2 Corintios 1
1
Ri Pablo kuya pan rutzil kiwach ri hermanos e k'o pa ri tinamit Corinto
1Ri'in in Pablo in taqo'n re ri Qanimajawal Jesucristo ma e ri Dios ya'yom wa chak chwe. Ri'in junam ruk' ri hermano Timoteo kaqaya pan rutzil wach alaq, ri alaq utinamit ri Dios re riglesia k'o Corinto, y chike konoje ri hermanos ejeqel chupa ronoje taq ri luwar re Acaya.#1:1 Corinto e jun tinamit k'o pa ri luwar re Acaya. 2K'ulu k'u alaq ri unimal rutzil k'u'xaj y ri utzil chomal re ri Qaqaw Dios y re ri Qanimajawal Jesucristo.
Ri b'ochib'al qak'u'x kuya ri Dios
3¡Lik nim uq'ij ri Dios, Ruqaw ri Qanimajawal Jesucristo! Ma e Rire ri lik kuk'ut ri k'axna'b'al uk'u'x chiqe y ruk' Rire kape wi ri b'ochib'al qak'u'x. 4Rire e kab'ochi'in qak'u'x chwach ronoje k'axk'ob'ik, cha' jela' ri'oj utz kaqab'ochi'ij kik'u'x ri e k'o chupa ronoje k'axk'ob'ik. Kaqaya k'u ri b'ochib'al k'u'xaj jela' pacha' ri uya'om ri Dios chiqe ri'oj. 5Ma echiri' kanimar ri k'axk'ob'ik paqawi' ruma oj re ri Cristo, e lik kanimar ri b'ochib'al k'u'xaj kuya ri Cristo chiqe. 6Echiri' ri'oj kaqatij k'ax yey ri Dios kub'ochi'ij qak'u'x, wa' kuk'am lo b'ochib'al k'u'xaj y kolob'etajik re ri Dios che ralaq. Jek'ula' ri k'ax qatijom y ri b'ochib'al k'u'xaj qak'ulum ri'oj, lik k'o kutiqoj che alaq cha' jela' kach'ij alaq uchuq'ab' ri k'axk'ob'ik pacha' ri qik'owib'em ri'oj. 7Lik qajikib'am k'u uwach ri kub'ulib'al qak'u'x uk' alaq. Ma qeta'am alaq jun quk' ri'oj chupa ri k'axk'ob'ik, jek'ula' alaq jun quk' ri'oj che uk'ulik ri b'ochib'al k'u'xaj kuya lo ri Dios.
8Kaqaj k'ut, hermanos, keta'maj alaq janipa chi k'axk'ob'ik xqik'owib'ej chila' Asia. Ruma wa unimal k'axk'ob'ik xpe paqawi', xqana'o na jinta chi qachuq'ab' che uch'ijik wa' y xqach'ob' nenare' na jinta chi pa saq kojk'asi'ik. 9E xqana' ri'oj e pacha' q'atom chi tzij re kamik paqawi'. Pero k'o xutiqoj chiqe ri xqik'owib'ej, ma ruk' wa' xqamajo na jinta uchak ri kakub'i' qak'u'x chiqib'il qib'; xew e kub'ul qak'u'x ruk' ri Dios, ri keb'uk'astajisaj lo ri ekaminaq. 10Ri Dios e xojesan chwa wa kamik yey k'a katajin ne che qato'ik. Kub'ul k'u qak'u'x ruk', ma qeta'am ruk' ruto'b'al Rire kojel pan chi utz wo'ora y chiqawach apanoq. 11Y ralaq kojto' ne alaq echiri' ka'an alaq orar paqawi' chwach ri Dios. Jek'ula' we e k'i ri xeb'anaw re wa', e k'i ri' ri ketioxin chwach ri Dios ruma ri ku'an Rire quma ri'oj.
