2 Timoteo 2

Ri Pablo kupixab'aj ri Timoteo cha' kuchuq'ub'ej rib' chwach taq ri k'axk'ob'ik

1Timoteo, ri at pacha' nuk'ajol chupa rub'i' ri Cristo. Kamb'i'ij k'u chawe lik chachuq'ub'ej awib' che u'anik ronoje ri ya'om chawe ruma ri unimal rutzil uk'u'x ri Qanimajawal Jesucristo. 2Janipa k'u ratom chwe chwi ri k'utunik nu'anom chikiwach ruk'iyal winaq, e chaq'atisaj ri' pakiq'ab' rachijab' kub'ul ak'u'x kuk' ruma kakiriq uk'utik wa' chikiwach ri jujun chik.

3Ek'u ri'at, chakuyu ronoje ri k'axk'ob'ik kape pawi' pacha' ku'an juna saqil soldado re ri Qanimajawal Jesucristo. 4Ma juna saqil soldado na karoq'otaj ta kan ri taqom che cha' e ke'ek che u'anik ri karaj rire; ri ku'ano e xew lik kok il che ri chak ya'tal puq'ab' ruma rutaqanel. 5Jek'ula', junoq kak'alalik#2:5 Ri ch'a'tem pa ri ch'a'tem griego e “atleta” o “deportista”. Ri kek'alalik, ri kaki'an kib' pa t'o'y, ri keb'etz'an pa pelot o ri kakijunimaj kichuq'ab' chikiwach, rike e “atleta”. na kuch'ak ta ri' ri premio we na kak'alal ta e chirij rusuk' pacha' ri kutz'onoj wa etz'anem. 6Jek'uri'la', juna aj chak xew ku'an molonik we nab'e na kuchakuj rulew. 7Timoteo, lik chach'ob'o raqan wa kamb'i'ij chawe; we ka'an wa', ri Qanimajawal kuya ana'oj cha' kamaj usuk' ronoje.

8E k'una chak'u'x ronoje ri xrik'owib'ej ri Qanimajawal Jesucristo, ri xupeteb'ej lo che ri rey David y ri xk'astaj lo chikixo'l taq ri ekaminaq jela' pacha' ri kub'i'ij ri Utzilaj Tzij kantzijoj ri'in. 9Yey e ruma kantzijoj wa Utzilaj Tzij, in k'o pa k'axk'ob'ik yey inya'om pa cárcel pacha' in jun achi lik in aj palajiy tzij. Tob' k'u ri'in inya'om pa karena, ri Utzilaj Tzij re ri Dios na yututal taj, ma xaqi ke'ek utzijoxik. 10Kanch'ij k'u uchuq'ab' ronoje ri k'axk'ob'ik kape panuwi' xa ruma k'ax keb'enuna' taq ri eb'ucha'om ri Dios, cha' rike kakiriq ri kolob'etajik na jinta utaqexik, ri kaya'i' chike ri kakub'i' kik'u'x ruk' ri Qanimajawal Jesucristo.

11Wa' wa ch'a'tem lik qatzij:

We xojkam ruk' ri Cristo,#2:11 Wa' e ke'elawi: We xqaya kan ri ojer qab'inik qasilab'ik, e pacha' oj kaminaq chi che ri mak.

kojk'asi' na ri' ruk' Rire.

12We kaqach'ij uchuq'ab' ri k'axk'ob'ik ruma Rire,

chiqawach apanoq kojtaqan ruk' Rire chila' chikaj.

No'j we ri'oj kaqab'i'ij na oj ta re Rire,

jela' ku'an Rire quk' chiqawach apanoq,

kub'i'ij k'u ri' na reta'am ta qawach.

13We ri'oj na kakub'i' ta qak'u'x ruk';

na ruk' ta k'u ri', Rire lik e ku'an janipa ri ub'i'im kanoq,

ma Rire na ku'an ta k'ana raq'ub'al.

