1 Reyes 16
16
1Baasaa quishacari Israel pueya camarnu, Pueyasoori Hananii niyanu Jehuu caminiujiutiquiaari na rupaa camarnu Baasaarano. Jehuuri naa caminiujiuquiaari Pueyaso rupaa: 2“Baasaanaa, camarnu quia quiyaquishacarijia, quiaari tojishoo pueyano quijia coteenu. Naajaa, janiyari cua Israel pueya camarnura quia jiyateno juucuani. ¡Taaquiti! Quiaari saa Jeroboam nuhuaji neterucuaajaa sacuaraatia quia miijionuucua juhua nojuaja. Quiaari naacua cua Israel pueya jiitiorucuaa sacuaraatia nojori miijionurajuhuaj. Naa sacuaraatia quia miijonuucuatej, quiocuara cua najiquitiriucuaa. 3Naacuatej, camarnu Baasaanaa, quiaari maja rishiriquiano; quia niquiohuajaajanio. Janiyari tojetaarucuajanaa quia niquiohua miaquejoteriquianoni, naatej taa cua miiquiaari Nabat niyanu Jeroboamcuajinio supueno pueyacuani. 4Naacuatej, niquiriyatu quia niquiohuajinijinio jaara tiaca nuucuajinia cusoyariquia, sareyari na miaqueriquiano. Naajuhuaj, jaara cuhuariquiajinia cusoyare, mopueeri na miariquiano.”
5Baasaajiniji, socua na miijiosanojinijijuhuaj, cunoori Israel camarucuajiniji pohuatasano nequesoreetu croonicajinia naajiotasano quiya. 6Baasaa jaara shaajequiaari, Tirsa tiacajinia jamosaaquiaariiri. Saniniuujia, neyanu Elaa jiyanishanoori na shipininio niti camarnura quiquiaari.
7Pueyasoori Hananii niyanu Jehuu caminiujiutiquiaaricuaja taa Baasaa na monutaniyani, puetunu necohuajaajanio. Puetunu Baasaa miishanojanaacuajaari tojetaarucuajanaa sacuaraatia quiquiaari Pueyasora. Baasaacuajaari tama nocuarajaaja Pueyaso najiquitiquiaari sacuaraatia na miijionuucua. Na miijiosanoori tojetaarucuajanaa juhua Jeroboam miijiosano quiquiaari. Jeroboam niquiohua miijiosanoori naa quiquiaarijuhuaj. Pueyasocuajaari puetunu nojorijianaa puecaquiaari tojetaarucuajanaa.
Elaa, Zimri quishacari Israel pueya camarucua
8Tari Asaa shocotejosacari veintiseis marijia narta pueyajiniji raquitiinio Judaa camarnu na quishacari, Baasaa niyanu Elaa jiyanishanoori shusha coteeriquiaa Israel pueya maanu camarnu na quishacari Tirsa tiacajinia. Naa camarnu na quishacaritij, nareja querajaa marijia shocotejoquiaariiri. 9Camarnu Elaari queraatia soldadohua saa caballohua jayotasano rucuanejotajaruhuaracaja quijia. Zimri jiyanishanoori cuno soldado maanu cajiniocua puerojona quijia. Cuno Zimrini, nojuajaari na camarnu Elaa tacaretaquiaari miaquenu. Naa quiquiaaritij. Tamonu juuca Elaari na tiaco Tirsa tiacajinia quiriquiaa. Cuno na tiaco poonijionaa jiyaramiquiniaari Arza jiyanishano quijia. Jiyacaritij camarnu Elaari puera raturee najatunacu. Moseriquiaari. 10Zimriiri jiyacari nocua tiuquishii. Na moreeri. Nojuajaari naacua na camarnu niti camarnura quiquiaari saniniuujia. Naa nojori miitioosacariniquitij, camarnu Asaari saniniuujia tari veintisiete marijia shocotejoriquiaacujua narta Judaa pueya camarnu na quishacari.
11Tari Zimri quishacari camarnu, nojuajaari ritia puecooree puetunu Baasaa niquiohua canuujuanaa. Puetunu Baasaa cojiniaa puecooreejaariuhuaj, puetunu na jiyopuejaajanio. Nojuajaari naa miiriiqui maja na namitiasaanura saniniuujia. 12Camarnu Zimriiri naa puecaquiaari puetunu cuno pojorijianaatij. Naa tohuatequiaariiri taa tarijia Pueyaso caminiujiutiquiaari na sequesano caminiujiunia Jehuucuajani. 13Naa Baasaa, neyanu Elaa miijionuucua sacuaraatiatej, nojoriiri sesa miitiquiaari narta Israel pueyajuhuaj. Naacuatej, puetunu nojorijianaari Israel pueya Pueyaso najiquititiuquiaari tama nocuarajaaja, jeecojosano casami nojori jiyatenuucua tama nojori pueyasorajaaja.
14Camarnu Elaajiniji pohuatasanoori socua quiya Israel camarucuajiniji pohuatasano croonica naajioneejinia.
15Tari camarnu Asaa shocotejosacari veintisiete marijia narta Judaa pueya camarnu na quishacari, Israel pueyajinijinio soldadohuari saniniuujia jiyacari na paraa Filisteocuaca Guibetoon tiaca shuriucua tari quiriquiaa na miaquetoojonura. Naa nojori niyacaritij, Zimriiri tama camarnurajaaja quiquiaari nojori niyacari Tirsa tiacajinia. Nareja niquiriyatu semaana shocotequiaariiri camarnu na quishacari. 16Miaquetoojonuucua quiyano soldadohua jaara niishiquiaari Zimri camarnu tacaretarucuaa monu, nojoriiri jiyacari camarnura jiyateree Omri jiyanishano. Omriiri Israel pueya miaquetoojonuucua puerojona quijia. 17Naacuatej, Omri jiyanishanoori puetunu na soldadohuatajanaa na paraa Guibetoon tiaca tarinitiaquiaari, saniniuujia Tirsa tiaca tiuquitiasuhuari tee Zimri quiriquiaacuajani.
