1 Reyes 19

Eliias mashishacari Jezabelcuaji Horeb tuhuananuucua

1Acab tiuquishacariuhua na tiajinia, necocua Jezabel pohuatasuhua puetunu Eliias miishanojinijijanaari. Na pohuatareejaariuhuaj taa Eliias nacareeteree puetunu Baal shimiacurijanaanij. 2Jezabelri jiyacari na jiyataajia jiyarotaree na rupaa Eliiascua. Naa Eliias sequereeri:

—Janiyacuajaari quia niishiyani, quiaari Eliias. Quiaari cua niishiyajuhuaj, janiyari Jezabelni. Cua tojiri. Cua pueyasohuara cua jiyatesano cuaara cua saniitiooraqui, janiya jaara jiyacari tariqui quia nacataaquishii saniniunijia, naatej taa quia nacareetereecuaa cua shimiacuricuaani.

3Eliiasri jiyacari niishiquii nojuajaari cocuaatia miiriquiaa. Na mosaacarijiyojua, Eliiasri Beerseba tiacajiniara mashiquiina jiyaraajiata. Cuno Beerseba tiacari supuetana Judaa niquiohuacuajinio caneno pueya jiyajinia. Eliiasri cuno tiacajinia jataquiaari na jiyaraajia. 4Eliias saniniuujia, nojuajaari cariiquia jiyacuma rucuanequiaari puetunu juucajanaa. Socua cajishii tiquiyocua naana shinishiqui cariquiocoori. Nojuajaari maja socua na rishiniu paniniu quiriquiaa. Naacua tama nocuarajaaja naa masereeri:

—Tariucuaja Pueyasonaa, cua shaajarejanaa. Maja socua cua rishiniu paniniu. ¿Janiyateeri socua maninia cua supuetanaajinijini?

5Eliiasri shinishiqui na cajishaquijia pojoree. Tiijia maquequeeri. Pueyaso seruuri jiyacari nocua tiuquishii. Na quiaseeri. Naa na sequereeri:

—Quia sanere miaquenuucua.

6Eliiasri ritia na shocua niquinijiomaa. Posururaura majeetesano panri na nacaacuaji pojoriquiaa. Suhuocojinia cajitiariquiaajaariuhuaj na ratusocoriquiano mohuaca. Eliiasri saneree. Coteenu pan sareeri. Na caco raturohua mohuacaari. Na nuhuaji tiijia pojorohuariuhuaj. Maqueyarohuariuhuaj. 7Pueyaso seruuri nocua nimiohuacuhuaj. Eliias quiareeri. Na sequereeri:

—Miaquenuucua quia sanere. ¿Casaate quiocua jatanutaniya rucuanenuni?

8Eliiasri saneree. Pan sareeri. Na nuhuaji mohuaca raturohua na cacoori. Cuno na miaquesanoori na cumaquiquiaari na rucuanenura cuarenta juuca, cuarenta niucuanio. Naa camueenujuquiaariiri na tiuquiniuria Horeb tuhuananuucua. Cuno tuhuananuuri Pueyaso tuhuananucuaja. 9Cuno tuhuananuucua na tiuquishacari, raaco tiuquishiiquiaariiri. Tii juhuaquemaari. Pueyasoori jiyacari nocua muetaquiaari. Naa na sequereeri:

—Eliiasnaa, ¿casaa niya quia miyani?

10Eliiasri Pueyaso riucuaree:

—Cumaacaraca quijiajuhuanaja Pueyasonaa, janiya jiyanohua juaya quiocuani. Israel pueyari seetanujuanaa nojori tojishocoriquiano quia naajio carterucanu tojiniu. Naacuatej nojoriiri quiarano seya catijiaja niyarequetacanu. Naajuhuaj, nojoriiri puetunu quia sequesano caminiujiuniaa pueyajanaa puecoocanu nijiniaquetucuaja mueruuta. Naacuatej saa janiyajaari cureyani. Na motusocoriquiano quiarijia cua pajenuyajaariuhuaj.

11Pueyasoori Eliias sequeree:

—Carijiniacuma quia tohuatare raacoji. Quiocua tii nujuasee cua niquiara nio tuhuananuucuaja quiaa nocua quiyani.

