Josuee 2
2
Josuee jiyaramiquishacari pueya Jericoo tiaca manujunuucua
1Sitim jiyanishanojiniji tee nojori quitiuriquiaacuajanij, Josueeri cuniquiji jiyasohuaja querajaa canuu jiyaramiquiquiaari. Naa nojori sequereeri:
—Puera nia manujucoo pa jiyarano, tii quijia Jericoo jiyanishano tiacajaajanio.
Cuno pojoriiri quiojoquee. Jericoo tiacajinia tiuquitiushiiri paanatu tiajinia. Cuno paanatuuri Rahab jiyanishano quiriquiase. Tii maquetuquiaariiri. 2Jiyacaritij, cuno Jericoo tiacajinijinio tahuejaari tama nojori camarnujaaja numootequiaari. Naa na sequequiaariiri:
—Querajaa Israeljinijinio pueya niya pocua tiuquiriini pa jiya na manujunura.
3Jiyacaritij, Jericoo tiaca camarnuuri na rupaa jiyaroree Rahabcua. Naa na sequereeri:
—Canaacua quia tohuatejore cuno pueya, quiocua tiuquirii quia tiajiniani. Majaari quia niishiniu, cuno pojoriiri pa jiya manujunaa.
4Rahabri cuno pojori jamojoquiaari saaja. Nojoriicuaji na tacunuucua, saaja naa sequequiaariiri:
—Taaquiriirinij, querajaa canuucuaaquiniateja cucua quiquiijiaj. Maja cutaraari cua niishiniu quiriquiaa tejeno pueyateja quiriquiaani. 5Tariucua niucua quiojocuhuano. Jiyacaricuajaari pa tiaca tohuateya mishiquiosacari. Maja cutaraari cua niishiniu tee na quiojocuhuanij. Niaa jaara quiarijiaja na nuhuaji ritia netecuatiuyare, niaari nucuamaja na coquenutaniya.
6Rahabcuajaari manujunaa tacanijioquiaari na tia cacojoria, tii cuno pojori jamaatiuniuria. Tii pananu cari na sacuanetanura na niojosano lino cariquioco na jamojoquiaariiri.
7Jericoo tiaca camarnu jiyaramiquishano pueyari Jordaan moojiniara neteja nucuama netecuatuquiaari Jordaan moo niuuniujiutiaja nuujiniji na cuuquenura. Manujunaa neteyotariquiano soldadohua tohuatejosacari, Jericoo tiaca tiootiuuri ritia nojori nuhuaji mishiquiosaaquiaari. 8Jiyacaritij, jamojosano manujunaa maquetiuyaquishacarijia, Rahabri nojoriicua tacaquiaari. Naa nojori sequereeri:
9—Janiyari seetanujuanaa niishiyani, Pueyasoori tariucua niaarano nio jiya nia niquitiono. Naacuatej, nojuajaari canaa tojeteree jiyanohua canaa puerenura niajaniya. Canaa, puetunu nio tiacajinia quijiacajanaanij, puetunu canaajanaari quera cusonuutaa canaa puerenuni. 10Canaacuajaari niishiyani, Egipto jiyajiniji nia quiojosacari, Pueyasoori Naatunacu jiyanishano caminia joojuaquijiacanu joojuashiquio nia niuutiajara. Canaari niishiyajaniuhuaj taa nia miaquejocanu tojetaarucuajanaa cuno querajaa Amorreo camarucua na jiyajiniji puetunu na pueyatajanaacuaani. Cuno pojoriiri Sehoon, Ognio. Nojoriiri Jordaan moo taquijiria quijiaca quiriquiase. 11Naa canaa tojiniuuniuucua niajaniyajinijitij, canaari naacua jiyanohua puereyani. Naacuatej, majaari nio tiacajinijinio pueya miaquetoonu paniniu niaata. Cuno nia camarnu, nojuajaari Pueyasojuanaa, jiya cajiniocua, nio jiyacuanio. 12Naacuatej, quiarijia Pueyaso niquiaraja, seetanujuanaa cua sequeture, niaari cua jiyanootiuniutianiyacujua. Maja saa janiyaja, nojoriiri puetunu cua tiajinia quiniaajanaa. Janiyari naa paniya maninia canaa nia miiniuriatej, naatej taa maninia cua miirii niajaniyacuaanij. 13Naa cua masesano quiria nia miitiurijia. Quiria nia jiyanootiurijia cua que, cua nucua, cua nanuhua, cua tarajanuhuajaajanio, puetunu nojori niquiohua, puetunu nojori jiitiasano casamijiaajanio. Niocua canaacuaji niarta pueya tenujureja, maja canaa miaquejosaanuraaja.
