin Diospan oinmatifoquin man a fu nai muran imisi manfin mutsisipacoinquin. Mato yoimisi cuscan man amisi. Maton Ifohuunoa yoisharacahuun.
21Nan man a fu nai muran icafoti manrifi ahuun oinmatifo. Mato yoia cuscan man amisi. Marifi ahuunoa yoisharacahuun.
22Nantifi nocon Ifo Diosin oni huafoti ahuunoa yoisharacahuun. Unrifi un ahuunoa yoisharaiquin.
Currently Selected:
Salmos 103: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
