1 Samuel 1
1
Nocon Ifo Diosin ainfo ahuun anu Ana facu inanni
1Nantian nocofunun ipaoni ahuun anu Elcana machifo Efraín nan pushu rasi ahuun anu Ramá ano ica ini. Nan Elcana apa Jeroham ahuun shota Eliú. Nan Eliú apa Tohu. Nanton apa Zuf ini. 2Elcana ahuin rafuya ini. Aton anu rafu Ana yafi Penina. Nan Penina facuya ini. Ascano Ana toosma ini. 3Nan faritifi Elcana pushu rasi ahuun anu Silo ano capaoni. Nannoshon nocon Ifo Diosin ahuamamishti huatiro cuscan cufinfain ahuara Diosi inain cuscan. Nanno Silo ano Elí furun rafu Ofni yafi Finees aton caifohuunoa nocon Ifo Diosi cufinmisifo ini. Elí arifi ahuun caifo Israelifohuunoa nocon Ifo Diosi cufimisi ini.
4Ascano nocon Ifo Diosin yononi cuscan Elcana nocon Ifo Diosi nami inaintian ahuun ahuin Penina non furunfo non ainfacufori inanni. 5Nan ahuin futsa Ana Diosin yononi cuscan toosma. Elcana fasi ahuun noicoinquin nami paratama inanni. 6Ascano nan ahuin futsan Penina fasi Ana cashumutsama huapaoni. Yoiqui isca huapaoni, —¡Aicho! Unfin facuyaquin mincai facuyamaran, —ishon fasi cashumutsama huaquin fucash huapaoni. Ahuun no muran fasi shinanchacamapaoni.
7Faritifi nansca huapaoni. Ana ahuun funu fu Diosin ichananti pushu ano caiton ahuin futsan Penina aqui cashu mutsamapaoni. Aqui nanscaiton oinquicai Anapan uaiqui piinima. 8Ascaiton oinquin funun Elcana yocani, —¿Manshtan, ahuuscai uaiqui min piamamun? ¿Ahuuscai min shinanchacaimun? Un fasi minhuun noi. Asca un mia noiyai cuscan fasi shara. Non mucu rafuti facuyafiashon un mia noiyamaino nancai min ahuama, —ishon Elcana ahuin yoini.
9Ascano fari futsa Silo anoshon piquin unutan Ana funicaini Diosin tsainti pushu ano cani Diosi cufinshquin. Ascano nanno ahuun caifohuunoa nocon Ifo Diosi cufinmisi. Nan Elí Diosi cufinmisiton arifi nanno ichananti pushu shoi caincaiti ano tsaoshon oinni. 10Ascano Ana nocon Ifo Diosi cufiaintian ahuun nomuran fasi uaicoinni. 11Nan cufiaintian Anapan nocon Ifo Diosi yoini isca huaquin, —Ifo Diosin, min ahuamamishti huatiro. Unfin min oinmatiquin. Un omitsiscai cuscan ua shinanhuun. Ua furonanfacu inanpun. Mian furonanfacu inainton un chipo mia inanshquin mina inon. Nan niyoatian uhuun facu min oinmati ishquin. Ascacun nanfin mina ishquiquin ahuun foocai tustupacunacamaran, —ishon Anapan nocon Ifo Diosi cufinni.
12Anapan ahuun nomuranshon cufiainton Elí ahuun ashfa oinni. 13Ahuun ashfa nan tsainqui cufancufan ifiaitocai ahuun oi nicanima. Ahuun nomuranshon nocon Ifo Diosi cufinni. Ascan Elí shinanni —Na ainfo pauinran, —ishon shinanni. 14Ascaiton Elí Ana yoini,
—¿Ahuuscai min nuno pauin oamun? Min fimi unu paun potahuun, —ishon yoini.
15Ascaiton Anapan cumani, —Niaifo, uncai pauinma. Unfin fasi shinancoinquin. Nan un shinain cuscan un nocon Ifo Diosi yoia. 16Uhuunoa shinanchacayamahuu. Uncaiyainfo chacama. Uhuun nomuran un fasi omitsiscai cuscan un nunoshon nocon Ifo Diosi cufin oaran, —ishon yoini.
17Ascaiton Elí cumani isca huaquin, —Ascacun afanan shinanchacayamahuu. Min Israelifoan Diosi cufian cuscan mia ashopainonran, —ishon Elí yoini.
18Nannori yoiaiton nicatan Anapan Elí cumani isca huaquin, —¡Aicho! Mian cumashararan, —ishon yoitan cashon piini. Afanancai Anapan shinanchacanima. 19-20Ascan iyoconaino nocon Ifo Diosi cufinnifo. Cufinqui unutan Elcana ahuun yorafoya aton pushu Ramá ano nasonifo. Nocotan Elcana Ana fu oshani. Ascano man facu nanua ini. Taui furonanfacu cainni. Ascashon Anapan yoini isca huaquin, —Un nocon Ifo Diosi cufian cuscan ua furonanfacu inan. Ascacun ahuun anu Samuel iishquinran, —ishon yoini.
21Ascano chipo Elcana ahuun yorafoya afanan Silo ano cani nocon Ifo Diosi ina inanfain a yoia cuscan huaashquin. 22Ascafiacai nan ahuin Anacai a fu canima. Yoiquin isca huani,
—Manshtan, un natian mi fu cayoicaima. Nan nocon facu shoma unuaitian un mi fu cashquin nocon Ifo Diosi un noco facu inanfin a fu ipanacaquin, —ishon yoini.
23Nannori nicatan Elcana cumani, —Min shinain cuscan min atiro. Ascacun nituyohuun afanan nocon facu shoma ayamaino nocon Ifo Diosi mia yoia cuscan mia ashopainonran, —ishon yoini.
Ascano Ana ahuun pushu ano nituyoni ahuun facu shoma ayoaitian. 24Ascano nan ahuun facun afanan shoma ayamaino ichananti pushu ano nan nocon Ifo Diosi cufimisifo ano furun iyoni. Moi funu ahuun fari rafu non fustiya iyofain harina veintidós litro fofain fimi unu fichi tutso muran foni. 25Ascashon moi funu rutushon Diosi inanquin unutan ahuun facu Elíqui iyonifo. 26-27Ascano Anapan yoini,
—¿Niaifon Elí, mian shinainmamun? ¿Man mianmun ointiaquimana? Unfin icon mia yoicain. Fari futsa min nuno ica ini. Urifi un nuno mia chaimashta ishon nocon Ifo Diosi cufini. Un nocon Ifo Diosi cufini cuscan ua na facu inan. 28Ascano un natian nocon Ifo Diosin uhuun facu inain niyoatian ahuun oinmati inonran, —ishon yoini. Nan nicatan Elí Upa Diosi cufini.
Currently Selected:
1 Samuel 1: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