Pueyasoori jiyacari Eliias caco shocomaa. Jiyanohua paratuuri tuhuananu jiaqueseteree. Saijiaari Pueyaso namijiataqui jiaquetacoreejuhuaj. Pueyasoori maja na quiniu quiriquiaa cuno paratujinia. Cuno paratu nuhuajini, rijiaari tuhuananu jiuuquiutiaree. Saniniuujia, majaari Pueyaso quiniu quiriquiaa cuno rijiajinia. 12Naa rijia jiuuquiutianu nuhuajitij, puereeta maniiri noshirii. Shocomaajaariuhuaj. Majaari Pueyaso quiniu quiriquiaa cuno manijinia. Cuno mani shoconu nuhuajini, juhua paratuuri jariya tojishaaree. 13Eliias jaara na tojiquiaarinioj, na tucuaque toqueta mishiquioree na jiquiocoori. Eliiasri jiyacari na quishaqui raacoji shiriquirii raa jiyacuajiria. Pueyasoori jiyacari na nequesotareequij:

—¿Casaa niya quia miyani, Eliiasnaa?

14Eliiasri Pueyaso riucuaree:

—Cumaacaraca quijiajuhuanaja Pueyasonaa, janiya jiyanohua juaariquiaa quiocuani. Israel pueyari seetanujuanaa nojori tojishocoriquiano quia naajio cartecanu tojiniu. Naacuatej, nojoriiri quiarano seya catijiaja niyarequetacanu. Naajuhuaj, nojoriiri puetunu quia sequesano caminiujiuniaa pueyajanaa puecoocanu nijiniaquetucuaja mueruuta. Naacuatej, saa janiyajaari cureyani. Na motusocoriquiano quiarijia cua pajenuyajaariuhuaj.

15Pueyasoori jiyacari naa Eliias sequeree:

—Damasco tiacajiniara cariiquia jiyacumaja quia riujiuuriohua tee cumaji quia nimiacuaacuajanij. Quiaa jaara Damasco tiacajinia tiuquishii, quiocua Siria camarnura jiyatesuhua Hazael. 16Naajuhuaj, quiocua quiarta pueya camarnurano jiyatere Jehuujuhuaj. Nojuacuajaari Nimsi jiyanishano jinianu. Naajuhuaj, quiocua saniniuujia quia niti cua sequesano caminiujiuniarano saquiriojore Eliseo. Nojuajaari Safat jiyanishano niyanu. Abel-meholaa tiacajinijinioori. 17Naacuatej, Hazael jaara na paraca jaatere, Jehuuri na pueturiquiano cutara. Naajuhuaj, Jehuu jaara na paraca jaatere, Eliseori na pueturiquiano. 18Puetunu quiarta Israel pueyajinijinioni, janiyari siete mil cojuariquianoni. Puetunu nojorijianaari cuno Baal jiyanishanoocuara mojoquetoo. Naajuhuaj, puetunu nojori rupaajanaari tojetaarucuajanaa na nujuuhuo.

Eliseo jiyatesaanu Pueyaso rupaa caminiujiuniara Eliias niti

19Eliiasri na quijia Horeb tuhuananujiniji quiaarohua. Eliseo jiyanishano pueyano riuriatamohua na cuhuariquiajiniaari. Eliseori cojitiacaca moronucuaca juyaca poonitijioriquiaa jiya tacarojotanura natajara. Once nera poonijionaari Eliseo puetariquiaa nojori poonijiosacari. Puetunu cuno pojorijianaari cojitiacaca moronucuaca juyaca poonitijioriquiaa cuhuariquia jeenucuanura natajara. Eliiasri Eliseocua cateconuree. Na numueecuaji niaquiaari na tucuaque toqueeri. Eliseori naacua niishiquiaari nojuajaari tari Pueyaso sequenu panishano caminiujiuniara saquiriojosaaree. 20Eliseori jiyacari tiijia tiujiaquee na juyaca. Eliias nuhuaji netequeeri. Naa na sequeseeri:

—Quiarijia cua tarinitiarejaara. Coteenu cua que, cua nucua nujuucoora cua nuhuajiria. Janiyacua na nuhuaji quiata quiaariquia cutarani.

Eliiasri na riucuaree:

—Taaquiriirinij. ¿Janiyateeri quia tenujiyacuajani? Maja cutaraari nio niyajetanu, casaa cua miirii quiajaniyacuajani.

21Eliseori Eliiascuaji jiyojeree. Jiyacari querajaa na juyaca canuu puecooreeri. Juyacaacua morojosano juhuanataja juunu shucua rariyoreeri. Tariucua rariyocuaca serotaree puetunu tii masujanaarij. Naa na queranacunu nuhuaji na nuhuajiriatej, Eliiasta quiaquee panaatia cutaraari. Eliseori naa quiaquiaari Eliias jiyaraajia na quiniuriatej.

Currently Selected:

1 Reyes 19: arl

Highlight

Copy

Compare