1 Croonicas 28
28
Salomoon sanitishacari na que David
1Camarnu Davidri Jerusaleen tiacajinia puetunu nio pojori narta Israel pueyajinijiniojuanaa rerejotequiaari: niquiriyatu jiyaniijia puetunu Israel doce maapuejinijiniojuanaa, puetunu miaquetoojonuucua puerojonaa jiyaniijianucuajuhuaj, miaquetoojonuucua mil pueya puerojonaa jiyaniijianucuanio, miaquetoojonuucua cien pueya puerojonaa jiyaniijianucuanio. Naajuhuaj, camarnu Davidri nera cuhuariquiaca cuhuorojonaa pueya jiyaniijianucua rerejotequiaarijuhuaj, na juyaca cojuanaa jiyaniijianucuajuhuaj, puetunu necohuarajanaa cuhuorojonaa, na juyaca cojuanaa jiyaniijianucuajaajanio. Puetunu narta camarucua tojishano pueya rerejotequiaarijaariuhuaj, naajuhuaj socua cumaacaraca miaquetoojonu niishijiaca na pueyajaajanio.
2Jiyacaritij, camarnu Davidri narta pueya tacoji nujuaree. Naa nojori sequereeri:
—Quiarijia cua tojitiuri cuarta pueya cua panishano cua jiitiasano pueyanaa. Tariucuacaanujiniji janiyari niishiriojoriquiaani maninia juhuari cua tiatenura pueyaracaanu pa Pueyaso quijia cojee cojitiajara tii. Cuno tia maara quiri pa Camarnu Pueyaso quijiara tii pueyaracaanu. Cuno cojeecuajaari maja pa niyajetanura pa tojishocoriquiano pa Pueyaso sequesano. Tariucua paatijiosano jiitiaa casaanijia nocuajinio tiatajara. 3Saniniuujia, Pueyasoori naa cua sequequiaaritij: “Cunoori maja quiajaniya, cua quiquiora tiariquianoni. Quiaari coonu. Quiaari queraatia pueya nanaca shooteno.” 4Naajaa, supuetana Israelcuajinio caneno pueya pa Pueyasoni, nojuajaari cua tapueyocuaca tajiniji cua saquiriojono pueyaracaanu parta Israel pueya camarnu cua quiniuria. Pueyasojuanaacuajaari supuetana Judaacuajinio caneno pueya saquiriojoquiaari puetunu parta Israel pueyajanaa camarucua nojori quiniuria. Naa supuetana Judaacuajinio caneno pueya na saquiriojonuucuatej, cua queeri na saquiriojosano quiriquiaa. Saniniuujia, puetunu cua que niquiohuajinijiniojuanaanij, saa janiyajaari na saquiriojosanoni puetunu pa supuetana Israelcuajinio caneno pueyajanaa camarnu cua quiniuria. 5Quiarijia saniniuujia, janiyari queraatia niquiohuaracani. Puetunu nojorijianaari Pueyaso niquitiosano janiya. Puetunu nojorijinijiniojuanaanij, Pueyasoori quiyanu Salomoon saquiriojoree cua niti camarnu quiriquiano. Naacuatej nojuacuajaari pa Camarnujuanaa jiyatesano parta Israel pueya jiitiariquiano Pueyasora. 6Pueyasoori naa cua sequequiaarijuhuaj: “Quia niyanu Salomoonni, nojuaja cutaraari cua quijiarano tiariquiano, cua quiquio matacoriquianojaariuhuaj. Janiyari juhua quiyanuraja na saquiriojononi. Janiyajanaari na que quiriquianoni. 7Naajuhuaj, camarnu na quishacari, Salomoon jaara seetanujuanaa tama na cuaqueyajaaja cumaquiri puetunu cua sequesanojanaa miijia na quiniuria, taa quiarijia na miyacuajanij, nojuajaari sanitiyaquishoo quiriquiano. Janiyari pueyaracaanura camarnu na jiyateriquianoni.”
8Quiarijianij, niya rerejono pa supuetana Israelcuajinio caneno pueyanaa, janiyari Pueyaso niquiara seetanujuanaa nio nia sequeyani: Seetanujuanaa puetunu niaarano Pueyaso sequesanojanaa tojijiaca nia quiriquia. Nojuajaari nia Pueyasocuaja. Niaa jaara na sequesano miijiaca quiri, nio jiya maniniu niaa tii quiyanij, nioori naacua pueyaracaanu nia jiya quiriquiano. Nia shaajecosacarijuhuaj, nio jiyari nia niquiohua noquiyara quiriquiano pueyaracaanu saniniuujia. 9Quiajaniya saniniuujia quiyanu Salomoonnaa, seetanujuanaa quia que cojuana Pueyaso niishijia quia quiriquia. Seetanujuanaa quioojiajinia nojuaja quia paniniutia shitimia quia miiriquia puetunu neranojanaa. Pueyasocuajaari puetunu pa niishiriojotajajinia pa niishiriojosano niishijia. Naacuatej, nojuajaari maninia pa niishiriojosano, sacuaraatia pa niishiriojosano niishiyacuaja. Nio cua sequesanoori seetanujuanaa. Naacuatej, quiaa jaara Pueyaso paniri quia naacuriquiano, nojuajaari quia naacunutaniya. Saniniuujia, quiaa jaara na shocotere, nojuaja cutaraari quia ruuretariquiano tojetaarucuajanaa. 10Quiarijia quia niishiri cutara, Pueyasoori quia saquiriojoree nera na quijiara tiariquiano. Naacuatej, tama quia cuaqueyajaaja quia cumaquiri. Quioojia quia cumaquiri. Naacuatej quiarijia nocuaji quia tiare.
