2 Corintios 10
10
Ri Pablo kuto'b'ej rib' chikiwach ri kakik'aq b'i uq'ij
1Ri'in in Pablo kuaj kankoj wib' chiwach alaq chupa rub'i' ri Cristo, ri na ku'an ta nim che rib' y lik utz uk'u'x. Ma e k'o jujun chixo'lib'al alaq kech'a't chwij, kakib'i'ij echiri' in k'o uk' alaq, pacha' kanxi'ij wib' kanch'a'b'ej pa alaq; yey echiri' in k'o naj y kintz'ib'an k'u pan uk' alaq, na kanxi'ij ta k'ana wib' kan'an wa', kecha'. 2Kantz'onoj k'u che alaq choka alaq il che wa kantz'ib'aj pan che alaq, cha' we xinopon uk' alaq na kajawax ta chik kanch'a'b'ej kipa jujun che alaq. No'j we kajawaxik, kan'an na k'u ri' wa' chike ri kakib'i'ij xa pa qe ri'oj kojtaqanik. 3Qatzij, ri'oj xa oj tikawex, pero na kaqa'an ta qe'oj pacha' ri kaki'an ri winaq re ruwachulew. 4Ma echiri' kojch'o'jin chirij ri na utz taj, na kaqa'an ta ruk' qachuq'ab' o qana'oj ri'oj, ma e kaqa'an ruk' ruchuq'ab' y ruto'b'al ri Dios cha' jela' kaqasach uwach ronoje ri kayaktaj chirij ri Dios; 5wa' e ri itzel taq na'oj y tak'ab'al q'ij, ri keb'uq'atej ri tikawex cha' na kaketa'maj ta uwach ri Dios. Kaqaya k'u ronoje taq no'jib'al puq'ab' ri Cristo cha' ku'an pacha' runa'oj Rire. 6Echiri' kaqilo lik kakoj alaq utzij ri Cristo, k'a tek'uchiri' kaqaq'at tzij pakiwi ri e aj palajiy tzij.
7Ralaq xew kataqej alaq ri kilitaj uwach. We k'o k'u junoq ujikib'am uwach chirib'il rib' lik k'o puq'ab' ri Cristo, e chuch'ob'o chi utz wa': Na xew ta rire k'o puq'ab' ri Cristo, ma jenela' ri'oj. 8Y na xew ta ri', ma na kink'ix tane che tob' kanjikib'a' uwach ri taqanik kaqa'an pawi' alaq, ma wa' e ri Qajawal ya'yom paqaq'ab'. Y wa' na re ta sachib'al wach alaq, ma re k'iyib'al alaq chwach ri Dios. 9Na kuaj taj kach'ob' alaq raqan e kanxib'ij pa alaq ruk' ri kantz'ib'aj pan che alaq. 10Ma k'o keb'i'n re: «Ri Pablo chupa taq rucartas lik k'ax ri kub'i'ij, pacha' lik k'o uchuq'ab'; no'j echiri' k'o chiqawach, kuxi'ij rib' y na il tane uwach ruch'a'tem» kecha'. 11Ek'u ri keb'i'n re wa' chirajawaxik kaketa'maj na je ta la' u'anom, ma e janipa ri kaqatz'ib'aj pan che alaq, junam ub'i'xikil kaqa'ano echiri' oj k'o chiwach alaq.
12Ri'oj na kaqach'ob' tane kaqajunimaj qib' kuk' ri jujun xa kakitak'ab'a' kiq'ij chikib'il kib'. Ma rike xa kakijunimaj kib' kuk' ri kachb'i'il. Ri keb'anaw re wa', na jusuk' ta ri kina'oj. 13No'j ri'oj na kaqatak'ab'a' tane qaq'ij ruma juna chak na qa'anom taj, ma e kaqa'an ri uya'om ri Dios paqaq'ab'. Yey e Rire ri xuya chiqe xojopon k'a chila' uk' alaq ruk' ri Utzilaj Tzij. 14We tamaji e ri Dios ya'yom chiqe kojopon uk' alaq, ri' xa pa qe ri'oj kaqa'an ri chak uk' alaq. Pero na e ta ri'. Lik k'u taqal chiqe kaqapixab'aj pan alaq wo'ora, ma ri'oj oj ri nab'e xojopon uk' alaq ruk' ri Utzilaj Tzij re ri Cristo. 15Na kaqatak'ab'a' tane qaq'ij xa pa qe ri'oj ruk' ruchak jun chik. Ri qoye'em e jalan kanimar ri kub'ulib'al k'u'x alaq, jek'ula' kanimar ri qachak chixo'lib'al alaq e chirij ri uya'om ri Dios paqaq'ab'. 16Tek'uchiri' we xutzin ri qachak chixo'lib'al alaq, utz k'u ri' kojel b'i y koj'ek pa k'amaja' katzijox wi ri Utzilaj Tzij re ri Cristo, y jela' na ke'qamina ta qib' pa ri chak re jun chik, cha' na kaqatak'ab'a' ta qaq'ij ruk' ri chak na qa'anom ta ri'oj.
17China k'u ri karaj kuyak uq'ij,
e chuq'alajisaj ri' janipa ri u'anom
ri Dios Qajawxel che rub'inik usilab'ik Jer. 9:23-24
18Ma we jun kutak'ab'a' uq'ij xa chirib'il rib', ri' na jinta uchak ri ku'ano; no'j we e ri Dios kayakaw uq'ij, e q'alaj ri' utz ri chak u'anom.
Currently Selected:
2 Corintios 10: acrN
Highlight
Copy
Compare
Share
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