Ri jusuk' kib'inik kisilab'ik ri kikojom rub'i' ri Cristo

14Chakuxtaj wa' chike ri e raj chak ri Dios y lik cheb'apixab'aj pa rub'i' Rire, cha' mech'o'jin chwi taq ch'a'tem na jinta utz kuk'am loq, ma xew kuk'am lo sachib'al na'oj chike ri ketaw re. 15Ri'at lik chachuq'ub'ej awib' cha' lik jusuk' rab'inik asilab'ik chwach ri Dios y jela' at jun aj chak na jinta k'o katk'ix che, e xaqi katzijoj chi jusuk' ri Tzij re ri Q'ijsaq. 16Ma'an awe'at kuk' ri kech'a't chwi taq ri na re ta ri Dios y na jinta uchak. Ma ri ke'anaw re wa', e ketajin che resaxik kib' chirij ri Dios. 17Yey ri kich'a'tem kusachisaj ri kina'oj taq ri ketaw re, e pacha' juna yab'il kaq'ayisanik. Y e xki'an wa' ri Himeneo y ri Fileto. 18Rike xkiya kan ri Q'ijsaq ma kakib'i'ij ri k'astajib'al ke ri e re ri Cristo, ya xu'ano.#2:18 Rike kakib'i'ij, tob' ri Dios kuya jun k'ak' k'aslemal chiqe wo'ora, na kuya ta jun k'ak' cuerpo chiqe chiqawach apanoq. Ruma k'u ri kakik'ut rike, e k'o jujun katajin usachik kina'oj puwi ri Q'ijsaq. 19Na ruk' ta k'u ri', rutinamit ri Dios lik tikil chi utz pa ri Q'ijsaq, ma rike e pacha' juna kowilaj utikib'al juna ja pa tz'ib'ital wi: «Ri Dios lik reta'am china ri e re Rire»#Nm. 16:5 y «Konoje k'u ri kakib'i'ij e re ri Cristo, chirajawaxik kakesaj kib' che taq ri na jusuk' taj.»

20Chupa juna nimalaj ja k'o taq ri chapab'al re oro y re plata, ri lik xa q'alaj pa kachapab'ex wi; yey k'o ne taq chapab'al re che' y ulew na lik ta chom, ri xa tob' pa kachapab'ex wi. 21Jek'uri'la' e junoq karesaj rib' che taq ri mak, chom ruchapab'exik ka'an ruma ri Dios, chom u'anom rub'inik usilab'ik y lik k'o uchak che ri Qanimajawal, ma kuriq u'anik uk'iyal chomilaj chak.

22Timoteo, chatanimaj k'u chwach ronoje taq ri rayib'al re tzaqib'al ke ralab'o. Yey junam kuk' konoje ri kakiloq'nimaj rub'i' ri Qanimajawal Jesucristo ruk' ronoje kik'u'x, e chatijoj awib' che u'anik ri lik jusuk' chwach ri Dios, kub'ula ak'u'x ruk', chak'utu ri rutzil k'u'xaj y chatk'ola chi utzil chomal kuk' konoje. 23Maya axikin chike ri kakichapala' kib' pa ch'a'tem na jinta uchak, ma aweta'am chik la' xa kuk'am lo ch'a'oj. 24Ma e juna aj chak re ri Qanimajawal Jesucristo chirajawaxik che na aj ta ch'a'oj, xaqi utz uk'u'x kuk' konoje, lik kak'utun chi utz y lik nim uk'u'x kuk' konoje. 25Ruk' chomilaj ch'a'tem keb'uq'il taq ri kakiyak kib' chirij ri Q'ijsaq; ma k'axtaj ruk' wa', ri Dios kuya chike kakitzelej kitzij chwach y kaketa'maj ri Q'ijsaq, 26y jek'ula' keb'el puq'ab' ritzel winaq y na kaki'an ta chik sa' ri karaj rire.

Currently Selected:

2 Timoteo 2: acrN

Highlight

Copy

Compare