Efesios 6
6
Pixab'anik chike alk'o'al y chike kichu-kiqaw
1Ix alk'o'al, ruma ix k'o puq'ab' ri Qaqaw, lik chikojo kitzij richu-iqaw ma lik e usuk' ri'. 2Chupa Rutzij Upixab' ri Dios ri nab'e tzij ku'an b'i'tisinik chike ri ke'anaw re, e wa':
Chaloq'oj kiq'ij rachu-aqaw,
3cha' jela' xaqi katel pan chi utz che ronoje
y kanajtir rak'aslem wara che ruwachulew. Éx. 20:12
4Ek'u ralaq ri k'o alk'o'al alaq, mapetisaj alaq koyowal ri alk'o'al alaq; ri 'ana alaq e chek'iyisaj alaq ruk' saqil q'ilonik y chepixab'aj alaq cha' keb'in chupa ri Q'ijsaq re ri Qanimajawal.
Pixab'anik chike ri e mokom y chike ri e patrón
5Yey ralaq ri alaq mokom, e lik kojo alaq kitzij ri patrón alaq wara che ruwachulew. Chakuna k'u alaq chi utz ruk' jun saqil xi'in ib' pa anima' alaq y ruk' ronoje k'u'x alaq pacha' e kanimaj alaq ri Cristo ruk' ri chak alaq. 6Na utz ta k'u ri' we juna mokom xew kachakun chi utz echiri' katzutzu'x ruma rupatrón cha' jela' katak'ab'ax uq'ij. Ri 'ana alaq e k'utu alaq paqatzij wi alaq aj chak re ri Cristo. Chakuna k'u alaq ri' ruk' ronoje k'u'x alaq cha' jela' ka'an alaq janipa ri karaj ri Dios. 7Ma ralaq na xa ta alaq umokom juna achi; e uwari'che, 'ana alaq pacha' e ri Qanimajawal Jesucristo ri kanimaj alaq ruk' ri chak alaq. Chakuna k'u alaq ri' ruk' ronoje k'u'x alaq. 8Eta'am k'u alaq k'o rajil uk'axel ri utz kaqa'ano y wa' e ri Cristo kaya'w chiqajujunal, tob' kachakun jun ruk' juna patrón o xa pa re jun kachakun wi.
9Ek'u ralaq ri alaq patrón, 'ana alaq ri utz chike taq ri mokom alaq ma e karaj ri' ri Dios che alaq. Maxib'ij ne alaq kipa ruk' k'ax. K'una chik'u'x alaq, e ralaq alaq jela' pacha' rike, ma junam kuk' rike k'o alaq puq'ab' ri Qanimajawal k'o chila' chikaj. Yey chwach Rire xa jun qawach qonoje.#Ro. 2:11
Qachapab'ej ri to'b'al qe uya'om ri Dios
10K'isb'al k'u re, kamb'i'ij che alaq hermanos, chuq'ub'ej ib' alaq chwach ri Qanimajawal Jesucristo ruk' runimal uchuq'ab' Rire. 11'Ana k'u e alaq che ronoje taq ri to'b'al kuya ri Dios#6:11 “Ri to'b'al kuya ri Dios”: Pa kaxtila wa' kab'i'x “la Armadura de Dios” che. Wa' e jun k'amb'al na'oj puwi ri to'b'al kuya ri Dios chiqe. Wa' e pacha' taq ri chapab'al re juna soldado. che alaq cha' jela' kach'ij alaq uchuq'ab' taq ri sokoso'nik re ritzel winaq. 12Ma ri'oj oj k'o pa ch'a'oj. Pero wa ch'a'oj na e ta kuk' tikawex keqam kulewal kipoqlajil, e kuk' taq itzelilaj uxlab'ixel e k'o xa pa tew, ri lik k'o kichuq'ab' re ketaqan pakiwi taq ri e k'o pa q'equ'm wara che ruwachulew. Kuk' taq rike ri qach'a'oj. 13Ruma k'u wa', lik chirajawaxik che alaq chuk'a'aj alaq ronoje taq ri to'b'al qe kuya ri Dios, cha' jela' kach'ij alaq uchuq'ab' taq ri na utz taj kape pawi' alaq. Y jek'ula', we xk'is wa' wa ch'a'oj chi'ij alaq, k'a tikil alaq jusuk'.
