1 Timoteo 5

Ru'anik ka'an pixab'anik chikiwach rutinamit ri Dios

1Echiri' ka'an pixab'anik, mayaj juna achi nimalaj winaq chik; ri cha'ana e chapixab'aj pacha' chi aqaw; yey cheb'apixab'aj ralab'o pacha' chi e awatz o e achaq' 2y rixoqib' e nimaq winaq pacha' chi e achu. Yey ruk' saqil ana'oj cheb'apixab'aj ralito pacha' chi e awanab'.

Ru'anik keto' rixoqib' e malka'nib'

3Taq rixoqib' e malka'nib', ri paqatzij wi na jinta kato'w ke, chirajawaxik wi keto' ruma rutinamit ri Dios. 4No'j we k'o juna ixoq malka'n yey e k'o ralk'o'al o e k'o taq umam, ri' e rike ri lik chirajawaxik kekichajij chi utz ri kifamilia y kekito' ri kichu malka'nib' o ri kati' malka'nib', ma wa' e pacha' rajil uk'axel chike ri xek'iyisan ke, yey wa' e lik utz y e kuk'ul uk'u'x ri Dios. 5No'j chirajawaxik k'ut e riglesia kato'w ke rixoqib' e malka'nib', ri paqatzij wi na jinta chi kifamilia y na jinta k'u junoq kato'w ke, yey wa' e taq ri lik kikub'am pan kik'u'x ruk' ri Dios y lik kiya'om kib' che u'anik orar chipaq'ij chichaq'ab'. 6No'j e juna ixoq malka'n we xew e ke'ek uk'u'x che u'anik ri karaj rire, ri' pacha' kaminaq chi chwach ri Dios tob' ne k'aslik, y na taqal ta k'u ri' che kato'ik. 7E cheb'ataqa k'u riglesia che u'anik taq wa kamb'i'ij chawe cha' chom kilitaj ri kib'inik kisilab'ik chikiwach ri jujun chik. 8Lik k'u chirajawaxik ri' che junoq keb'uto' taq ri ratz-uchaq' e k'o chux che, y más ne chirajawaxik ku'an wa' chike rufamilia.#Éx. 20:12 Ma e junoq na ku'an ta wa', ri' na taqal ta che kub'i'ij e kuk'il ri e re ri Cristo, yey más ne k'o umak ri' chikiwa ri na kikojom ta rub'i' ri Cristo, ma e ne rike kekichajij ri kifamilias.

9Chupa ri wuj pa tz'ib'ital wi taq ri b'i'aj ke rixoqib' e malka'nib' keto'ik, xew katz'ib'ax rub'i' rixoq uk'isom chi sesenta junab', we jusuk' xk'oji' ruk' ri rachijil, 10we chom ruch'a'tib'exik ka'an chwi taq ri chak u'anom, wa' e eb'uk'iyisam chi utz ri ralk'o'al, eb'uk'ulum chi utz ri hermanos keb'opon chirocho y uch'ajom ne ri kaqan,#5:10 “Uch'ajom ne ri kaqan”: Ojertan kaki'an wa' ruma rulew kok che ri kaqan pa b'e. eb'uto'om taq ri e k'o pa k'axk'ob'ik y lik k'u u'anom utzilaj taq chak.