14Manujunaari naa Rahab riucuatureequij:
—Niaa jaara puecoosaare, tama canaajaarijia canaa cuaqueya miaqueriquianoni. Canaari naa miiriquianotej quiaa jaara seetanujuanaa canaacuara tonujuyaquiri niya canaa jamaatiuniujiniji. Naacuatej, Pueyaso jaara tari canaa niquitioree nio jiya camaruhua canaa quiniuria, canaacuajaari maninia quia miiriquianoni.
15Rahab tiaari Jericoo tiaca shocua mataca casacaacua quijia. Naacuatej, nojuajaari na jamojosano manujunaa roshinijioquiaari quereyocua sohuaneyocuata na tia tacuhuajiniji. 16Rahabri naa nojori sequeree:
—Ritia niiquiji nia quiaare. Niocua tuhuananuhuacua jamaatiushii nia pajenaa mariqui nia riuriatareeri. Niocua tii camueenujusee jiuujianaraca juucua nia pajenaa cuaara tiacajinia tiuquiuhuarajaatijiaj. Cuno jiuujianaraca juuca nuhuaji cutara, niocua nia jamaatiushaquiji juhuajaniya quiaarohua cutara.
17Manujunaari naa Rahab riucuareequij:
—Canaacuajaari seetanujuanaa miiniutianiya quiara canaa miishocoriquiano canaa quia masesanoni. 18Nio nia jiya canaa tiuquitiasacari, quiocua nio naatiuyocua jiyocua jaasutere quia tia tacuhuajiniji teyanoocoji canaa quia roshinijioreecuajani. Quiocuaqui quia que, quia nucua, quia nanuhua, quia tarajanuhua, puetunu quia camacajanaa tamuetore quia jiyaco. 19Saniniuujia, niquiriyatu nojorijinijinio jaara jiyacari tohuatama, jaara tamasacata cojiritiasaare, cunoori tama nojuajaaja, maja canaa. Naajuhuaj, canaajinijinio jaara quia tiacoji jaari jamayano na mosocoriquiano, canaari naa quia miinio namiriquianoni. 20Saniniuujia, quiaa jaara canaajiniji pohuatare taa canaa miiniutianiyanij, majaari jiyaniniu canaa quiara miiniutianiya canaa quia masesanoni.
21Rahabri nojori riucuaree:
—Cuaara naa quiiria taa nia sequereecuajanij.
Rahabri manujunaa saruhuataree cuno pojori quianura tiji. Manujunaari tiji quiaquee. Rahabri nojori nuhuaji cuno naatiuyocua jiyocua jaasuteree na tia tacuhuajiniji. 22Cuno querajaa manujunaari tuhuananuhuacua quiatuquiaari. Tii jamaatiuquiaari jiuujianaraca juucaari. Jericoo tiacajinijinio nojori nuhuajinio nojori pajenuucua jiyaramiquishano soldadohuari juucua niyacuneetaquiaari nojori na pajesacari. Na tarinitiaturee socuaari. Jericoo tiacajinia riujiuutiaarohuari. 23Jiyacaritij, tuhuananuhuacua jamaatiuyano manujunaari na jamaatiushaquiji rosetaquiaari. Jordaan moo jatatumohuari. Josueecua tiuquitiushuhuari. Jiyacari Josuee pohuataturee puetunu nojori miishanojanaari, naajuhuaj taa nojori miishaareejaniuhuaj. 24Naa Josuee sequetureeri:
—Pueyasocuajaari tari pa niquitioree puetunu cuno jiyajanaa pa jiyarano. Naacuatej puetunu cuno jiyajinia quijia pueyajanaari jiyanohua pa puereyani. Quera na puerenu cusonuutatiuyano.
Currently Selected:
Josuee 2: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
