Njé gə́ Kolosə 1
1
Lapia gə́ ra dee
1Ma Pool, njekaḭkula lə Jeju Kristi, to gə́ mee Ala ɓa wɔji lé jeḛ gə ŋgoko̰ sí Timote 2jeḛ ndaŋg maktub nee j’ar ŋgako̰ síje gə́ to majikojije gə́ to gə kəmee gə́ d’ɔm na̰’d gin Kristi gə́ d’isi Kolosə lé. Maji kar noji gə meelɔm gə́ ḭ rɔ Ala Bɔ síje lé nai sə sí ya.
3Jeḛ n’ra Ala gə́ to Bɔ Mbaidɔmbaije lə sí Jeju Kristi lé oiyo ta-ta mbata lə sí ləm, jeḛ n’ra tamaji mbata lə sí ləm tɔ 4mbata d’ula sí d’ar sí j’oo ta meekun lə sí gə́ seḭ unje arje Jeju Kristi ləm, gə sor nojikwa gə́ seḭ waje gə deḛ gə́ to gə kəmee lai ləm tɔ. 5Yee neelé seḭ raje mbata seḭ undaje meḛ sí yel dɔ né gə́ d’unda gə kəmee mbata lə sí mee ɓee gə́ dara ləm, mbata lə kankəmta gə́ to Tagə́maji gə́ d’ar kəm sí inja dɔ’g kédé lé ləm tɔ. 6Tagə́maji lé to mbuna sí’g ləm, to mbuna dəwje lai-lai gə́ dɔ naŋg neelé ləm tɔ, yee teḛkɔr aw gə́ kédé-kédé to gə́ yeḛ ra mbuna sí’g un kudee mee ndəa gə́ kəm sí inja dɔ noji’g lə Ala gə́ aw na̰’d gə kankəmta lé. 7Epapras, njeboakula lə sí gə́ j’undá dan kəm sí’g lé ndoo sí kankəmta neelé. Yeḛ lé to njenai gə́ darɔ Kristi mbuna sí’g gə́ to majikoji ləm , 8yeḛ ɔr sor nojikwa lə sí gə́ Ndilmeenda ɔs sí ɓɔḭ-ɓɔḭ dɔ’g ar sí j’oo ləm tɔ.
Pool ra tamaji mbata njé gə́ Kolosə
9Gelee nee ɓa, jeḛ kara un kudee mee ndəa gə́ taree oso mbi sí’g lé jeḛ n’lal ra tamaji ta Ala’g lé mbata lə sí el. Jeḛ n’kwɔiee mba kar sí gərje né gə́ mée ɓa wɔji lé kɔrje ne suna njal gə goo kəmkàr gə gosonégər gə́ ka̰ ndil gə́ rusu meḛ sí njḭ-njḭ lé. 10Togə́bè ɓa, seḭ a njaaje mba kar néra sí wa bua ka̰ Mbaidɔmbaije taa ne kəmee rəgm ləm, mba kar néra maji lə sí gə́ gə ria-ria oji maree gə́ kédé-kédé ləma, mba kar négər gə́ wɔji dɔ ndaa Ala kara a kɔs dɔ maree’g gə́ kédé-kédé meḛ sí’g ləm tɔ. 11Togə́bè ɓa, mbɔl dɔ boo-siŋgamoŋ ləa gə́ maji dum gə́ yeḛ ula meḛ sí’g lé seḭ a ŋgəŋje ne dɔ néje’g lai ndá seḭ a sije gə meendakaḭ, a kilaje meḛ sí po̰ kaije meḛ sí sam-sam dɔ néje gə́ lai gə́ ra sí lé tɔ. 12Bɔ síje gə́ gɔl sí mba kar sí iŋgaje nédɔji lə sí na̰’d gə deḛ gə́ to gə kəmee gə́ d’isi dan lookàr’g lé maji kar sí reaje oiyo. 13Yeḛ nja wa sí wɔgədɔ ɔr sí ji siŋgamoŋ ka̰ loondul gə́ ndul njudu-njudu ləm, yeḛ odo sí ɔm sí ɓeeko̰’g lə Ŋgonee gə́ to ŋgonkəmee lé ləm tɔ. 14Mbɔl dəa ɓa j’iŋga ne nékoga dɔ sí gə́ ɔr ta kaiya dɔ sí’g .
