1 Reyes 15
15
Abiam quishacari Judaa pueya camarnu
1Nabat niyanu Jeroboamri tariucua dieciocho marijia shocotejono quiriquiaa raquitiinio narta Israel pueya camarnu na quishacari. Jiyacaritij, Abiamri shusha coteequiaari saaja supuetana Judaa niquiohuacuajinio caneno pueya camarnu na quiniuria. 2Naacuatej, Abiamri nareja tres marijia shocotejoquiaari camarnu na quishacari Jerusaleen tiacajinia. Na supuena sesaari Maacaa quiriquiase. Absaloon niyatu quijiaari. 3Abiamri jiyareta na shipininio nuhuaji netequiaarijuhuaj. Juhua na shipininio miijioquiaari sacuaraatiajaariuhuaj. Abiamri maja Pueyaso na paniniu quijia noojiata seetanujuanaa. Na supuetana David cutaraari seetanujuanaa Pueyaso panijia quijia.
6-7Roboam quishacarijia, na jiitiasano pueyaracaanu Jeroboam jiitiasano pueyata miaquetoojojua quijia. Roboam shaajenu nuhuaji saniniuujia, neyanu Abiam jiitiasano pueyari Jeroboam jiitiasano pueyata miaquetoojojua. Puetunu socua Abiam miishanojinijijanaari supuetana Judaacuajinio caneno pueya camarucuajiniji pohuatasano nequesoreetujinia naajiotasano quiya. 8Abiam jaara shaajequiaari, na supuetana David Jerusaleen tiacajinia jamosaaquiaariiri. Na niti saniniuujia, neyanu Asaa jiyanishanoori camarnu quiquiaari.
Judaa camarnu Asaari maninia miijiojua quijia
11Camarnu Asaa saniniuujia, puetunu na miijiosanojanaari maninia quiquiaari Pueyasora cutara. Nojuajaari juhua na supuetana David miijioquiaari cutara. 12Jiyacaritij, Asaari maajishuriujiuri taanuutequiaari na jiyajiniji. Cuno pojoriiri jiyaniquiaari na sacuaraatia na miijiotusanoori jeecojosano na pueyasohua timitijia. Naajuhuaj Asaari na supuetanaa nujuatejosano tama nojori pueyasorajaaja nojori jeecojosano casaa pojotejoquiaari. 13Naajuhuaj, Asaari na ji Maacaa jiyaniijia tojishano maaji na quiniu jaariutiaquiaari maja socua tojishano na quiniuria. Naa na ji miiquiaariiri Pueyaso soosano Aseraa na jeecatenuucua. Asaari cuno jeecasano Aseraa pojotequiaari. Cedroon samo shuriuquiumia na catijiaquiaariiri. 14Maja cutaraari Pueyaso soosano nujuatujua casaa suhuortucua na niyarequetanu quiquiaari tuhuananuhuacua. Naajaa, Asaa cutaraari Pueyaso panishano miijiojua quijia cutara.
Nadab quishacari Israel pueya camarnu
25Tari querajaa marijia Asaa shocotejosacari narta supuetana Judaacuajinio caneno pueya camarnu na quishacari, Jeroboam niyanu Nadabri jiyacari shusha coteequiaari raquitiinio Israel pueya camarnu na quiniuria. Cuno Nadabri saaja querajaa marijia shocotejoquiaari camarnu na quishacari. 26Puetunu na miijiosanojanaari sacuaraatia quiquiaari Pueyasora. Nadabri tojetaarucuajanaa na shipininio nuhuaji netequiaari. Naacua narta Israel pueya miijiotequiaari sacuaraatiajaariuhuaj. 27Jiyacaritij, Ahiias jiyanishano niyanu Baasaari sanequiaari. Nojuajaari supuetana Isacar niquiohuacuajinio supueno pueyano quiriquiase. Nojuajaari jiyacari camarnu Nadab tacaretaquiaari. Naacuatej, Baasaari Guibetoon tiacajinia Nadab morquiaari. Cuno Guibetoon tiacaari taucuaca Filisteocuaca tiaca. Nadab quishacarijia, nojuajaari puetunu na pueyatajanaa Guibetoon tiaca cosejoriquiaa cuno tiacajinia quiniaa na miaquejosocoriquiano.
28Baasaa mosacari Nadabni, cunoori tari quiriquiaa jiuujianaraca marijia Asaa shocotejosacari supuetana Judaacuajinio caneno pueya camarnu na quishacari. Naacuatej, Baasaari camarnura quiquiaari na mosano Nadab niti. 29Tari Baasaa quishacari camarnu, nojuajaari puetunu Jeroboamcuajinio supueno pueyajanaa puecooquiaari. Seetanujuanaa naa tohuatequiaariiri taa Pueyaso pohuatequiaari Siloo tiacajinijinio Ahiias jiyanishanocuajani. Baasaari puetunu nojorijianaa puecooquiaari. Majaari quenaaja niquiriyatu cureenu quiquiaari. 30Puetunujuanaari naa puecasaaquiaari sacuaraatia Jeroboam miiniuucua. Naacuatej nojuajaari Israel pueya miijiotequiaari sacuaraatiajuhuaj. Naacuatej, Israel pueyari Pueyaso juaatitiujia tama nojoriicuarajaaja.
31Puetunu socua Nadabjiniji pohuatasanoni, cunoori camarucua miijiosanojiniji naajioneejinia naajiotasano quiya.
32Pueyaracaanu camarnu Baasaa jiitiasacari narta Israel pueya, nojoriiri Asaa jiitiasano pueyata miaquetoojojua.
Camarnu Baasaa jiitiasacari narta Israel pueya
33Jiyacariiri naa quiquiaaritij. Asaa jaara shocotejoquiaari jiuujianaraca marijia narta supuetana Judaa niquiohuacuajinio caneno pueya camarnu na quishacari, jiyacaritij, Ahiias niyanu Baasaari shusha coteequiaari raquitiinio Israel pueya camarnu na quiniuria. Camarnu na quishacari, Tirsa jiyanishano tiacaari na quiquio quijia. Baasaari veinticuarto marijia shocotejoquiaari camarnu na quishacari. 34Nojuajaari saaja sacuaraatia miijioquiaari Pueyaso niquiara. Nojuajaari tojetaarucuajanaa Jeroboam nuhuaji netequiaari. Naacuatej sacuaraatia casaa miijioquiaariiri teyonu miijionuucua Israel pueya sesequiaaricuajani.
Currently Selected:
1 Reyes 15: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