11Camarnu Davidri jiyacari neyanu Salomoon niquitioree naajionee. Cuno naajioneejiniani, tiiri tariucua naajiosano quiriquiaa taateja Pueyaso quiquiorano tiaco tiuquitiajara quiniutianiyani. Tii tariucua naajiosano quiriquiaajaariuhuaj, taamueca tiateja quiniutianiyani: casami racatajara sohuacaca, nataco rerejojua sohuacacajuhuaj, socua pueyamaanu tiajiniaaco sohuacacajuhuaj, Pueyaso cojee quiquiorano sohuacanio. 12Camarnu Davidri jiyacari neyanu Salomoon sequeree puetunu na niishiriojosanojuanaa; Salomoontucua taa Pueyaso secojojua tia jiuucuaji nujuatejore tucuaqui juhua moriujiucuaja saijiniji casaanij. Na sequereejaariuhuaj cuaara pueyamaanu sohuacaca miiria Pueyaso secojojua tia shuucuaji. Cuno sohuacacaari Pueyasorano pueya niquitiojosano cumaneeca racatajara, na casamijinijinio Pueyasorano pueya jiyatesano racatajarajaariuhuaj. 13Naajuhuaj, Davidri Salomoon niquitioree tariucua naajiojuhuaj maatucua taamueca sohuacaca miirini nio pojori quijiara: pueyacuara secojonaa, supuetana Leviicuajinio caneno pueyajuhuaj nojori sanitijiotoosacari Pueyaso Secojojuajinia nojori poonijiosacari, socua tamonu sohuacajuhuaj puetunu Pueyasora catijiasacari manijinia pueraquetaja casami racatajara.
14Camarnu Davidri jiyacari neyanu Salomoon niquitioree queraatia oro, queraatia platajaajanio. Cuno oro plataari Pueyaso secojojua tiajiniaaco nujuatacoriquiano Salomoon jeecojotesocoriquiano quiriquiaa. 15Cuno oro plataari nio casamiriano quiriquiaa: Pueyaso secojojua tiajiniaaco nujuaretasocoriquiano pueyamaanu cashacucuaraca noshiquioriquiano casaa. Cuno casamiiri orojiniji platajiniji shipinijiosocoriquiano quiriquiaa. Naacuatej, Pueyaso secojojua tiajiniaaco nujuatacoriquiano oroori tariucua na niiquia shanacujusano quiriquiaa. Camarnu Davidri tari niishiriquiaa taa niiquia puetunu cuno casamijianaa jiitianutaniyanij, jaara tariucua jeecojosano quiri. 16Camarnu Davidri socua oro platajaaja niquitioree pueyamaanu miaqueja casaa jeecojotajara. Cuno miaquejaari Pueyasora jiyatesano jatiqui niaretasano pan niojojuara quiriquiaa. 17Naajuhuaj, camarnu Davidri socua oro niquitioree neyanu Salomoon, puetunu nio casamijianaa na jeecojonura tiji. Plata niquitioree naajaariuhuaj. Naacuatej, nio casamiiri oro, platajiniji jeecojosocoriquiano quiriquiaa: pueyamaanu juhua camatano cashacu niquishano, naseecajinia pueraquetaja casaa; pueyamaanu ratutaja suhuocorau; pueyamaanu na shuucuaji cashacucuaraca shiirijiaa patacocuajuhuaj; queraatia shiirijiaa ratutaja casaajaajanio. Puetunu nio casamijianaari orojiniji platajiniji miishocoriquiano quiriquiaa. Oro niiquiaari naacua maninia shanacujusano quiriquiaaquij, puetunu nio casamiicuajanaa puecojosocoriquiano. 18Na queeri socua oro niquitioree Salomoon. Cuno oroori tariucua curuutuucaaju quiriquiaa. Naacuatej, saa jiyanojaari quiriquiaa cuno oro. Cuno oroori shanohua jaanutaja catijiaja juhuacuturano quiriquiaa. Salomoonri oro niquitiosaareejuhuaj, nesuhuaraca juhua pueyano niquishano casaa jeecojotajara. Cuno casaari Pueyaso quijia cojee caco teecojua.
19Puetunu camarnu David seeratasano neyanu Salomoonni, puetunu cunojuanaari naajiotasano quiriquiaa. Cuno naajiojiniani, Pueyasoori tii sequequiaari taa puetunu casaajanaa nojori miiniutianiyani. Pueyasocuajaari David niquitiquiaari maatucua taa puetunu cuno casaajanaa jeecojoreni.
20Camarnu Davidri jiyacari neyanu Salomoon sequeree: “Quiarijia quioojia quia cumaquiri. Maja taacanuunu. Ritia quia coteere poonijionu. Majaari na miiniu tarinitianu. Majaari puerenujuhuaj. Cua camarnu Pueyasocuajaari quia cojiriquiano. Nojuacuajaari quia naacunutaniyajuhuaj quiaa cuaara tucuataara tianu Pueyaso secojojua tiajaatijia puetunu na casamijianaanio. 21Niya quiyacuajaari Pueyaso secojojua tiajiniaaco cojecoriquiano pueya. Nojoricuajaari supuetana Leviicuajinio caneno pueya, cuno poonijiosano miiriquiano Pueyaso secojojua tiajiniaaconi. Poonijioriquiano queraatia pueyacuajaari niya quiya. Nojoriiri queraatia poonijiosano casaa miiniu niishijiacacuaja. Naajuhuaj, puetunu nio pueyajinijinio jiyaniijianucuajanaari quia tojitiuriquianocuaja puetunu pueyajanaanio.”
Currently Selected:
1 Croonicas 28: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