18Zimri niquishacari tiacaari tariucua maninia soldadohua turojotasano quiriquiaa, nojuajaari jiyacari camarnuucuajinio tiasanojiniaaco sohuacamara tiuquiquiaari. Nojuajaari jiyacari mani niaree tiaacua. Tama nojuajaari miria cateree. 19Tama nojuajaarijia naa catequiaaritij sacuaraatia Pueyaso niquiara miijiojua na quiniuucua. Nojuajaari juhua Jeroboam sacuaraatia miijiojua quiquiaarijuhuaj. Cuno naa sacuaraatia na miijiosanota sesa miitiquiaari Israel pueyajaariuhuaj.
20Socua maatia Zimrijiniji pohuatasanoni, Elaa na tacaretanujinijinij, puetunu cunojuanaari Israel pueya camarucuajiniji pohuatasano croonica naajioneejinia quiya.
Omri quishacari Israel pueya camarnu
21Jiyacaritij, Israel pueya maanuuri querajaa pueya maanura raquitiiquiaari. Noojiaqueyari Guinat niyanu Tibni paniriquiaa na camarnura, noojiaqueyari saniniuujia Omri panitiuriquiaacujua. 22Omri pueyari socua na cumaaca tojitijia quijia Tibni pueya. Na nuhuaji, Tibniiri socua shaajequiaari. Naacuatej, Omriiri socua camarnura quiquiaari.
23Naacuatej, shusha Omri coteesacari camarnu na quiniuria narta Israel pueyara, Asaari tari treinta y un marijia shocotejoriquiaacuaa narta Judaa pueya camarnu na quishacari. Naacuatej, Omriiri doce marijia shocotejoquiaari narta Israel pueya camarnu na quishacari. Cuno doce marijiajinijini, seis marijia shocotejoquiaari Tirsa tiacajiniaari, camarnu na quishacari tii. 24Omriiri jiyacari Semer jiyanishano tuhuananu masequiaari. Cuno jiya sami sesenta y seis kilo shanacusano plata niquitioquiaari cuno jiya camaruuri. Cuno tuhuananuucua tiacara tiojotequiaari na quiquioraari, jiyaconajara maninia mataconucua na shocua. Na jiyaniquiquiaariiri Samaria tiaca. Naa na jiyaniquiquiaariiri coteenujuanaa cuno tuhuananu camaru sesa quiniuucua Semer.
25Pueyasora, Omri miijiosanoori socua sacuaraatia quiquiaari tariucua nocuajinio quinio camarucua miijiosanojiniji. 26Camarnu Omrini, nojuajaari juhua Nabat niyanu Jeroboam miijioquiaari sacuaraatiajuhuaj, teyano sacuaraatia na miijiosanota na sesoquiaari narta Israel pueyajaniuhuaj. Tama nojuajaarijia Israel pueya Pueyaso najiquitinio nocuara, tama na jeecojosano casamiicuara jacamatujuaca na quiquionuucua, juhua Pueyasoocuaraja.
27Socua Omrijiniji pohuatasanoori, puetunu na cumaacatajanaa na miijiosanojinijijuhuaj, cunoori Israel pueya camarucuajiniji croonica naajioneejinia naajiotasano quiya. 28Omri jaara shaajequiaari, tama na tiaca Samariajiniajaaja jamosaaquiaariiri. Na niti saniniuujia, neyanu Acabri camarnu quiquiaari.
Acab quishacari Israel pueya camarnu
29Tari Asaa shocotejosacari treinta y ocho marijia nara Judaa pueya camarnu na quishacaricuaa, Omri niyanu Acabri saniniuujia jiyacari shusha coteeriquiaacujua narta Israel pueya camarnu na quiniuria. Nojuajaari veintidos marijia shocotejoquiaari narta Israel pueya camarnu na quishacari na quijia Samaria tiacajinia. 30Puetunu na miishanojanaari sacuaraatia quiquiaari Pueyasora, socua sacuaraatia tariucua nocuajinio quinio camarucua miijiosanojiniji. 31Majaari quenaaja na tacaaniu quijia naa sacuaraatia na miijiosacaritij. Naacuatej, nojuajaari juhua Nadab niyanu Jeroboam miijioquiaari sacuaraatiajuhuaj, nojuacuajatej. Naacuatej, nojuajaari socua sacuaraatia miiquiaari Jezabel jiyanishano maaji na caminiuucua. Jezabelri Et-baal niyatu quijia, taucuaca Sidoon tiaca camarnu niyatu. Acabri naacua Pueyaso sesacasano Baalcuara jacamajara na secojojuara quiquiaari. 32Acabri juhua Pueyasoocuaraja seya na catijiajara juhuacuquiaari. Cuno Baalsequeecuaji Samaria tiacajinia tiaquiaarijaariuhuaj, tii na secojonuujuara cuno Baal jiyanishano jeecasano casaani.
33Naajuhuaj, Acab quishacari Israel pueya camarnu, nojuajaari juhua Aseraa niquishano casaa jeecatequiaari nocuara nojori jacamatusocoriquiano. Acabri naacua Israel Pueyasojuanaa najiquitiquiaari jiyanohua socua tariucua nocuajinio quijia Israel pueya camarucuajiniji.
Currently Selected:
1 Reyes 16: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
