2 Samuel 19
19
3Camarnu David pueya tacatesacariuhua tiacajiniohua, na caririquitiuniutia jiyasohuaja tiuquitiaquiaari tiacajiniaari. Pueyari juhua na paraa cohuanashitianojua caririquiquioriquiaa camarnu David sariyocojonuucua neyanuucua. Naacuatej na paraa shocotanuuri saaja jataquiaari taraatiara.
8Na nuhuaji, camarnu Davidri cumantaano tiaca tohuateyajiria canujuquiaari tii na cajiniuria. Jiyacaritij, pueyari tonujusaaquiaari camarnu tiaca tohuateyaji cajiya. Naacuatej, puetunu nojorijianaari camarnu Davidcua nijioquiaari nata na pocoojonura.
Camarnu David tacatesacariuhua Jerusaleen tiacajinia
Naa tama nojorijiaaja miaquetoojonu nuhuajitij, puetunu cuno Absaloon pueyajanaari na tiacacajinia mashiyocuatuquiaariuhua. 9Jiyacaritij puetunu cuno supuetana Israelcuajinio caneno pueya maapuejinijiniojuanaari naa sequetooquiaari:
—Camarnu Davidcuajaari pocuaji miaquejono pa paraa Filisteocuaca, paatuma naa juhuajaniya quimianij. Quiarijia saniniuujia, Absaloon na puerenuucua mashiriucuaa pa jiyajinijiiri. 10Paari juucua pa camarnurano jiyaterucuaa Absaloonni. Saa puera mosaarucuaa pa miaquetoojosacarijaari. ¿Casaa pa tarishitiaa saajaraariuhuaj? Paa mariqui na tiajiniohuara camarnu David riujiuutiriohuani.
11Naa puetunu Israel pueya sequesanojanaari camarnu David tosaaquiaari. Camarnu Davidri naacua na rupaa jiyaroquiaari Sador jiyanishanoocua, Abiatarcuanio. Nio pojoriiri Jerusaleen tiacajinia pueyacuara Pueyaso secojonaa quijiaca. Naa nojori sequequiaariiri:
—Cucua nia jiyanoori. Puetunu supuetana Judaacuajinio caneno pueya jiyaniijianucuajanaa naa quiria nia nequesotare. “¿Casaara puera nia tarishitiya camarnu Davidni? Cuaara ritia tacatehuara nocuaji tiasanojiniaaco. 12Niaari seetanujuanaa catecaji cua tapueyocuajanaa cutara. Cunoori supuetana Judaacuajinio caneno pueya nia quiniuucua. Jaara naa quiritij, ¿casaara puera nia tarishiya niiquiji nia riujiuutiniuhuara janiyanij?”
13Camarnu Davidri naa na rupaa jiyaroquiaari Amasa jiyanishanoocuajuhuaj, naa nera na caminiujiushaanuratej:
—Amasanaa, quiaari seetanujuanaa cua tapueyocuacajanaa cutara. Quiarijiajiniji, janiyari miaquetoojonuucua cua pueya puerojoriquiano quia jiyatenutaniya Joab nitini. Janiya jaara naa quiarijia cua sequesano quiara tohuateyaquirini, Pueyaso cuaara naacua jiyanohua cua saniitiooraqui.
14Camarnu Davidri naa tama na supuetana Judaacuajinio caneno pueya panajoquiaari naa nojori na sequenuta. Naacuatej, puetunu Judaacuajinio caneno pueyajanaari naa juhua niquiriyatu pueyanojua na rupaa jiyarotuquiaari camarnu Davidcua. Naa na sequetuquiaariiri:
—Canaacua quia riujiuuriohua puetunu quiata quiniaa jiyaniijianucuatajanaa.
15Camarnu Davidri jiyacari riujiuuriohua. Jordaan moo casaqueyaji tiuquishuhuari. Supuetana Judaacuajinio caneno pueyari Guilgal tiacajinia quiojoquiaari camarnu David naacunuucua, Jordaan moo na niuutitiuniuriajuhuaj. 40Camarnu Davidri Guilgal tiacajinia tiuquiquiaari. Quimham jiyanishanoori na cojiriquiaa, puetunu supuetana Judaacuajinio caneno pueyajanaanio. Na cojitiuriquiaajaariuhuaj na cajiniocua Israelcuajinio caneno pueya.
Currently Selected:
2 Samuel 19: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
