1 Samuel 24
24
David Saúl rutupaiquin rutu cuanafiashon rutupainima
1Ascan Saúl Filisteofo rahuinfainni ichoicai ahuun pushu ano noconi. Nocoshon nican David tsoa istaipama ano ahuun anu En-gadi ano cani. 2Cashon nica Saúl tres mil ranushumuafo catonni a futan David funai fononfo. Cabrafo tsoan ifoyayamafiashu toquirifo ano foafafainnaifoanno Saúl fu fonifo David funai focani. 3Ascan nan fai cusumunri chashoanfo icafo ano Saúl mahua quini muran iquini ano poishquin. Tapinima nan mahua quini muran David yafi a fu rafuafo a muran onufiacun. 4Ascan David fu rafuafoan fashushu yoinifo,
—Natian min Saúl rututiro mia afanan fucash huanonma. Na shafatan nocon Ifo Diosin mia yoia isca huaquin, “Un Saúl miqui nichishquin min apaiyai cuscan min huanon,” —ishon ahuun yorafo David yoini. Ascaino funaiquimashta acachori mushofusho tsoan nicayamaino David Saúl ahuun sahuuti uhuapamashta cunotinin shatuni.
5Asca huatan David ahuun nomuran shinanni, —¡Ohua! Un aca cuscacai sharama. Nocon Ifo Diosin Saúl catonni. Ascan noco yononi cuscan non nocon niaifo chaca huatiroma. Ascafia ahuun sahuuti uhuapamashta un shatua, —ishon ahuun nomuran shinanni. 6Ascan David a fu rafuafo yoini isca huaquin,
—Nocon Ifo Diosin man tapia un Saúl ahuun sahuuti shatuama shara icuana. Nocon Ifo Diosin Saúl catonni. Afin uhuun niaifoquin. 7Ascan man shinain cuscan afanan nocon niaifo rutupaitama muyamacahuun, —ishon David ato yoini.
Asca huatan Saúl quini murannoashu caincainaino 8Samamashta arifi quini murannoashu cani David Saúl cunani. —¡Uhuun niaifon, minfin uhuun niaifoquin! —ishon cunani. Ascaiton Saúl ifiacucahuan oian David maiqui fuohua ini. 9Ascashon David yoini,
—¿Ahuuscai min yorafo icoinra huaimun un mia chaca huapaiyai? ishon uhuunoa yoiafo. 10Minfin ointiroquin un mia rutupaiquin mia rutu cuana. Na ramashta quini murannoa nocon Ifo Diosin yonoa cuscan min tapiyamaino un nannoa mia oian. Mia chaca huapaiquin un mia acuana. Uhuun yora futsafoan ua yoia, “Rutuhuun,” ua huafiaifoanno un mia ahuusca huapaiquima. Un ato cumaquin isca hua, “Nocon Ifo Diosin Saúl catonnicun uhuun niaifo un mupacunacamaran,” ishon un ato yoia. 11¡Oinpo raisi! Min sahuuti uhuapamashta un shatua. Un min sahuuti shatufiashon un mia rutuama. Natian min tapitiro un mihuunoa ahua chaca huama. Min tapitirori un tsoa yoimisima, “Nocon niaifo non chaca huanon,” ishon un yoimisima. Ascafiacun min ua funariai ua rutupaiquin. 12Nocon Ifo Diosin tapian un mia chaca hua iyamaraimain min ua chaca huamisiquin. Mian chaca huahuunshon nocon Ifo Diosin mia onaintimatiro uncai mia ahuusca huanacama. 13Nocon shunifoan yoimisifo isca huaquin, “Yora chacafoan chaca huatiroforan,” ishon yoinifo. Ascan uncai mia ahuusca huanacama. 14¿Ahuuscai min Israelifoan niaifofiashon ua rutupaifafainnimun? Uncai ahuama. Pashna nacai ahua itiroma. Nanscarifiai iacai ahuama. Urificai ahuama. ¿Ahuuscai min ua funariai shafa finonmatanma ua rutupaiquin? 15Ascan nocon Ifo Diosin tapian min cayacafi shinanyamarai uncai mihuunoa chaca huama. Tsoan chaca huacun nocon Ifo Diosin onaintimatiro. Aafin uhuun numamisiquin. Ua numatiro mian rutunonma, —ishon David yoini.
16Nannori nicatan Saúl cumani isca huaquin,
—¿Uhuun facushta, David, nan minmun? —ishon yocatan Saúl fasi uaini. 17Ascan afanan Saúl yoini,
—Min sharafiano uncai sharama. Mian shara huafiaino un mia chaca hua. 18Icon na shafata mian fasi shara hua. Nocon Ifo Diosin ua na quini muran nichia mian rutupaiquin rutu cuanafiashon mian rutuama. 19Tsoa futsacai mia cuscarama. Un mia chaca huamisi cuscan un futsa noicasmaquin un chaca huacun ua rutupaiquin ua rutu cuana. Ascan mincai futsa cuscarama. Mian ahuusca huama. Min ua shara huahuunshon nocon Ifo Diosin miari shara huapainon. 20Ascan natian mun tapian min chipo nocon caifo Israelifoan nocon niaifo iishquin. Min nocon niaifo icaino nantifi isharashcani. 21Ascan nocon Ifo Dioshuunshon ua yoihuun min niaifoaitian min uhuun yorafo non uhuun funafo min ato rutuqui cuyoshquimaran, —ishon Saúl yoini.
22Nannori nicatan David cumani isca huaquin, —Mian yoia cuscan nocon Ifo Diosin noco nicaino un min yorafo non min funafo rutushquimaran, —ishon yoini. Ascan Saúl ahuun pushu ano nasotan David yafi a fu rafuafoya nan aton cushuti ano fonifo.
Currently Selected:
1 Samuel 24: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
