2 Corintios 2

1Ruma k'u la', xinch'ob'o na kinopon ta tanchi uk' alaq, ma na xuaj taj kanya alaq pa b'is. 2Ma we ri'in kanya alaq pa b'is, ¿china chi k'u ri' kaya'w ki'kotemal chwe ri'in? Na jinta k'u nuki'kotemal ri' we nuya'om alaq pa b'is. 3Ruma k'u ri' xintz'ib'an pan che alaq,#2:3 Kil nota 2 Corintios 1:23. cha' we xinopon uk' alaq, na kinya ta alaq pa b'is, ma ki'kotemal ri kanwoy'ej che alaq. Lik k'ut kub'ul nuk'u'x uk' onoje alaq, ma weta'am e janipa ri kuya ki'kotem chwe ri'in, kuya ki'kotem che ralaq. 4Na xa ta jub'iq' ri k'ax y ri paxib'al k'u'x xinik'ow wi echiri' ruk' oq'ej xintz'ib'an pan che alaq. Na xin'an ta k'u wa' cha' kanya alaq pa b'is, ma e xin'ano cha' keta'maj alaq lik nim ri rutzil nuk'u'x che alaq.

Kuyu alaq umak ri jun xutzelej utzij

5Xintz'ib'an k'u pan puwi ri jun xinuya ri'in pa b'is ruma rumak u'anom. Y na xew ta ri'in, ma laj ne uya'om onoje ralaq pa b'is. (Kamb'i'ij “Laj” cha' na lik ta k'ax katataj wa nuch'a'tem.) 6Ku'an na k'u la' janipa ri x'an alaq che wa jun tikawex echiri' xq'at alaq tzij puwi', ma ruk' wa' xutzelej utzij. 7Ek'u ri taqal che ka'an alaq wo'ora e kuyu alaq umak y b'ochi'ij alaq uk'u'x cha' jela' na kasach ta ruma runimal ub'is. 8Kantz'onoj k'u ko che alaq k'utu tanchi alaq ri rutzil k'u'x alaq che. 9Ri xuaj ri'in ruk' wa carta e kanwilo we kok alaq il che ronoje ri nupixab'anik. 10We ralaq kakuy alaq umak junoq, jela' ri'in kankuy umak. We k'o k'u kajawax wi kakuy umak, ri'in nukuyum chi umak uma ralaq y chupa rub'i' ri Cristo. 11Kan'an k'u wa' cha' ri Satanás na kumaj ta uchuq'ab' paqawi', ma lik qeta'am chi runo'jib'al chiqij.

Ri Pablo xraj kuto sa' u'anom riglesia k'o Corinto

12Echiri' xinopon chupa ri tinamit Troas che utzijoxik ri Utzilaj Tzij re ri Cristo, lik chom ri jeqeb'al re ri nuchak xuya ri Qanimajawal chwe; 13na ruk' ta k'u ri', na xkub'i' ta ri wanima', ma na xinriq ta ri hermano Tito chila'. Ruma k'u ri', xeb'enuya kan ri hermanos e k'o Troas y ximpe Macedonia cha' ko'lnutzukuj.#2:13 Ri Pablo lik roye'em kirason ri hermanos e k'o Corinto, ma karaj kareta'maj we xutzir ri problema e k'o wi. Kil 2 Corintios 7:5-16.

Ri chomilaj chak uya'om ri Dios chiqe

14¡Xa maltiox k'u che ri Dios! Ma kojel pan chi utz chwa ronoje ruma ri Cristo, yey ya'tal chiqe kaqaq'alajisaj ruk'u'x Rire. Ma quma ri'oj ke'ek utzijoxik ri Cristo che ronoje luwar, e pacha' kunab'al ki' ruxlab' kamuyuyik. 15Oj k'u pacha' kunab'al lik ki' ruxlab' kamuyuyik kopon chwach ri Dios, ma quma ri'oj kaq'alajin ruk'u'x ri Cristo chikiwach ri kekolob'etajik y chikiwach ri katajin kisachik. 16Ek'u rutzijoxik kaqa'ano e pacha' utewul kamik chikiwach ri na kakaj ta kakito, ma kuk'am lo kamik pakiwi'. No'j chikiwach ri kek'uluw re, e pacha' kunab'al ki' ruxlab', ma kuk'am lo chomilaj k'aslemal chike. Chwach k'u wa' wa nimalaj chak re ri Dios, ¿china kach'ijow u'anik?#2 Co. 3:5

17Ri'oj na kaqa'an ta pacha' ri kaki'an jujun, ma e k'i ri kijalk'atim Ruch'a'tem ri Dios, xa ki'anom ch'akab'al puaq che rutzijoxik; no'j ri kaqa'an ri'oj chwach ri Dios y pa rub'i' ri Cristo, e kaqatzijoj pa saqil wi ri Tzij uya'om ri Dios chiqe.

Currently Selected:

2 Corintios 2: acrN

Highlight

Copy

Compare