1 Reyes 17
17
Eliias sequesacari maru niyaquiniutianiya
1Pueyaso sequesano caminiujiunia Eliiasri jiyacari quiriquiase. Nojuajaari Galaad jiyajinia quijia. Tisbee tiacajinijinio quiriquiase. Eliiasri jiyacari naa sequequiaari Acabtej:
—Janiyacuajaari pa supuetana Israel tojishano Pueyaso jiyaraajiani. Cua camarnu niquiara seetanujuanaa quia sequeyanijia. Quiarijiajiniji, majaari maru niniu quiniutianiya socua. Marijiaari naa na puequejotanutaniyaquij. Majaari shushiquia tiniu quiniutianiya quenaaja. Naa quiriquianoori janiyajanaa cuaara maru sequeerajaatijia cuaara niiria.
2Pueyasoori naacua jiyacari Eliias sequereequij:
3—Niiquiji quia mashiri. Quiocua Querit samo casaqueyaji quishii pueya jiyaqui. Cunoori pananu muetasamaji, Jordaan moo taquijiria. 4Quiocua Querit samojiniji rarujusee mohuaca. Janiyacuaja tari “cuervo” jiyanishano shuhua seerataree quia miateriquianoni.
5Eliiasri naa Pueyaso sequesano nojuaja tojiquiaari. Quiaquiaariiri. Querit samo casaqueyaji quishiiri. 6Cuno cuervo jiyanishano shuhuari tariquiicuaji tenacari nocua poojua pan, shujaajanio. Saaja mohuaca rarujujua samojiniji cutaraari. 7Jaara pasanaataja camueenujuquiaari, cuno jiyajinia maru niyaquiniuucua, cuno samoori tojetaarucuajanaa joojequetaquiaari.
Eliias quishacari taatu mashiquio tiajinia
8Pueyasoori jiyacari naa Eliias seequereequij:
9—Quia sanere. Sidoon jiyajinia quijia Sarepta tiacajinia quia quiaare. Quiocua tii quishii. Janiyacuaja tari cuno tiacajinia quijia mashiquio toree noojiajiniani, nojuacuajaari quia miatenutaniya.
10Eliiasri jiyacari saneree. Sarepta tiacajinia quiaqueeri. Tiaca shocua mataca tohuateyaji na tiuquishacari, jiyacari mashiquio niquirii naanacucua tatucuaanoori. Eliiasri jiyacari na piirii. Naa na sequereeri:
—Cucua quia jiyanoori sacaj. Miji quiria quia mohuacajiniji quia shuuri cua ratusocoriquiano.
11Mashiquio canujusacari juucua mohuaca shuuniuucua, Eliiasri jiyacari na piiriohuacuhuaj. Naa na sequereeri:
—Miji quiria quenaaja quia pare quia pan raquijuhuaj.
12Mashiquioori naa Eliias riucuaree:
—Quia camarnu Pueyaso niquiara seetanujuanaa quia sequeyanijia. Maja majeetesano pan cua jiitianuni. Janiyari cua patacojinia saaja niquiriyatu queyatasocoriquiano jiitiaa shiitianiyojua cashojuaniyojuani. Shiyocua naajuhuaj, shoorajaacaniyojuaari na quiquiojinia mataajuhuaj. Janiyari cuno shiitianiyojua cashojua cua jiitiasano cua majeetejara naanacucua tatucuariquiaani. Janiyari niquiriyatu majeetenutaniya quiyanurani, quiria niquiriyatujuhuaj. Jiyacunujuanaa cuno pan canaa sanu nuhuajini, canaari na nuhuaji canaa miaajaara titiacoriquianoni.
13Eliiasri mashiquio riucuaree:
—Maja quia miaajaara titianu puerenu. Quia teeretarecuaa cuno shiitianiyojua cashojua quia sequesanoni. Quiocua coteenu quiria majeetere shiitianiyojua. Quiocua cua niquitiorenoj. Quiocua na nuhuaji quiara majeetere tamonu, quia mueyara naajuhuaj. 14Israel pueya Pueyasojuanaacuajaari naa sequereequij: “Patacojinijinio cashojuaari pueetaaquiniutianiya. Shiyocuaari na quiquiojiniji moneyaquiniutianiyajuhuaj, Pueyaso cuaara maru nitiriohuajaatijiaj jiya na piquiojonura.”
15Mashiquioori jiyacari miirii taa Eliias sequeree nojuacuajani. Naacuatej, cuno mashiquio neyanutajani, Eliiasjaajanio, nojoriiri na miatusocoriquiano jiitiaquiaari queraatia juucara socua. 16Majaari cashojua pueetanu quiquiaari na quiquiojiniji, cuno shoorajaaca shiyocuajaajanio. Pueyasoori naa tohuatequiaari Eliias sequesano cuno mashiquiotej.
17Na nuhuaji, mashiquio niyanuuri taruquequiaari. Mueyari puetuuquiaarijianaa. Na paratuuri socua turetaqueequij. Cusoqueeri. 18Mashiquioori jiyacari naa Eliias sequereequij:
—¿Casaateja quia torucuaa niya canaacua quia tiuquiniuriani, Pueyaso tojijia pueyanonaa? ¿Quiaateeri puetunu sesa cua miishanojanaa saneerohua cucuara? Quiyanuuri naacua quiria cusoqueequij.
19Eliiasri mashiquio riucuaree:
—Miji cua niquitiore quia mueya.
Eliiasri jiyacari tariucua macu paree mueya na nucua catucumaji. Na quijia taco na tacataarohuari. Na maqueja sohuacamara na maquetujinia mueya niaseeri. 20Eliiasri jiyacari na rupaa na paaretanuta naa Pueyaso maseree mueyacuaratej. Naa sequeree Pueyasoori:
—¡Cua camarnu Pueyasonaa! Janiyari nio mashiquio tiajinia quiyani. ¿Casaara socua quia taraajoya nio maashiquio naa neyanu quia shaajanuucua neratej?
21Eliiasri jiyacari jiuujianaraca pacutejoree macuucua jacamanu. Naa Pueyaso masereeri:
—Cua Pueyasonaa, nio mueyacua quia tiuquiniriohua noojia.
22Pueyasoori Eliias masesano tojirii. Noojiaari mueyacua tiuquimiohua. Naatamohuari. 23Eliiasri jiyacari ritia mueya rosetaquiaari na nucuaacua. Naa mueya nucua sequereeri:
—¡Quia niquiri! Quia mueya tari naatarohua.
24Mashiquioori jiyacari naa Eliias sequeree:
—Quiarijia cutara, maja quiocuaji cua taacanuununi. Janiyari quiarijia niishiyani, quiaari seetanujuanaa Pueyaso sequesano caminiujiunia. Naacuatej puetunu quia sequesanojuanaari seetanujuanaa.
Currently Selected:
1 Reyes 17: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