11No'j taq ri malka'nib' k'a e k'ak'al, matz'ib'ax ri kib'i' ma k'axtaj ruma ri kirayib'al xew kakitzukuj kek'uli' tanchik y kakesaj k'u kib' chirij ri Cristo. 12Jek'ula' e kakeqelej ri q'atb'al tzij pakiwi' ruma na xki'an taj janipa ri kib'i'im kaki'ano.#5:12 “Janipa ri kib'i'im kaki'ano”: Ri malka'nib' xeto' ruma riglesia, xki'an jun tzij na kek'uli' taj y kakiya k'u kib' chupa ruchak ri Dios piglesia. 13Keb'u'an k'u e xepu'ab' y xaqi keq'e'kot chi'taq ja. Yey na xew ta keb'u'an e xepu'ab', ma keb'u'an ne e aj molot, xaqi kakimin kib' che ri na jinta ke che y e xaqi kakitzijoj ri na taqal ta chike kakib'i'ij. 14E uwari'che ri'in kamb'i'ij chike ri e malka'nib' k'a e k'ak'al, chek'uli'oq, chekik'iyisaj ri kalk'o'al y e kila' k'ut janipa ri chirajawaxik ka'an pa kocho cha' jela' ri tzel keb'ilow re ri Cristo na jinta k'o kakich'a'tib'ej chikij rutinamit Rire. 15Ma e k'o ne jujun chike wa' wa malka'nib' na kitaqem ta chi ri Cristo, ma e kitaqem ri Satanás.

16We k'o junoq ukojom rub'i' ri Cristo yey e k'o ixoqib' malka'nib' chike rufamilia, ri' chirajawaxik che cheb'uto'o' cha' na kuya ta alk'ayew che riglesia, y jek'ula' riglesia xew keb'uto' ri malka'nib' paqatzij wi na jinta kato'w ke.

Pixab'anik pakiwi ri e aj wach re riglesia

17Chike konoje ri e aj wach re riglesia, ri kik'amom uwach chi utz rutinamit ri Dios, chirajawaxik ka'an kuk' janipa ri taqal chike ruma ri chak kaki'ano; y e ne más chirajawaxik ka'an wa' kuk' ri ya'tal pakiq'ab' ketzijonik y kek'utunik. 18Ma jewa' tz'ib'ital kan chupa Rutzij Upixab' ri Dios: «Makoj b'ozal che ri b'oyex echiri' kuqil uwi ri trigo, ma taqal che katzuqik.»#Dt. 25:4 Y kub'i'ij: «E junoq kachakunik, lik taqal che katojik.»#Jer. 22:13; Lc. 10:7; 1 Co. 9:14

19Echiri' k'o junoq kutz'aq uchi' juna aj wach re riglesia; makoj ne wa' we na e jinta ka'ib'oq o oxib'oq kakijikib'a' uwach rumak. 20We k'o juna aj wach re riglesia na karaj taj karoq'otaj kan rumak, chach'a'b'ej upa chikiwach konoje cha' jela' kok xi'in ib' kuk' riglesia. 21Chwach k'u ri Dios y chwach ri Qanimajawal Jesucristo y chikiwach ri ángeles re ri Dios ri echa'talik re kakiloq'nimaj Rire, kamb'i'ij k'u chawe cha'ana taq wa' chi jusuk' kuk' konoje tob' e chinoq y na xa ta katcha'wik. 22Ma'an tan aj wach re riglesia che junoq#5:22 Pa ri ch'a'tem griego kub'i'ij: “Maya tan raq'ab' puwi junoq”. 1 Ti. 4:14 we k'amaja' awilom chi utz ri jusuk' ub'inik,#1 Ti. 3:6, 10 ma amak k'u ri' ri'at we rire ku'an ri na utz taj chupa ri chak re ri Dios. Lik chachajij k'u awib' ri'at chwach ronoje ri na utz taj.

23Ruma k'u lik kuya k'ax pamaj chawe, matij xew jorona', utz we e kach'urij k'ana vino ruk' ri jorona' katijo.

24Lik chirajawaxik kaweta'maj chi utz rub'inik usilab'ik china ri kakojo re aj wach re riglesia. Ma e k'o jujun achijab' lik q'alaj ri kimak tob' k'amaja' ne kaq'at tzij pakiwi'; pero e k'o jujun chik k'unaj kaq'alajin ri kimak. 25Jek'uri'la', e k'o ri lik kaq'alajin ri chomilaj chak kaki'ano; pero e k'o jujun chik kaki'an chomilaj taq chak, yey wa' kamayin reta'maxik. Na ruk' ta k'u ri', kopon ri q'ij kel lo chi saq.

Currently Selected:

1 Timoteo 5: acrN

Highlight

Copy

Compare