2 Corintios 11

Ri kaki'an taqo'n chikib'il kib'

1Chinkuyu k'ana alaq we kinch'a't k'enoq pacha' junoq ch'u'jerinaq. 2Kan'an k'u wa' ma lik k'ax kanna' alaq, yey wa k'axna'b'al nuk'u'x che alaq e ri Dios kojoyom pa wanima'. Ma ri'in nuya'om alaq puq'ab' ri Cristo y xew puq'ab' Rire kuaj k'o alaq. E pacha' juna achi echiri' kuya rumi'al puq'ab' juna ala pa k'ulanikil. Ri karaj rachi e kuya puq'ab' rala jun saqil q'apoj ali. Jek'ula' ri kuaj ri'in che ralaq e na jinta k'ana ch'ul che alaq chwach ri Cristo. 3Lik kub'isoj nuk'u'x ma k'axtaj kak'ulumaj e alaq jela' pacha' ri xuk'ulumaj ri Eva ojertan echiri' xsokotaj ruma ri tzel uno'jib'al ri kumatz. Ma k'axtaj kajalk'ataj ri na'oj alaq, kesaj k'u ib' alaq puq'ab' ri Cristo y na kataqej ta chi alaq ruk' ronoje k'u'x alaq. 4Kamb'i'ij wa' ma echiri' kopon junoq uk' alaq, tob' junwi ri tzijonik ku'an puwi ri Jesús chwach ri tzijonik qa'anom ri'oj che alaq, ¡lik kak'ul k'u alaq ri'! Y kak'ul ne alaq ri petinaq ruk' juna chik uxlab'ixel, tob' na e ta ri Ruxlab'ixel ri Dios k'ulum chi alaq. Kak'ul ne alaq jun chik tzij, tob' junwi chwach ri Utzilaj Tzij kojom chi alaq.

5K'o ri kakib'i'ij e nimaq taq taqo'n yey kakitak'ab'a' kiq'ij. ¿K'o neb'a más kiwach rike chinuwa ri'in? Kanch'ob' ri'in, na jintaj. 6Ma tob' na kinch'a't ta ri'in ruk' nimaq taq ch'a'tem pacha' ri kaki'an rike, pero ri'in más k'o weta'am chikiwa rike; y wa' nuk'utum chiwach alaq ruk' ronoje ri nu'anom chixo'lib'al alaq.

7Laj k'o ri kakich'ob' raqan na jinta nuwach; ma echiri' xintzijoj ri Utzilaj Tzij re ri Dios che alaq, na xintz'onoj tane k'ana rajil ri nuchak. ¿K'o neb'a numak ri' chiwach alaq ruma wa'? Ma we xin'an ch'uti'n che wib', e cha' kanimarisax q'ij ralaq chwach ri Dios. 8Echiri' ri'in xink'oji' uk' alaq, e jujun chik iglesias ri xkitaq lo puaq chwe. Ek'u xink'am puaq chike rike cha' utz xinq'alajisaj ri Utzilaj Tzij chiwach ralaq. 9Ma echiri' in k'o uk' alaq yey k'o k'u xajawax chwe, na jinta xintz'onoj che ralaq. Ri xeto'w we e ri hermanos e petinaq Macedonia. Na jinta k'u xink'am che ralaq ma na xuaj taj xinya alk'ayew che alaq y na kuaj tane kan'an wa' chiqawach apanoq. 10Yey paqatzij wi ri Q'ijsaq re ri Cristo pa wanima' k'o wi; ruma k'u ri' kanjikib'a' uwach wa': E na jinta junoq chila' Acaya kesan re ri ki'kotemal kanna'o ruma na kanya ta alk'ayew che alaq. 11Chiwach ralaq, ¿sa' nawi ub'e na kantz'onoj ta wajil che alaq? ¿Ruma nawi na k'ax ta kanna' alaq? Na e ta ri', ma ri Dios lik reta'am sa' ri k'o pa wanima'.

12Ek'u ri na kantz'onoj ta wajil che alaq, na kanwoq'otaj ta u'anik cha' jela' kaq'alajinik na junam ta kojchakun ri'oj pacha' ri jujun chik, ri kakijunimaj ri kichak ruk' ri qachak ri'oj xa re yakb'al kiq'ij. 13Rike xa e sokoso'nel, na e ta saqil taqo'n ma ki'anom che kib' pacha' e taqo'n re ri Cristo. 14Makam k'u anima' alaq che wa'; ma jenela' ku'an ri Satanás, ku'an che rib' pacha' e jun ángel re Q'ijsaq. 15E uwari'che makam anima' alaq che we ri e aj chak re ri itzel winaq kaki'an che kib' pacha' e 'anal re ri jusuk'. Pero kopon k'u ri q'ij echiri' kakik'ul na ri tojb'al re ri na utz taj ki'anom.

