Esdras 1
1
Kḭ gə́ d’ḭ ɓee-ɓər’g Babilɔn tel ree ɓee lé
1Mee ləb ko̰ɓee gə́ dɔtar’g lə Sirus, mbai gə́ Persə lé Njesigənea̰ ar ta gə́ yeḛ pa gə ndu Jeremi lé aw lée’g béréré ya. Njesigənea̰ lé ɔs Sirus, mbai gə́ Persə lé ɓɔḭ-ɓɔḭ gə mba karee ar dee d’ila mber gə looje lai mee ɓeeko̰’g ləa ləm, gə ndaŋg taree mee maktub’g ləm tɔ pana : 2Sirus, mbai gə́ Persə pa togə́bè pana: Njesigənea̰ Ala gə́ si dara lé am ɓeeko̰je lai gə́ dɔ naŋg nee ləm, yeḛ un ndia mba kam m’unda kəi-mbai mee ɓee gə́ Jerusalem dɔ naŋg gə́ Juda’g m’aree ləm tɔ . 3See na̰ ɓa mbuna sí’g to gə́ dəw ləa wa. Maji kar Ala ləa nai səa ndá maji karee tuga loo aw Jerusalem gə́ to dɔ naŋg lə Juda lé gə mba kunda kəi lə Njesigənea̰, Ala lə Israɛlje lé ya! 4Loo gə́ rara ɓa gə́ ges ŋgan Israɛlje nai keneŋ lé maji kar dəwje gə́ lée’g neelé d’ar dee larnda gə larlɔr ləm, gə némajije ɓəd-ɓəd gə nékulje ləma, gə nékarje gə́ d’ḭ gə meḛ dee d’ar ləm tɔ, mba ra ne kəi-Ala gə́ to Jerusalem lé.
5Yen ŋga, mbai dɔ gel-bɔje lə Judaje gə Bḛjamije ləm, gə njékinjanéməsje ləma, gə Ləbije ləm tɔ lé deḛ lai gə́ Ala ɔs dee ɓɔḭ-ɓɔḭ lé ndá d’uba naŋg d’ḭ gə mba kaw Jerusalem kaw ra kəi lə Njesigənea̰ keneŋ tɔ. 6Dəwje lai gə́ d’isi gugu dɔ dee sub lé d’ar dee néje gə́ ra gə larnda gə larlɔr ləm, gə némajije ɓəd-ɓəd ləm, gə nékulje ləm, gə néje gə́ gad dee to yaa̰ ləma, gə nékarje gə́ d’ḭ gə meḛ dee d’ar ləm tɔ.
7Mbai Sirus lé teḛ gə nékulaje gə́ kédé to mee kəi’g lə Njesigənea̰ lé ar dee, to néje gə́ Nebukadnesar odo Jerusalem ləw ba aw ne aw ɔm kəi-magə’g ləa lé. 8Sirus, mbai gə́ Persə ula Mitredat gə́ to njeŋgəm nébaoje neelé gə mba karee teḛ ne gə́ raga tura gée ar Sesbasar, mbai gə́ njekaa dɔ ɓee gə́ Juda lé. 9Aa ooje, bula lə néje lé ɓa nee: bai-larlɔr rɔ-munda ləm, bai-larnda tɔl-dɔg (1.000) ləma, gə kiaje as rɔ-joo-giree-jinaikara ləm tɔ, 10ŋgo-larlɔr as rɔ-munda ləm, ŋgo-larndaje gə́ maji orè goo mareeje d’as tɔl-sɔ gə dəa dɔg (410) ləma, gə nékulaje gə́ raŋg ɓəd-ɓəd d’as tɔl-dɔg (1.000) ləm tɔ. 11Nékulaje lai gə́ deḛ ra gə larlɔr gə larnda lé d’as tɔl-dɔg-loo mi gə dəa tɔl sɔ (5.400). Sesbasar aw ne Jerusalem mee ndəa gə́ d’ḭ ne ɓee-ɓər gə́ Babilɔn tel ree’g lé.
Currently Selected:
Esdras 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.