Kristi ur dɔ dee’g lai
15Yeḛ ɔr rɔ Ala gə́ njedumkoo lé kəmba, yeḛ nja to gə́ doŋgɔr ɓa nékundaje lə Ala lai to keneŋ ɓəi. 16Mbɔl dəa ɓa Ala unda ne boo-néje lai gə́ dara gə naŋg nee lé néje gə́ askəm koo gə néje gə́ dumkoo ləm, kalimbaije ləm, gə mo̰ɓeje ləm, gə dəw-dɔ-looje ləma, gə njéko̰ɓeeje ləm tɔ. Yeḛ nja ɓa gə́ njekunda deḛ lai gə mba kar dee to kea̰ yeḛ nja doŋgɔ doi. 17Yeḛ to gə́ doŋgɔr ɓa néje lai to keneŋ ɓəi ləm, mbɔl dəa ɓa néje lai d’wa ne na̰ ko̰-ko̰ ɓəi. 18Yeḛ to gə́ dəw dɔ Eglisə, yeḛ to doŋgɔr ləm, yeḛ to dəw gə́ doŋgɔr gə́ unda loo teḛ mbuna njé gə́ d’wəi’g ləm tɔ mba karee to gə́ doŋgɔr lə néje lai-lai . 19Mbata Ala wɔji mba kɔm səa na̰’d yəg. 20Yeḛ wɔji mba kar mbɔl dəa ɓa néje gə́ dɔ naŋg nee gə néje gə́ dara kara d’ɔm gə Ala na̰’d sad. Məsee gə́ kaar kag-dəs’g ləa ɓa yeḛ gɔl dee ne yəg ɔm dee ne na̰’d gə Ala ya . 21Seḭje gə́ kédé seḭ undaje rɔ sí ɓad rɔ Ala’g ləm, takə̰ji lə sí gə néra gə́ majel lə sí lé seḭ toje ne njéba̰je ləa ləm tɔ lé ɓasinè mbɔl dɔ kwəi gə́ ŋgonee oso vad wəi gə darəa lé ɓa yeḛ udu ne kəm ba̰ lə sí jigi, 22mba kar sí teḛje aarje nea̰’g gə́ njémeendaje ləm, mba meḛ sí ila ɓal el ləma, mba kar ta kára kara wa dɔ sí’g el ləm tɔ. 23Nɛ kar sí-seḭ naije dan meekun’g lə sí njaŋg, lal yəje rɔ sí keneŋ ləm, meekundayel gə́ wɔji dɔ Tagə́maji gə́ seḭ ooje mba̰ lé seḭ a tɔje pum kubaje kya̰je el ləm tɔ lé yee ɓa gə́ kuma̰. Tagə́maji neelé d’ila mberee d’ar nékundaje lə Ala lai gə́ d’isi gin dara’g d’oo ya ləm, ma Pool kara d’undam gə́ njekɔrgoo gée ya ləm tɔ.
Kula ra Pool gə nékəmndoo gə́ rəa lé
24Ɓasinè m’al rɔm wɔji dɔ nékəmndoo gə́ ram mbata lə sí. Néurti gə́ ra Kristi lé dɔgea̰ gə́ nai ɓa m’taa m’ɔm dɔm’g mbata lə Eglisə gə́ nai gə́ darɔ Kristi lé. 25Ma m’tel m’to kura lə Eglisə neelé gə goo kɔm gə́ Ala nja ɔm kula neelé jim’g gə mba kam m’ɔr ne ta lə Ala ndəgəsə gə́ raga m’ar sí. 26Ta neelé to loo-kiya’g ləw-ləw ba gə ginka dəwje-dəwje, nɛ ɓasinè inja kəm deḛ gə́ to gə kəmee təsərə. 27Ndərta nee gə́ to loo-kiya’g gə́ to ta gə́ maji dum gə́ Ala nja ndigi kar njépole-magəje d’oo lé ɓa nee: Kristi gə́ to meḛ sí’g lé yeḛ nja gə́ njegin rɔnduba gə́ seḭ undaje meḛ sí yel gə́ dɔ’g. 28Yeḛ nja ɓa j’ula sí ta ləa ləm, jeḛ n’tɔg ne dəwje lai ləma, jeḛ ndoo ne dəwje lai gə kəmkàree ləm tɔ gə mba kar deḛ lai tel ne maji d’ɔr njoroŋ gin Kristi’g ɓa j’aw ne sə dee no̰ Ala’g ɓəi. 29Yee ɓa, m’ra ne kula m’təd ne loo, gə goo siŋgamoŋ ləa gə́ yeḛ ula məəm’g ɔsm ne ɓɔḭ-ɓɔḭ.
Currently Selected:
Njé gə́ Kolosə 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.