Deuteronomio 1
1
Nocon Ifo Diosin Israelifo yononi cuscan Horeb mai anoashu fotanonfo
1Tsoa istaipama unu Jordán fari oaiquiri Israelifo icafo ini. Nan mai unu Jordán ocuma futsa ahuun anu Arabá ini. Nannoshon Moisés ahuun yora Israelifo yoini cusca nicanifo. Nan pushu rasi ato chaima icafo. Zuf non Parán non Tofel non Labán non Hazerot non Dizahab. Nan ato nushmancayan Israelifo icafo ini. 2Machi Horeb anoashu fai nan machi Seirhuuri cai once dia oshatan Cades-barnea ano nocotiro ini.
3-5Moisés ato iyoaitian Israelifoan Amorreofo aton niaifo Sehón Hesbón anoa ato rutunifo. Basánfoan aton niaifo Og nan pushu rasi Astarot ano ica ini. Ascano nan mai anuni Edreiran huani. Israelifo Egipcio mai anoashu funifotian cuarenta fari non tau rafu non tau foshca fusti oshu finoanno unu Jordán fari oaiquiri Moab mai chaimashta inifo. Nantianri nantifi nan cuarenta fari finoanfo cusca nocon Ifo Diosin ato yononi cusca Moisés ahuun caifo Israelifo shinanmani isca huaquin,
6Machi Horeb anoshon nocon Ifo Diosin noco yoini isca huaquin, —Na machi ano man iyomisi chain. Natian afanan nuno iyamacahuu. 7Natian maton pano pushufoya fotacahuun Amorreofo nan machifoanno icafo ari fotacahuun. Mai futsan ahuun anu Arabá ano fofain nan ato chaima icafoanri aton mai ari fofain Néguev mai ari fofain unu cusumunri fofain Cananeofo icari fofain Líbano ano fofain nan chai unu Eufrates ari fotacahuun.
8Unfin na maitio mato inaincai matona inon. Ascacun natian nanno icahuun futsafo nannoshon potacahuun matona inon. Un maton shunifo Abraham non Isaac non Jacob aton funafori inanni. Ascano natianri matona iishquiran, —ishon nocon Ifo Diosin noco yoini.
9-10Nantian un mato yoini isca huaquin, —Nocon Ifo Diosin mato ichapacoin cainmani. Tsoancai fishifo tanan huatioma. Nanscarifiaquin matoricai tsoan mato tanan huatiroma. Ascano urus fusticai un mato niaifo itiroma mato yonoshquin. 11Nocon shunifoan aton Ifo Diosifin nocon Ifo Diosiriquin. Aafin yoiyoni cusca mato shara huapainon mato afanan facufo non mato funafori ichapacoin inanpainon. 12¿Ascafiacai man fochishmanantanainno non nannorisi shinanyamaino ahuuscashomun urus fusti Diosin mato yoipaiyai cusca un yoitiroquin? 13Natianfin man manifoti maton muran icafoquin nocofunufo mapo sharayafo shinansharafain futsafoan atohuunoa shinansharafo nanscarafo catoncahuun. Man nanscaiton un ato yonotiro maton niaifofo inonfo, ishon un mato yoini.
14Ascaiton man ua cumani isca huaquin, “Ai. Min noco yoia cusca shara. Non futsafo catontiro nocon niaifo patasharinoafo inonfo,” ishon man ua cumani.
15Ascan man catonni cusca un manifoti nocofunu sharafo nan mapo sharayafo non atohuunoa shinansharamisifo un ato yononi maton niaifofo inonfo mato iquinonfo. Futsafoan mil yora iquinainno futsafoan cien yora iquinainno futsafoan cincuenta yora iquinainno futsafoan mucu rafuti yora iquintiro aton niaifo iishquin.
16Un ato yoini. “Natian mato manifoti man aton niaifofo iishquin. Futsafo fu fochishmanantanainton ato nicacahuun yoiaifo cusca man ato yoitiro ratofoanmain cayacafi shinaincai. Israelifoan nannorisi shinainma iyamaraimain Israeli yafi caifo futsa fochishmanantanaincai ato nicasharacahuun ato cayacafi yoishquin afanan fochishmanantanonfoma. 17Niaifo ahuara ichapaya fusti nicayamacahuun. Nocofunu ahuuomafori nicasharacahuun. Nocofunuqui ratuyamacahuun. Diosin mato tapimatiro ratotomain cayacafi yoicain min ato cumasharanon afanan fochishmanantananonfoma. Ascafia futsafo mato yoiai cusca man tapiamaquin ua yoihuun un ato cayacafi yoinon,” ishon un mato yoini.
