1 Timoteo 6

Pixab'anik chike raj chak e k'o pakiq'ab' kipatrón

1Konoje raj chak e k'o puq'ab' juna patrón#6:1 “Raj chak e k'o puq'ab' juna patrón”: Kil “esclavo” pa vocabulario. e lik kiloq'oj uq'ij ri kipatrón che ronoje ri kaki'ano, cha' jela' na jinta junoq tzel kach'a't chirij rub'i' ri Dios y chirij ri saqil k'utunik. 2Yey we juna aj chak k'o upatrón ukojom chi rub'i' ri Cristo, much'ob'o: «Na chirajawaxik taj kan'an ri karaj ri nupatrón ma junam qawach qachaq' qib' chwach ri Dios.» Na ub'e taj kuch'ob' raqan wa'; ri lik usuk' e chu'ana más chi utz ruchak ma ri kunimaj e jun ukojom rub'i' ri Cristo y taqal k'u ri' che k'ax kana'ik. Wa' e k'utunik y pixab'anik cha'ana ri'at chike ri e aj chak.

Taq ri ke'ek kik'u'x ruk' ri b'eyomal xa re ruwachulew

3We k'o junoq junwi ri kuk'utu y na junam ta runa'oj ruk' ri saqil k'utunik re ri Qanimajawal Jesucristo y ruk' ri saqil b'inik chwach ri Dios, 4ri' na jinta reta'am tob' kuch'ob'o lik k'o una'oj. E ne lik ke'ek una'oj chwi taq ch'a'tem na jinta uchak, xa re sachib'al na'oj. Y taq wa' kuk'am lo retzelal k'u'x, ch'a'oj, k'axlaj ch'a'tem chikij jujun chik y na'oj na ub'e taj chikij jujun chik. 5Ruma k'u wa', e taq ri winaq sachinaq kina'oj y na jinta ri Q'ijsaq kuk', xaqi kakitzukuj ch'a'oj chikiwach. Rike kakich'ob'o, ri k'aslemal chwach ri Dios e re ku'an b'eyomab' chike. Ma'an k'u awe'at kuk'.

6Paqatzij wi lik k'o kutiqoj ri qak'aslemal chwach ri Dios, pero xew we kojki'kot ruk' ri k'o quk'. 7Ma na jinta quk'a'am loq echiri' kojalax wara che ruwachulew y paqatzij wi na jinta kaqak'am b'i echiri' kojkamik. 8E uwari'che we k'o qawa y k'o qaq'u', e chojki'kota ruk' wa'. 9No'j taq ri lik kakirayij keb'u'an e b'eyomab', ri' lik na k'ayew ta chike ketzaq puq'ab' ritzel y kechapataj ruma uk'iyal rayinik na jinta uchak. Yey wa' xew kuk'am lo uk'iyal k'axk'ob'ik pakiwi rike wo'ora y chiqawach apanoq. 10Ma ri rayinik re ri puaq e kuk'am lo uk'iyal taq mak. E k'o ne jujun lik e b'enaq kik'u'x ruk' ri puaq y ruma wa' kiya'om kan ri kub'ulib'al kik'u'x ruk' ri Cristo, y jek'ula' kitukel kiya'om kib' pa k'axk'ob'ik.

Pixab'anik che ri Timoteo

11No'j ri'at Timoteo, at jun raj chak ri Dios, chatanimaja k'u chwach ronoje taq ri na utz taj. E chatijoj awib' che u'anik ri jusuk' y ri utz chwach ri Dios, kub'ula ak'u'x ruk', chak'utu ri rutzil k'u'xaj, k'ola unimal k'u'xaj awuk' y cha'ana ch'uti'n che awib'. 12Chachuq'ub'ej awib' chi utz chupa ri Utzilaj Tzij akojom y e chatok il che ri k'aslemal na jinta utaqexik, ma ruma wa' xatusik'ij ri Dios y ruma wa' chikiwach uk'iyal tikawex xaq'alajisaj ri kub'ulib'al ak'u'x ruk' ri Cristo. 13Chupa k'u rub'i' ri Dios, ri aj ya'l k'aslemal che ronoje taq ri k'olik, y chupa rub'i' ri Qanimajawal Jesucristo, ri na xuxi'ij ta rib' che uq'alajisaxik ri Q'ijsaq echiri' k'o chwach ri aj q'atal tzij Poncio Pilato,#Jn. 18:37; 19:10-11 katintaq che wa': 14Cha'ana k'u chi jusuk' janipa ri katutaq ri Dios che cha' na jinta k'ana mak kariqitaj chawe echiri' kak'un tanchi lo ri Qanimajawal Jesucristo.

15Kak'un k'u ri Jesús chupa ri q'ij cha'tal chi lo ruma ri Dios.

Lik nim uq'ij ri Dios Qajawxel,

ri k'o ronoje taqanik puq'ab',

ri Taqanel pakiwi konoje ri taqanelab',

ri Kajawal ke konoje ri e aj wach.

16Xew Rire na jinta jeqeb'al re y na jinta k'isb'al re,

ma ruk'aslemal na jinta utaqexik.

Rire jeqel pa Q'ijsaq y ruma ruwonib'al na jinta junoq kaqib' ruk'.

Na jinta juna tikawex iliyom uwach y na jinta junoq kach'ijow rilik uwach.

Xew k'u che Rire lik taqalik kayak uq'ij

y xew puq'ab' Rire k'o wi ku'an taqanik na jinta utaqexik. ¡Amén!

17Chab'i'ij k'u chike konoje taq ri b'eyomab' che ruwachulew maki'an nim che kib', makub'i' kik'u'x ruk' ri kib'eyomal ma wa' xa kak'isik; e kub'ula kik'u'x ruk' ri Dios k'aslik, ri kaya'w re ronoje ri kajawax chiqe cha' kojki'kot ruk'. 18Cheb'ataqa che ki'ana ri utz cha' jela' kak'oji' kib'eyomalil chwach ri Dios. Ki'ana k'u uk'iyal chomilaj taq chak, chesipanoq y chekito'o ri na jinta k'o kuk'. 19Jek'ula' ri' e ketajin che uk'olik chila' chikaj ri b'eyomalil na kak'is taj, yey lik jikil uwach kakik'ul wa' chiqawach apanoq y kakiriq kik'aslemal na jinta utaqexik.

K'isb'al uch'a'tem ri Pablo che ri Timoteo

20Timoteo, chachajij chi utz janipa ri ya'tal paq'ab'; maya axikin che taq ch'a'tem na jinta k'o kutiqoj che rab'inik asilab'ik chwach ri Dios y maya axikin che k'utunik kab'i'x che lik kuya na'oj tob' na e ta k'u ri'. 21Ma e k'o jujun ruma kikojom taq wa', e xkiya kan ri b'e re ri Q'ijsaq.

Chik'ulu iwonoje ri'ix ri unimal rutzil uk'u'x ri Dios. Amén.

Currently Selected:

1 Timoteo 6: acrN

Highlight

Copy

Compare