1 Reyes 3
3
Salomoon masesacari niishitiaja, camarnu maniniu na quiniuria
3Salomoonri Pueyaso panijia quijia. Pueya tojishocoriquiano na que David naajiotasano tojijia quijiajaariuhuaj. Saninuujia nojuajaari juhuanojuaja tuhuananuhuacua seya catijiajojua Pueyasora. Shanohua jaanujua catijiajojua tii Pueyasorajaariuhuaj. 4Salomoonri Gabaoon tiacajinia quiaja tii na catijianura seya Pueyasora. Cuno Gabaoon tiacaari socua maniniucuasano quijia jiyaconaja tuhuananuucua na quiniuucua. Salomoonri tii catijiateja mil na seya Pueyasora.
5Tamonu niucua cuno Gabaoon tiacajinia Salomoon quishacari, Pueyasoori na maquenujinia nocua muetaquiaari. Naa na sequereeri:
—Quia panishano cua masere. Janiyacua quia niquitiorenoj.
6Salomoonri jiyacari Pueyaso riucuaree naatej:
—Pueyasonaa, quiaari cua shipininio David quia jiyaraajia miinio maninia nojuaja quia paniniuucua. Quia tojijia na quiniuucua, nojuajaari maninia miijiojua quiara. Nojuajaari naacua tama na cuaqueyajaaja cojuaja maja sesa na miiniuria. Naacuatej, cua shipininioori saaja maninia miiniuucua shiiniuquiujia. Naacuatej quiaari jiyanohua maninia na miijiojua. Naajuhuaj quiaari naacua nocuajinio supueno neyano cajitiriucuaa camarnu na quiniuria na niti saniniuujia. Seetanujuanaa naari taa quiarijia quia niataacuajanoj. Janiyari naacua quiarijia camarnuni. 7Naacuatej cua camarnu Pueyasonaa, quiaari cua shipininio niti cua jiyaterucuaa camarnu cua quiniuria. Noo juhuari cua tacaatiyacuaratejaj, juhua naatujuaja cua quiniutij. Camarnu cua quiniu jiitiyojuanijia. Naacuatej, majaari tamajaaja cua naata niishiriojonu tama cua miishocoriquianojaaja. 8Quiarijianij janiyari quia saquiriojosano pueya camarnuni. Nojoriiri jiyanohua queraatia. Naa puera queraatia nojori quiniuucuatej, majaari na naata serojosaanu. Majaari cua niishiniujuhuaj taa pueyateja puetunu nojorijianaani. 9Naacuatej cua camarnunaa, quioojia cua niquitiore niishijia cua quiniuria, maninia quia saquiriojosano cuarta pueya jiitiana cua quiniuria. Janiyacua naacua niishijia quirini, casaateja maniniani, casaateja sesani. Saniniuujia, ¿canteja niishijiani na jiitianura nio jiyanohua queraatia quia pueyani?
10Pueyasoori naa Salomoon masesano nojuaja timitiaree. 11Pueyasoori naacua Salomoon sequereequij:
—Naa niishitiaja quia masenuucuatej, cunoori maniniacuaja. Saniniuuijia, maja cutaraari tama quiarajaaja quia masenu quirii pueyaracaanu rishiniu, casamiriaca quiniu, quia paraa puecanunio. Quiaari saaja maseree niishitiaja cutara, maninia quia jiitianura cua pueya. 12Janiyari quia masesano niquitionutaniya quiajaniyani. Naacuatej, quiaari jiyanohua niishijia quiriquiano. Naacuatej, quiocuaji, quia nuhuajijuhuaj, majaari socua jiyano niishijia pueyano quiniu quiniutianiya juhua quiajaniyaja. 13Naajuhuaj, jiyanohua queraatia casamiriacarano quia jiyateriquianonijia. Pueyari quia jiitiasanoocuaji jiuujiateriquiano. Janiyari quia maseyaquishoo casaa quia niquitioriquianojaniuhuaj. Naacuatej, camarnu quia quishacari, majaari socua camarnu quiniu quiniutianiya juhua quiajaniyaja. 14Quiaa jaara cua tojijia quiri, tojishocoriquiano cua naajiotanishano tojijiajuhuaj, tojishocoriquiano cua sequesano tojijiajuhuaj, naatej, taa quia shipininio David tojiquiaaricuaanij, janiyari naacua pueyaracaanu rishijiarano quia jiyatenutaniyani.
15Salomoon jaara niucuaquiaari, nojuajaari jiyacari niishirii nojuajaqui maquiyojoriquiaa. Salomoonri jiyacari Jerusaleen tiacajinia quiaquiaari. Nojuajaari jiyacari Pueyaso quijia cojee cajitiasaqui tiuquiquiaari. Salomoonri jiyacari Pueyasora seya catijiateree Pueyaso na timitianura. Socua seya catijiatereejaariuhuaj tama na cuaqueyajaaja na jiyanootiniuria Pueyaso. Naa Salomoon miiniu nuhuajitij, nojuajaari jiyaniijianucuara na jiyatesano pueyara queranacuree.
Currently Selected:
1 Reyes 3: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