Ri Pablo kuq'alajisaj su'b'e na xik'ow ta Corinto
12K'o ri kuya ki'kotemal chiqe; wa' e ri qab'inik qasilab'ik qak'utum chiwach ralaq y chikiwach konoje ri winaq, ma kaqana' chiqak'u'x lik saqil y jusuk' ri qab'inik jela' pacha' ri karaj ri Dios. Yey wa qa'anom na e ta ruma unimal na'oj re ruwachulew; e ruma ruto'b'al ri Dios quk'. 13Janipa ri kajilaj alaq che ri qacartas, lik e qana'oj ri' che alaq cha' jela' kamaj alaq usuk'. 14Wo'ora majom alaq usuk' jub'iq' puwi ri qa'anom; qoye'em k'u ri q'ij echiri' kamaj alaq usuk' ronoje, cha' jela' pa ruk'unib'al ri Qanimajawal Jesucristo lik kaki'kot alaq chiqe ri'oj, jela' pacha' ri'oj kojki'kot che ralaq.
15Ruk' k'u wa kub'ulib'al nuk'u'x uk' alaq, xuaj kinik'ow nab'e uk' alaq cha' jela' kalaj kak'ul alaq ri relej nuk'u'x, 16ma xinch'ob'o kinik'ow uk' alaq echiri' kin'ek Macedonia y kinik'ow tanchik echiri' kanmaj b'i nub'e Judea y jela' kinto' b'i alaq che ri nub'enam. 17Jela' ri xinch'ob'o kan'ano, tob' na e ta xu'ana'. Ruma k'u la', laj chiwach ralaq na xinch'ob' ta chi utz sa' ri kan'ano. ¿Xa nawi pa we ri'in kanch'ob' raqan ri kan'ano? ¿O xa nawi keb' uwa ri nuch'a'tem, pacha' junoq kub'i'ij: «Lik jikil uwach kin'ek,» tob' reta'am chirib'il rib' na ke'ek taj? 18No'j ri'in na je ta la' kan'ano. Ma ruma lik jusuk' ri Dios quk', na utz ta k'u ri' we ri qach'a'tem keb' uwach ke'elawi chiwach alaq. 19Jek'ula' ri Qanimajawal Jesucristo, Ruk'ajol ri Dios, ri xojtzijon puwi' che alaq junam kuk' ri Silvano y ri Timoteo, ruch'a'tem Rire na keb' ta uwach ke'elawi; ma ronoje ri kub'i'ij lik qatzij. 20Yey ruma Rire e ku'ana janipa taq rub'i'tisinik ri Dios quk'. E uwari'che kaqayak uq'ij ri Dios, kaqab'i'ij «Are'» y «Amén» che ronoje ri ub'i'im lo chiqe. 21Yey e ri Dios ri kujikib'a' qak'u'x chi utz ruk' ri Cristo junam uk' alaq y xojucha'o cha' koju'an re Rire. 22Ek'u Rire uya'om ri Ruxlab'ixel pa qanima', k'utub'al re oj k'o chi puq'ab' yey ku'ana na k'u ronoje ri ub'i'tisim lo chiqe.
23Lik karil ri Dios ri k'o pa wanima' y reta'am k'ut su'b'e na xinik'ow ta chila' Corinto pacha' ri xinch'ob'o. E ma na xuaj taj kok b'is chik'u'x alaq ruma kanch'a'b'ej pa alaq.#1:23 Ri Pablo xuto k'o jun hermano chila' Corinto xmakunik y ri nik'aj hermanos na xeb'ok ta il che wa mak. Kil 1 Corintios 5:1. E uwari'che na xraj taj kopon kuk' we k'amaja' kakiyijb'a' wa'. Ek'u ri xu'ano, e xtz'ib'an pan chike cha' kakiyijb'a' wa' y jela' rire utz kopon kuk' ruk' utzil chomal. 24Na e ta k'u koje'taqana pawi' alaq chwi ri kojom alaq; ma ruma ri kub'ulib'al k'u'x alaq, tikil alaq chi utz. Ri kaqa'ano e kojchakun uk' alaq cha' kak'oji' ri ki'kotemal pa anima' alaq.
Currently Selected:
2 Corintios 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.