16Jumul chik kamb'i'ij: Mach'ob' alaq we ri'in xinch'u'jerik. Yey we k'o junoq che alaq jela' kuch'ob'o, chuya'a luwar chwe kantak'ab'a' k'ana nuq'ij pacha' junoq ch'u'jerinaq. 17Ri kaqatak'ab'a' qaq'ij na e ta uk'utu'n ri Qanimajawal chiqe; pero kantak'ab'a' k'ana nuq'ij pacha' junoq na jusuk' ta runa'oj. 18Lik e k'i ri kakitak'ab'a' kiq'ij ruma ri kaki'an che ruwachulew, yey wo'ora kan'an k'ana we ri'in. 19Ralaq lik k'o na'oj alaq; na ruk' ta k'u ri', lik kek'ul alaq ri sachinaq kina'oj. 20E kuyum k'u alaq ri' rike tob' lik ketaqan pawi' alaq, kakichap ri e alaq y kakik'is ne rub'itaq e alaq, yey lik kaki'an nim che kib' chiwach alaq. ¡Kuyum ne alaq tob' kakipach' q'ab' chipalaj alaq! Ronoje wa' kuyum alaq y na jinta kab'i'ij alaq che. 21Laj k'ixb'al k'u chwe ri'in ma na xinch'ij ta u'anik pacha' ri kaki'an rike.

Pero we rike na kek'ix ta che kakitak'ab'a' kiq'ij, jek'ula' ri' kan'an ri'in, tob' ruk' wa' pacha' in ch'u'jerinaq. 22Rike kakitak'ab'a' kiq'ij ma e aj hebreo; jela' ri'in, in aj hebreo yey kanriq ri ch'a'tem hebreo. Rike kaki'an nim che kib' ma e kuk'il ri tinamit re Israel, jela' ri'in in kuk'il ri tinamit re Israel. Rike kakiyak kiq'ij ma e ralk'o'al kan ri Abraham; jela' ri'in, in ralk'o'al kan ri Abraham. 23Rike kakib'i'ij e aj chak re ri Cristo, jela' ri'in paqatzij wi in aj chak re ri Cristo yey más nim ri chak nu'anom ri'in chikiwa rike. Tob' kinch'a't pacha' in ch'u'jerinaq, kamb'i'ij k'u wa': Ri'in más in chakuninaq y más nutijom k'ax chikiwach rike. Ma uk'iyal laj b'alak'um nupa, uk'iyal laj inya'om pa cárcel, uk'iyal laj xtewun ri kamik panuwi'. 24Raj judi'ab' wo'ob' laj xkijich' nupa pa treinta y nueve asial.#Dt. 25:3 25Yey oxib' laj in 'anom pa b'arijon, julaj in 'anom pa'b'aj.#Hch. 14:19 Oxlaj ya laj in jiq'inaq pa ya' ruma xmuqutaj ri barco in k'o chupa, yey xinch'ij ne jun aq'ab' ruk' jun q'ij in k'o chwi ri mar. 26Uk'iyal laj nu'anom unimal b'e. Ya laj in jiq'inaq pa taq nimaya'. Ya laj in kaminaq pakiq'ab' eleq'omab' y pakiq'ab' ri na e ta kuk'il ri nutinamit. Ya laj inkamisam kuma ne ri watz-nuchaq'. Ya laj inkamisam pa taq tinamit, pa taq luwar katz'intz'otik y chwi ri mar. Ya laj ne inkamisam kuma ri kakib'i'ij kub'ul kik'u'x ruk' ri Cristo, tob' wa' na qatzij taj. 27Nutijom k'axlaj chak y kosik. Uk'iyal laj nukuyum waram, numik y tzajin chi'. Ruma taq ri lik k'o kan'ano, uk'iyal laj na utz ta chi ne xinwa'ik. Nutijom k'axk'olil tew y xinkanajik na jinta chi ne nuq'u'. 28Y xaqi uwi chi wa', ri jujun q'ij lik sa'chi rub'is nuk'u'x kuma taq riglesias; e kanna' ri'in wa' e pacha' jun eqa'n k'o panuwi'. 29We k'o junoq k'o pa k'ax y na jinta uchuq'ab', e kanna' ri'in pacha' in ri ink'ulumayom re wa'. We k'o junoq kumin junoq chik pa ri mak, wa' kuya woyowal.

30We chirajawaxik k'ut kanyak nuq'ij, ri tak'ab'al nuq'ij kan'ano e kantzijoj taq ri kuq'alajisaj, ri'in na jinta nuchuq'ab'. 31Ek'u ri Dios, Ruqaw ri Qanimajawal Jesucristo ri na jinta utaqexik nim uq'ij, e eta'mayom re na raq'ub'al ta wa kamb'i'ij. 32Tape k'u alaq ri xink'ulumaj Damasco: Ri aj wach k'o chwach ri rey Aretas xtaqan che kikojik e aj chajal re ri tinamit cha' kinkichapo. 33Yey ruma k'u ri' xinqasax lo chupa jun nimalaj chakach, ximom lo ruk' lazo chwi jun nimalaj tapia k'o ventana che.

Currently Selected:

2 Corintios 11: acrN

Highlight

Copy

Compare