18Nantian man atiro cusca un nantifi mato yoini.
Doce nocofunufo Moisés mai futsari ato nichini nan icafo cuscan tapishcaquin
19Ascan nocon Ifo Diosin noco yononi cusca non Horeb anoashu cani machi Amorreofo icafoanno non noconon. Nan mai fasi chaca ano tsoa istaipama ano finonfainni cai Cades ano noconi. Man man oinni. 20Non nocoaitian un mato yoini isca huaquin, “Man non nan machifo Amorreofoan aton mai ano nocoa. Nan mai nocon Ifo Diosin noco inan. 21Ascacun nocon Ifo Diosin noco inaintian ‘Nanri fotacahuun na mai shara fiishcaquin,’ ishon nocon Ifoan noco yononi. Ratuyamacahuun. Maton nomuran shinanchacayamacahuun,” ishon un mato yoini. 22Ascafia man ua cumani isca huaquin, “Iquisi non nocofunufo nan mai shara ari nichiyonon. Nan mai ariashu nocotan noco tapimanonfo rato fai sharapamain non catiroquin noco sharashquin. Rato pushu rasi anomain non nocotiroquin,” ishon ua man yoini.
23Man ua yoini cusca nicain un shinan shara itiro. Ascacun un doce nocofunufo catonni. Nocon yora nan doce mani futsafoti nocofunu fusti catonpacunonfo nan mai ari nichishquin. 24Ascatan focani machifo finonfaincani machifo nushmancayan ahuun anu Escol ano noconifo. Ascashon nanno oinnifo ahuu cuscaramainquin. 25Oianfo nanno fimi sharafo ichaparasi ini. Ascashon nan nasoaifotian atiri fimifo noco fushonifo noco ismashquin. Ascatan yoinifo isca huaquin, “Na mai nocon Ifo Diosin noco inain sharacoinran,” ishon noco yoinifo. 26Nannori noco yoifiacatan nocon Ifo Diosin mato yononi cuscacai man huapaima. Man ari focasmai. 27Maton pano pushu muranshon man tsain chaca huafain man tsain chipuni isca huaquin, “Nocon Ifo Diosin noco noicasmai. ¿Ahuuscai Egipcio mai arishon noco nuno ihuuamun Amorreofoan noco rutunon? 28Nocon yorafo na mai anoashu nocoqui chaninifo cusca noco ratumanifo. Noco yoiquin isca huanifo, ‘Nan mai ano icafo fasi cuya masoafo mutsisipacoinfo. Noncai ato finontiroma. Aton pushu rasi cunu cuyacoin tarati huaafo. Nannori Anac ahuun funafo yora tsoan oinyomisima uhuapacoinfori man non oianran,’ ishon noco yoinifo. Nocon yora nan mucu rafutifain nannori noco yoiquin noco ratumanifo. ¿Ascacun ahuuscaimun non ari catiroquin?” ishon man ua yoini.
29Un nannori nicaquin un mato cumani isca huaquin, “Ratuyamacahuun. 30Non caitian nocon Ifo Diosin noco rucu cashoicai. Nantonfin yora futsafo nan mai shara anoshon noco caimashotiroquin ato cuyoshquin. Egipciofohuunoa man oinni cusca nanscarifiai na mai shara anoshori noco ahuamamishti huashoshquin nan yora futsafoan noco ahuusca huanonfoma. 31Man man oinmisi tsoa istaipama ano nocon Ifo Diosin noco cushusharamisi. Nan apan ahuun facu ahuara chaca finononma iyotiro cusca huaquin nanscarifi huaquin nocon Ifo Diosin noco ihuushara non ahua chaca finononma. Nanscacun natian noco nuno ihuuaran,” ishon un mato yoini. 32Nocon Ifo Diosin noco cushusharamisi cusca un mato yoi sharafiacai man nocon Ifo Diosi icoinra huanima. 33Non Egipcio mai ariashu oaitian Diosin noco cushusharafain yamutifi noco rusoatori chii urumanhuan nai muranshon noco isma nan noco fu caiton non tapifain noco iyoaiquiri non rani nituimainquin chii urumanhuanun noco tapimani. Ascan shafatifiri naicoinmanhuan noco rusoatori camisi. Nan nai coinmanhuanhuunshon noco oinmashara non raqui caimancai noco tapimafain ranimain non nituincain noco tapimani.
