Njé gə́ Pilibə 4
4
Tandəji gə́ Pool ndəji ne njéboakulaje ləa lé
1Gelee gə́ nee ɓa, ŋgakɔmje gə́ m’unda sí dan kəm’g, seḭ gə́ m’oo sí gə́ né gə́ to gə́ ŋgonkəm ləm, seḭ gə́ toje rɔlel ləm ləma, gə dɔgugu ləm ləm tɔ lé maji kar sí-seḭ gə́ m’unda sí dan kəm’g lé aarje njaŋg gin Mbaidɔmbaije’g ya.
2Ma m’ndəji Ebodi gə Sḭtisə mba kar takə̰ji lə dee aw na̰’d kára ba gin Mbaidɔmbaije’g. 3I majikoji gə́ to gə́ njeboakula ləm lé kara ma m’ra ndòo rɔi’g mba kari la gə denéje neelé dɔ né gə́ ndée ra dee, mbata loo-rɔ gə́ ma m’rɔ mba kar Tagə́maji aw ne gə́ kédé-kédé lé deḛ nja d’orəm-ma gə Klema̰ gə njéboakulaje ləm gə́ raŋg gə́ ri dee to mee maktub gə́ ka̰ sí gə kəmə lé més ya.
4Alje rɔ sí ta-ta gin Mbaidɔmbaije’g. Ma m’tel gə mba pa ya tɔɓəi, alje rɔ sí ya.
5Maji kar dəwje lai gər sí loo kaw yururu’g lə sí gao ya. Mbaidɔmbaije si aw gə́ nee dəb ŋga. 6Arje meḛ sí pélé wəs-wəs dɔ né gə́ kára kara el, nɛ né gə́ rara kara maji kar sí dəjije Ala gə tamaji lə sí ləm, gə ndòo gə́ seḭ raje ndòo rəa’g ləma, gə ta oiyo gə́ seḭ reaje ləm tɔ. 7Bèe ndá meekulɔm lə Ala gə́ dum kḛji lé a kaḭ ŋgaŋ takə̰ji gə́ meḛ sí-seḭ gə́ ɔmje na̰’d gin Jeju Kristi lé.
8Ŋgakɔmje, ges ta gə́ nai lé ɓa nee: Ta gə́ rara gə́ to gə́ kankəmta ləm, əsé riɓar gə́ maji gə́ rara ləm, əsé né gə́ rara gə́ to gə dɔ najee ləm, əsé né gə́ rara gə́ àr ŋgad-ŋgad ləm, əsé né gə́ rara gə́ taa kəm dəwje ləm, əsé né gə́ rara gə́ kəm ndigi sə dee dɔ’g ləma, əsé néje lai gə́ maji dum gə́ kəm kiŋga pidi ləm tɔ lé maji kar sí waje meḛ sí dɔ’g bururu ya. 9Né gə́ ma m’ndoo sí ləm, gə́ ma m’ar sí ləm, gə́ seḭ ooje tam’g ləma, gə́ seḭ ooje rɔm’g ləm tɔ lé maji kar sí raje née ya. Bèe ɓa Ala gə́ njeyelko meelɔm lé a nai sə sí ya.
Pool ra njé gə́ Pilibə oiyo
10Ma m’al rɔm m’ndá məəm kaḭ-kaḭ gin Mbaidɔmbaije’g mbata seḭ iŋgaje loo mba kar takə̰ji lə sí gə́ seḭ ə̰jije dɔm’g lé oji maree. Meḛ sí olé dɔm’g ya nɛ loo kar sí teḛ ne rɔm’g ɓa godo. 11Ta neelé ma m’pa mbata né gə́ m’aw ndée el mbata loo gə́ rara gə́ m’isi keneŋ ndá kəm inja am m’gər loo kisi keneŋ gə meekulɔm ya. 12Loo si dan ndòo’g m’gər gao ləm, loo si dan bao’g kara m’gər gao ləm tɔ. Loo gə́ rara kara gə́ m’isi gə mée ndan lé m’gər gao ləm, si gə mée ɓoo lé kara m’gər gao ləm tɔ. Tɔgərɔ ya, m’gər loo si dan nékiŋga’g gao ləm, m’gər loo si loo gə́ né lalm’g gao ləm tɔ. 13Mbɔl dɔ yeḛ gə́ orəm més lé lé riri kara m’askəm ra ya. 14Nɛ la gə́ seḭ laje səm dan néurti’g ləm lé yee ɓa maji ya.
15Seḭ njé gə́ Pilibə lé seḭ gərje gao, kédé gə́ dɔtar loo gə́ m’ḭ Masedoinə, m’un kudu kila mber Tagə́maji lé Eglisə lə sí ya kára ba ɓa j’ɔr na̰ kura j’ar na̰ nénoji gə́ yo gə́ nee ɓó Eglisə gə́ raŋg kára kara el#2Kɔr 11.9. 16Loo gə́ m’isi Tesalonik kara seḭ ulaje gə néje gə́ m’aw ndòo dee as gɔl joo amje#NNk 17.1. 17To nénoji ɓa ma m’saŋg rɔ sí’g el, nɛ kó noji lə sí ɓa ma m’saŋg mba karee tel taa rɔ sí pəl-pəl. 18Ma m’iŋga néje lai m’isi danee bèdèg ya. Némajije gə́ seḭ ulaje ne Epaproditə areeje am lé m’iŋga dee m’ar dee taa rɔm pəl-pəl ya. Néje neelé to asəna gə né gə́ ə̰də sululu ləm, asəna gə nékinjaməs gə́ baḭyee ə̰də lel Ala lé gə́ taa ne kəmee rəgm tɔ#Tr 29.18. 19Mbɔl dɔ boo-nébaoje gə́ nduba rɔ dee rəa’g gin Jeju Kristi’g lé Ala ləm a kar sí néje lai gə́ seḭ awje ndòo dee ya. 20Maji kula rɔnduba dɔ Ala Bɔ síjeḛ lé gə ləbee-ləbee saar-saar gə no̰. Amen!
21Raje deḛ lai gə́ to gə kəmee gə́ d’ɔm na̰’d gin Kristi lé lapia amje. Ŋgako̰ síje gə́ d’isi rɔm’g lé deḛ ra sí lapia tɔ. 22Deḛ lai gə́ to gə kəmee lé ra sí lapia tɔ, nɛ deḛ gə́ d’isi kəi lə Sesar ɓa ra sí lapia d’aree ur dɔ dee’g lai ya.
23Maji kar noji lə Mbaidɔmbaije Jeju Kristi nai gə ndil sí.
Currently Selected:
Njé gə́ Pilibə 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
