2 Tesalonicenses 2
2
Ri itzelilaj achi kayaktaj chirij ri Cristo
1Chwi k'u ruk'unib'al ri Qanimajawal Jesucristo echiri' kaqamol qib' ruk' Rire,#1 Ts. 4:17 lik kaqatz'onoj che alaq hermanos, 2chajij ib' alaq cha' na kasach ta ri na'oj alaq puwi wa'. Maxi'ij k'u ib' alaq we k'o junoq kub'i'ij: «E uq'ijol wa' ruk'unib'al ri Qanimajawal,» tob' ne kub'i'ij q'alajisam wa' che ruma ri Ruxlab'ixel ri Dios o xtzijox che o xtz'ib'ax pa carta lik e pacha' quma ri'oj tz'ib'italik. 3Maya k'u ib' alaq kasokotaj alaq, ma nab'e na kak'un ri q'ij echiri' uk'iyal winaq kakik'aq b'i uq'ij ri Dios y kuq'alajisaj k'u rib' ri jun itzelilaj achi, ri k'o chi ri q'atb'al tzij re ri Dios puwi' re kasachisax uwach. 4Ek'u wa' wa'chi kayaktaj chirij ri Dios y chirij ronoje taq ri kaloq'nimax uq'ij kuma ri winaq, wa' e taq ri ki'anom tiox che. Rire ke'tz'ula ne chupa ri Rocho Dios, ku'an che rib' pacha' e Dios y kuk'amb'ej ne uwach ri Dios. 5¿Na kak'un ta neb'a chik'u'x alaq, echiri' k'a in k'o uk' alaq, ximb'i'ij wa' che alaq? 6Eta'am chi k'u alaq sa' ri q'atab'eyom re ri k'utub'al uwach rire waq'ij ora cha' e kuk'utub'ej uwach k'a echiri' kopon na ruq'ijol uch'ob'om chi lo ri Dios. 7Ritzel winaq katajin chi che ukojik pa kijolom ri winaq keyaktaj chirij ri Dios tob' rike na kakina'b'ej taj we e rire ka'anaw wa'. Wo'ora k'a k'o ri q'atab'eyom re, pero echiri' kesax ri q'atab'eyom re, 8k'a ek'uchiri' kuk'utub'ej uwach ri jun itzelilaj achi. Yey echiri' kak'un tanchi ri Qanimajawal ruk' unimal uchuq'ab', Rire ruk' ri ch'a'tem#2:8 “Ruk' ri ch'a'tem”: Pa ri ch'a'tem griego kub'i'ij “ruk' ri xut'ub'al”. kel lo puchi' kukamisaj y kusach k'u uwach wa jun itzelilaj achi.
9Echiri' kak'un wa' wa jun itzelilaj achi, ku'an nimaq taq k'utub'al y milagros ruk' ri unimal chuq'ab' ya'tal che ruma ri Satanás. Ronoje k'u ri' wa', ku'an ruk' sokoso'nik, ma e pacha' ku'an wa' ruk' ruchuq'ab' ri Dios. 10Yey ku'an uk'iyal uwach taq mak cha' keb'usok ri tikawex, ri xa kesachik ruma na xkaj taj kakik'ul ri Q'ijsaq cha' kekolob'etajik. 11Ruma k'u wa', ri Dios kuya luwar kesokotaj ruma ruchuq'ab' ritzel; ek'u rike e kakikoj ri xa raq'ub'al. 12Jek'ula' kek'oji' chuxe' ri q'atb'al tzij konoje ri na xkikoj ta ri Q'ijsaq, ma e lik xe'ek kik'u'x ruk' ri na jusuk' taj.
Pixab'anik chike ri kekolob'etajik
13Ek'u ri'oj, hermanos, chirajawaxik xaqi kojtioxin chwach ri Dios uma ralaq ri lik k'ax kana' alaq ruma ri Qanimajawal, ma ri Dios ucha'om chi lo alaq chwi rujeqeb'al ruwachulew cha' kak'ul alaq ri kolob'etajik. Yey wa' e ruma xkoj alaq ri Q'ijsaq y ruma ri ku'an ri Ruxlab'ixel ri Dios, ri ku'an chom che ri b'inik silab'ik alaq. 14Ruma k'u wa', ri Dios xusik'ij alaq ruma ri Utzilaj Tzij xqatzijoj che alaq, cha' jela' kak'ul alaq ri yakb'al q'ij alaq ruma alaq re ri Jun lik k'o yakb'al uq'ij, wa' e ri Qanimajawal Jesucristo. 15E uwari'che hermanos, lik chuq'ub'ej ib' alaq y lik taqej alaq ri k'utunik qak'utum chiwach alaq y ri qatz'ib'am pana che alaq.
16Kaqa'an k'u orar pawi' alaq chwach ri Qanimajawal Jesucristo y chwach ri Qaqaw Dios, ri k'ax xna'w qe y xaqi kunimarisaj qak'u'x yey kuya chiqe kakub'i' pana qak'u'x che ri qoye'em ruma ri unimal rutzil uk'u'x. 17Kaqatz'onoj k'u che ri Dios chunimarisaj k'u'x alaq y chujikib'a' k'u'x alaq che ub'i'xikil y che u'anik ri lik utz.
Currently Selected:
2 Tesalonicenses 2: acrN
Highlight
Copy
Compare
Share
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
