Nuumero 24
24
1Balaamcuajaari niishiriquiaa, Pueyasoori naa na Israel pueya na maniniuhuaqueejotanuucua na miijiosano timitiariquiaa. Naacuatej, Balaamri maja tari na quianu quiquiaari Pueyasota na naacuneetoonuucua Pueyaso sequenura nojuaja na maniniuhuaqueetasocoriquiano Balac niquiara. Balaamri na nujuasaquijijia jiyacari cariiquia jiyajiniara jiriquioree. 2Supuetana Israel doce niquiohuacuajinio caneno pueya suhuortucua niquiriiri. Nojori doce maapue suhuortucuaari maninia niartasano quiriquiaa taa nojori rootasaaquiaaricuajanij. Pueyaso Sohuanuuri jiyacari Balaam jiuujiajinia tiuquiquiaari Pueyaso panishano na caminiujiuniuria Balac niquiara. 3Balaamri naacua Pueyaso sequenu panishano coteeree caminiujiuniu:
“Nioori Beor niyanu Balaam sequesano. Janiyari coojiajinia pueyano niishiriojosano niishijiani. Janiyari niquishoo casaa niquijia maatiani. 4Pueyaso jaara cua tojetere juhua cua maquenujiniaja na niquitiniuria casaa, janiyari naacua pueya niishishoo casaa niishiquiaa socuani. Naajuhuaj, Pueyasoori pueyarano na sequenu panishano cua toquiaa. Janiyari cua maquenujinia casaa niquitishaaquiaajaniuhuaj. Puetunu cunojuanaari puetunu cumaacaracajanaa quijiajuhuanaja Pueyaso niquitishano janiya. 5¡Jacob niquiohuacuajinio caneno pueyanaa, casaa maniniu nia suhuortucua! ¡Shanohua niquishanoori nia suhuortucua cari, Israelcuajinio caneno pueyanaa! 6Nia suhuortucuaari shanohua shuquijiaya juhua sacamueenacaja. Niaari naacua juhua moo shuriucua na shuucuacarano natoosano nataacuacaja. Niaari juhua Pueyaso aloe jiyanishano nataacuacajuhuaj. ¡Niaari Pueyasora juhua moo shuriucua nujuaja suruhuatujua! 7Israel pueyari queraatia mohuaca jiitiariquiano na raruusocoriquiano. Queraatia mohuaca jiitiariquianojaariuhuaj nojori nataacuaca na shiijiotajara. Nojori camarnuuri na cumaaca tojitioriquiano taucuaca Amalec camarnu Agag. Na sequesanoori puetunu jiyacajiniajanaa tojishaariquiano. 8Pueyasoori na pueya jaatiano Egipto jiyajinijini, nojuajaari naacua na pueyacuaji tacuquiaa. Nojuajaari tojetaarucuajanaa nujuatasoo juhua nacajaaraca buufaloja. Israel pueyari na paraa puecojoriquiano na jiyacajiniji. Nojoriiri na paraa nucuhua shuniitiariquiano. Na paraacua tohuariquiitijioriquiano na cashijaariuhuaj. 9Israel pueya jaara na samaatenura pojocore, nojoriiri juhua juurunu sareja. Na pueresaanuucua, majaari quenaaja niquiriyatu pueyano quiniu na niucuajariquiano. ¡Maninia rupaajinia na maniniuhuaqueetajacaari maninia miishaariquiano! ¡Na shimiojonaa saniniuujia, nojoriiri shimiojosaariquianojuhuaj!”
Balaam caminiujiushacari Pueyaso sequenu panishano
10Naa Balac tojishacari Balaam maniniuhuaqueenutej, Balaam juaarii jiyanohuari. Na juaashiquia na piquiniutia naa Balaam sequereeri:
—Janiyari quia jiiquiooterucuaani quiria quia shimiojonura cua paraa. Quiaari saa maninia rupaajiniaja na maniniuhuaqueetaree. Quiaari tari jiuujianraca pacutejoree naa maninia rupaajinia na maniniuhuaqueetanutej. 11¡Quia tiajinia quia riujiuuriohua juhuari! Janiyari juucua quia panitiarucuaa nareja niquitiojonu queraatia casaa maniniuni quiaa jaara cua paraa shimiojore quiria. Pueyasocuajaari saa quia tenujureejaa, maja naa quia miiniuria.
12Balaamri saa na riucuareejaa:
—Janiyacuajaari cucua quia jiyaramiquishano pueya sequerucuaa maatiani: 13Camarnu Balac jaara na puereetuuca tia miishiniri orota, platata na niquitiosocoriquiano janiya, majaari Pueyaso sequesano cua shocotenu quiniutianiya. Naacuatej, tama cua panishacarijiaaja majaari cua naata maninia miiniu, sesa soj. Janiyari naacua saaja pueyarano cua caminiujiushocoriquiano Pueyaso sequesano sequenutaniyani. 14Maniniacuaja, janiyacuajaari cua jiyajinia quiohuani. Cua quiaaquishacarijia, janiyari coteenu quia sequenutaniyani taa nio Israel pueya miiniutianiya quia jiitiasano pueya na nuhuajinij.
15Beor niyanu Balaamri jiyacari naa Pueyaso sequesano caminiujiurii Balacra: “Nioori cua sequesano. Janiyari niquishoo casaa maatia niquijiani. Janiyari noojiajinia pueya niishiriojosano niishijiani. 16Janiya jaara saseyani janiyari niquishoo casaa niquiquiaa socua maatiani. Janiyari jiyocuacaanu quijia Pueyaso niishishano niishiquiaajaniuhuaj. Cumaacaraca quijiajuhuanaja Pueyasoori na sequenu panishano na rupaa cua caminiujiutiquiaa. Cua saseenujinia casaa cua niquitiquiaajaariuhuaj. 17Janiyari nio nuhuaji pa quishacariria niquiya tarini. Janiyari juhuacarijia tari shootiaa tucuacaanu pa tacojini. Supuetana Jacob niquiohuacuajinio supueno pueyano niquiyanijia. Nojuajaari na Israel pueya camarnu quiriquiano. Nojuajaari Moab taucuaca camarucua shaajariquiano tojetaarucuajanaa. Nojori supuetana Setcuajinio caneno taucuaca shaajariquiano tojetaarucuajanaa. 18Na quiquiora na paraa jiya Edom jaariutiariquianojaariuhuaj. Nojuajaari naacua Seir jiya tiuquitiariquiano. Cuno taucuacacuajaari na paraa. Israel pueya shocojotanuucua na paraani, nocuajiiri tojiniuushaariquiano. Nojoriiri naa nocua jiuujiatesano casaa miijioriquiano. 19Jacob niquiohuacuajinioni, shocotajaari supuenutaniya. Nojuajaari tiacajinia cureeno puecoonutaniya tojetaarucuajanaa.”
25Naa na caminiujiuniu nuhuajitij, Balaamri na tiajinia riujiyarohua. Balacri quiaarohuajuhuaj.
Currently Selected:
Nuumero 24: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
