Nuumero 25
25
Israel pueya jatasacari jeecojosano Baalcuara na jacamatunura
1Israel pueya jaara Sitim jiyanishanojinia quitiushiiquiaari, canuuri Pueyaso nojori pueretasano taatujuri Moabita rucuajeejoquiaari saaja. 2Taatujuriiri naacua Israel pueya masuunujujua, canuu cojiniuria nojori jeecojosano na pueyasora seya nojori puecoosacari. Naa Israel pueya cojiniuucua taatujuritij, nojoriiri jeecojosano casaacuara taatujuri puecootesano juyaca miaquenuujua. Nojoriiri cuno jeecojosano casaacuara jacamatujua cuno casaa nojori timitianura juhua Pueyasojua. 3Israel pueyari naa tama sacuaraatia jiitiquioquiaarijiaaja cuno Baal-peorcuara na jacamatunura. Pueyasoori naacua Israel pueya juaatiaja jiyanohuatej. 4Pueyasoori naacua naa Moisees sequereequij:
—Puetunu Israel pueya jiyaniijianucuajanaa quia rerejotere. Canapueteja sacuaraatia miiriucuaani, nojori cuaara puecoosaaria puetunu pueya niquiarajanaa. Israel pueya cua juaatianucua quenaaja naacua shinitiaretej.
5Moiseesri jiyacari naacua puetunu Israel doce maanujinijinio nequesoreenaajanaa seerataree. Naa nojori sequereeri:
—Niajaniya nia maanu nequesoreenaani, puetunu niajaniyajanaa cuaara tama nia maanujinijinio pueyajaaja puecoora teyonu pojoritiucuaja Baal-peorcuara jacamatujuacara jatarucuaa juhua Pueyasoocuarajani.
6Jiyacaritij, Moisees niquiaraja, puetunu narta Israel pueya niquiarajajuhuaj, niquiriyatu Israel pueyanoori saaja jiyacari na suhuortujiniara canujuteyarohua Madiaanjinijinio taatu. Narta pueyari jiyacari nujuqueturiquiaacuaa Pueyaso secojojua suhuortu tohuateyaji. 7Fineesri Eleazar niyanu. Eleazarri supuetana Aaroon niyanu. Finees jaara narta pueyano niquiquiaari naa cuno taatu canujuteyanotej, narta pueya rerejosaquiji tohuataqueeri. Nojuajaari narta pueyano nuhuajitiamaa na cashana. 8Tariucua nitiootaca na sohuacamara najuhuamacurtiasee narta pueyano cuno taatutajaari. Naa cuno pueyano mosaanuucua na taatutajatej, quenaaja naacua pueyajequiaariiri jiyacari pueyapue puequetasano cuno ritia pacujua cusonu. 9Naajaa, veinticuatro mil pueyari jiyacari tari puequetaquiaari cuno ritia pacujua cusonu.
10Naacuatej, Pueyasoori jiyacari naa Moisees sequereequij:
11—Fineescuajaari maninia miirii naa na puecoonuucua cuno sacuaraatia miijiacatej. Cua juaaquiaca shiniajareeri. Naatej taa cua juaariquiaacuaani, nojuajaari jiyanohua juaariquiaajuhuaj nio Israel pueya miiniuucua sacuaraatia. Janiyari naacua cua juaaquiaca rejetereeni maja cua puecoonura puetunu nojorijianaa. 12Naarate, Finees quiria quia numootere. Janiyari pueyaracaanu maninia na miijioriquianoni. 13Naa maninia na miiniuucua quiriatej, janiyari naacua quiarijia nojuajanaa jiyateya pueyacuara secojona na quiniuria pueyaracaanurani. Nocuajinio caneno pueyari naa pueyaracaanu pueyacuara secojonaa quiriquianojuhuaj. Fineescuajaari cua seera juaariquiaa. Naacuatej nojuajaari cua jiyanootiriucuaa sesa miijiaca narta Israel pueya.
16Pueyasoori jiyacari Moisees sequereequij:
17—Nio Madiaan taucuaca nia tiuquitiare. Puetunu nojorijianaa nia miaquejore. 18Nojoriiri sacuaraatia nia miitiriucuaa na sapojonuta, Baal-peorcuara nia jacamatunura juhua cucuaraja. Naajuhuaj, nojoriiri sesa nia miitiriucuaa cuno Cozbi jiyanishano taatuta, noo Madianita camarnu niyatutej. Cuno taatucuajaari najuhuamacurtiasano pueya puequetasacari ritia pacujua cusonu. Janiyari naa pueya cusojuanuunoni, casaara nojori jataquiaari Baal-peorcuara jacamatujuacaracuajani.
Currently Selected:
Nuumero 25: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