14E uwari'che lik chuq'ub'ej ib' alaq chupa ri Q'ijsaq jela' pacha' juna aj chak kukoj rupas cha' kuxim rupa chi utz. K'ola alaq jusuk' y lik chajij alaq ri b'inik silab'ik alaq jela' pacha' juna soldado ch'uqutal ruwa uk'u'x ruk' jun ch'ich'. 15Xaqi yijb'a' ib' alaq che utzijoxik ri Utzilaj Tzij re ri utzil chomal jela' pacha' juna soldado xaqi ukojom ruxajab' re kuto'b'ej ri raqan che taq ri kik'ow wi. 16Y chwi ronoje taq wa', tikila chi utz ri kub'ulib'al k'u'x alaq ruk' ri Dios, ma wa' che ralaq e pacha' ri juperaj ch'ich' ruk'a'am juna soldado puq'ab' re kuchup ri aq' k'o chutza'm ri flechas kak'aq lo che. Jek'ula' ri kub'ulib'al k'u'x ralaq e to'b'al e alaq cha' kach'ij alaq uchuq'ab' taq ri k'aqanik ku'an lo ritzel winaq che alaq. 17Tikila alaq chi utz chupa ri kolob'etajik ya'tal che alaq jela' pacha' juna soldado kukoj rucasco re ch'uqub'al rujolom. Y chapab'ej alaq chi utz Ruch'a'tem ri Dios, ma wa' e pacha' juna espada ya'tal che alaq ruma ri Ruxlab'ixel ri Dios cha' kach'o'jin alaq chirij ritzel winaq. 18'Ana k'u alaq orar chipaq'ij chichaq'ab'. Lik tz'onoj alaq che ri Dios e chirij janipa ri kub'i'ij ri Ruxlab'ixel che alaq. Makos ne alaq che u'anik orar; e xaqi 'ana alaq orar pakiwi konoje rutinamit ri Dios. 19Kantz'onoj ko che alaq 'ana alaq orar panuwi ri'in cha' ri Dios kuya nuch'a'tem y jek'ula' na kanxi'ij ta k'ana wib' kantzijoj ri Utzilaj Tzij uq'alajisam ri Dios chiqawach. 20Ma intaqom lo ruma ri Dios, in q'alajisay re ri Utzilaj Tzij y ruma ne wa' in k'o pa presoyil wo'ora. E uwari'che tz'onoj alaq che ri Dios cha' na kanxi'ij ta k'ana wib' che uq'alajisaxik puwi Rire, ma e taqal ri' chwe.
Ri Tíquico kuk'am b'i urason ri Pablo
21Ronoje taq ri nuk'ulumam y ri kintajin che u'anik, ku'tzijoj pan ri Tíquico che alaq. Rire e jun utzilaj aj chak re ri Qanimajawal Jesucristo y na loq' ta k'ax kana'w re. 22E uwari'che nutaqom b'i chila' uk' alaq cha' keta'maj alaq sa' ri qa'anom ri'oj y jek'ula' ku'nimarisaj pan k'u'x alaq.
Ri Pablo kutz'onoj utzil chomal puwi riglesia k'o Éfeso
23K'ulu alaq ri utzil chomal, ri rutzil k'u'xaj y ri kub'ulib'al k'u'xaj, ri petinaq ruk' ri Qaqaw Dios y ruk' ri Qanimajawal Jesucristo. 24K'ulu k'u alaq ri unimal rutzil uk'u'x ri Qanimajawal Jesucristo, onoje alaq ri lik k'ax kana' alaq Rire ruk' rutzil k'u'xaj na jinta uk'isik. Amén.
Currently Selected:
Efesios 6: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.