Nocon Ifo Diosin Israelifoqui sinani
34Ascan man tsain chaca huafain tsain chipua cusca nocon Ifo Diosin nicain matoqui sinai ahuun tsaincai fianananpacunacama. Ascatan yoiquin isca huani, 35“Manfin yora chacacoinfoquin. Man ua nicacasmamisi. Ascan maton shunifo un yoini cusca na mai shara un ato inannocai mancai na mai shara ano man iquipacunacama. Man foanfafainnisi nai cuyoshquin. 36Ascafia nan Jefone facu Caleb fusti iquitiro. Nantofin ua nica sharamisiquin. Ascashu arus fusti iquitiro. Naanfin nan mai oian cusca un inaincai ahuuna non ahuun funafonari inon,” ishon nocon Ifo Diosin yoini.
37Matohuunoashu nocon Ifo Diosin uquiri sinaquin. Ua yoini isca huaquin, “Minricai na mai shara ano iquitiroma. 38Min nanno iquitamarocon mia ashomisi cusca nan Nunpan ahuun facu Josué nan mai shara ano iishquiquin. Nantofin maton caifo iyoshquiquin nan mai shara fiishcaquin atona inon. Ascacun ahuun nomuran unimamahuun. Josué tsain shara yoihuu min caifo Israelifo iyoaitian ratuquima ua icoinra huashquinon,” ishon Ifo Diosin ua yoini. 39Ascano afanan nocon Ifo Diosin mato yoini isca huaquin, “Man yoini maton facufo yafi maton ainfofo futsafoan ihuishquicani aton yonomati inonfo. Nannori man yoifiacai maton facu yomumishtifoan tapiataima ahuara shara iyamarai chaca. Nanfofin na mai shara ano iishquicaniquin. Un mato na mai shara ano iquimatamarocon maton facufo un ato iquimashquin atona inon. 40Manfin natian unuhuan oshin fai ari tsoa istaipama anoashu nasofaitacahuun,” ishon nocon Ifo Diosin noco yoini.
Israelifoan amaquiri shinainfoan Amorreofo futan Cananeofoan atirifi rutufain atirifi ato ichonifo
41Nannori nicatan man ua cumani isca huaquin, “Man nonfin Diosi chaca huaquin. Ascafia nocon Ifo Diosin noco yononi cusca natian non aashquicai. Nonfin nan mai ari caicain yora futsafo rutushquin,” ishon man yoini. Maton ashi tsomashon man shinanni samamashta nan yorafo machifo ano icafo man ato rututiro. 42Man ascafiaiton nocon Ifo Diosin ua yoini isca huaquin, “Min caifofo yoihuu ari fononfoma. Uncai ato fu caima. Ascacun mancai nan yora futsafo rutuqui finoanmarocon nan maton noicasmaifoan ato rutushquicaniran,” ishon ua yoini.
43Nan Diosin ua yoini cusca un mato tapimafiaiton man ua nicacasmamisi. Diosin mato yononi cuscari man nicacasmai man shinan manfin caifo futsafo man finontiro. Nanscara shinancatan machifo ano man foni. 44Ascano nan Amorreofo machi ano icafo matoqui fuafo. Nan fina ichapaton noyafuran yora tucatiro cuscai nanscarifi ai Amorreofo matoqui fuafo. Seir mai anoshon fasi chaicoin Horma mai ano mato ichonifo. Atirifi mato rutunifo. 45Ascano man nasoatian nocon Ifo Diosi man uaishofiaintocai mato nicapainima. 46Ascashu man Cades mai ano iyopaoni.
Currently Selected:
Deuteronomio 1: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
