Njé gə́ Rɔmə 2

Gaŋ rəwta dɔ mari’g ila ta dɔ rɔi’g

1I dəw gə́ ban-ban kara gə́ wa rɔi gə́ njegaŋ-rəwta dɔ marije’g lé loo kari taa ne dɔi godo. Mbata loo gə́ i gaŋg rəwta dɔ dee’g lé i nja kara ila ne ta dɔ rɔi’g ya to mbata i gə́ njegaŋ-rəwta dɔ dee’g lé i nja kara to gə́ njera néje neelé to gə́ deḛ bèe tɔ#Mat 7.1, Lug 6.37. 2Tɔgərɔ ya jeḛ n’gər gao ta gə́ Ala a gaŋg dɔ deḛ gə́ njéra néje gə́ togə́bè lé a to gə goo kankəmta ya. 3I dəw gə́ njegaŋ-rəwta dɔ deḛ gə́ njéra néje gə́ togə́bè nɛ i nja kara ra née to lé see i ə̰ji məəi’g pana: Ta gə́ Ala a gə gaŋg dɔ dee’g lé see a lali wa. 4See bao-noji lə Ala ləm, gə meekila ləa ləma, gə meekai sam-sam ləa ləm tɔ lé i ə̰ji bəḭ-bəḭ wa. See meemaji lə Ala gə́ ɔsi ɓɔḭ-ɓɔḭ gə mba kari wa ndòo rɔi dɔ kaiya’g ləi lé see i gər el wa. 5Dɔkədərə ləi gə meendər dɔ kaiya’g ləi yee ɓa ar Ala turu ne oŋg ləa mée’g saar ndɔ kinja gin oŋg lé gə́ Ala a gaŋg ne ta dɔi’g gə goo rəbee. 6Mee ndəa’g neelé Ala a kuga nana kara gə goo kula rəa-rəa ya#Pak 62.13, GtK 24.12. 7Deḛ gə́ d’ai meḛ dee sam-sam dɔ néra deeje gə́ maji’g saŋg ne riɓar gə rɔnduba gə dɔkaisəgərə lé dee nja yeḛ a kar dee d’isi gə kəmə gə́ gə no̰ ya. 8Nɛ deḛ gə́ maḭta gə́ gə mḭdé ba d’ɔs ne ta gə́ tɔgərɔ rəw ləm, tel rɔ dee goo né gə́ dɔ najee el ləm tɔ lé oŋg gə meeko̰ a koso dɔ dee’g. 9Némeeko̰ gə néurti a kwa dɔ dəw gə́ rara ɓa gə́ njera némajel lé, a kwa dɔ Jibje kédé ɓa a kwa dɔ Grekje ɓəi. 10Deḛ gə́ ra némaji lé d’a si dan rɔnduba’g gə dan riɓar’g gə dan meekulɔm’g ləm tɔ, Jibje kédé ɓa Grekje ɓəi! 11Mbata no̰ Ala’g lé d’a kɔr kəm dəw kára kara keneŋ el#TtG 10.17.

12Deḛ lai gə́ ra kaiya nɛ deḛ lal koo godndu Moyis ndá d’a kudu lal godndu ya ləm, deḛ lai gə́ ra kaiya gin godndu’g lé ndá godndu lé ɓa a gaŋg rəwta dɔ dee’g ləm tɔ. 13Tɔgərɔ ya, deḛ gə́ d’oo ta godndu gə mbi dee lé ɓa to njémeekarabasurje no̰ Ala’g el, nɛ deḛ gə́ ra née ɓa Ala ɔr ne ta dɔ dee’g. 14Loo gə́ njépole-magəje gə́ lal koo godndu Moyis lé d’ḭ gə meḛ dee ra né gə́ godndu wɔji ndá deḛ gə́ godndu lal dee ɓəi lé d’ar sí j’oo to gə́ godndu to meḛ dee’g ya. 15Néra dee tɔji sí to gə́ néra gə́ godndu wɔji lé to meḛ dee’g ya. Ta gə́ meḛ dee’g ɓa ɔr gée ləm, takə̰jije gə́ meḛ dee’g lé ila ta dɔ dee’g əsé ɔr ta dɔ dee’g ləm tɔ. 16Yee ɓa a to raga pai-pai loo gə́ Ala nja a kar Jeju Kristi gaŋg rəwta dɔ dəwje dɔ néra goo ŋgəḭ’g lə dee mee ndəa gə́ yeḛ wɔji gə goo Tagə́maji gə́ m’ula sí lé.

Jibje gə́ Godndu Moyis’g

17I gə́ ɓar rɔi Jib, i nduna rɔi kaar Godndu’g ləm, i ti rɔi dɔ Ala’g ləm tɔ, 18i gər torndia ləm, godndu lé tɔji ari gər loo kɔr kəm néje ɓəd-ɓəd ləm tɔ. 19I gə́ ti rɔi pana: I to gə́ njekɔrno̰ njékəmtɔje ləm, gə lookàr lə deḛ lai gə́ d’isi loondul’g ləm, 20gə njetɔji mbə-dəwje kəmkàr ləma, gə njendoo ŋganje ləm tɔ. Mbata godndu lé ari sí ne gə darɔ gosonégər gə kankəmta. 21I gə́ njendoo marije ŋga, see i a ndoo rɔi el wa. I gə́ ila mber ɓogo pana: Maji kar dəw ɓogo el ndá i tel ɓogo. 22I gə́ pana: Maji kar dəw ndal mɔdkaiya el ndá i tel ndal mɔdkaiya. I gə́ oo magə népoleje gə́ né gə́ to kḛji kəmi’g ndá i tel uru keneŋ mbidi. 23I gə́ ti rɔi dɔ godndu’g lé ŋga, see ban ɓa i al dɔ godndu ɔr ne riɓar dɔ Ala’g ɓəi wa. 24Mbata deḛ ndaŋg taree mee maktub gə́ to gə kəmee pana: Ndɔl ɓar ri Ala mbuna njépole-magəje’g mbata lə sí-seḭ ya#Esa 52.5.

25Ɓó lé i unda godndu dan kəmi’g ndá kinja tamɔd ləi to gə́ né ya, nɛ ɓó lé i al ta ta godndu’g ndá kinja tamɔd ləi lé to né gə́ gə mḭdé ba ya tɔ. 26Bèe ndá ɓó lé dəw gə́ to gə́ njekḭja tamɔd el lé taa godndu lé ra née ndá see d’a kée gə́ njekḭja tamɔd el wa. 27I gə́ sí gə maktub gə́ ɔr gin godndu ɓa i inja tamɔdi nɛ i al ta ta godndu’g lé see dəw gə́ njekḭja tamɔdee el gə́ taa ta godndu ra née ɔm ne mée dɔ’g jəb-jəb lé see yeḛ a kɔr ta kwai ne el wa. 28Dəw gə́ to Jib gə́ raga puduru ba ɓó to Jib gə́ kojikəi el. Kinja tamɔd lé to yee gə́ darɔ’g ka̰ kar dee d’oo gə kəm dee bèe el tɔ. 29Jib gə́ kojikəi ɓa gə́ Jib gə́ gəd ya. Kinja tamɔd gə́ kojikəi ɓa gə́ kinja tamɔd gə́ gəd ya tɔ. To né gə́ wɔji dɔ meḛ dəw ɓó wɔji dɔ darəa gə́ raga puduru el. Riɓar lə Jib neelé ḭ rɔ Ala’g ɓó ḭ rɔ dəwje’g el#TtG 30.6.

Currently Selected:

Njé gə́ Rɔmə 2: SBA2015

Highlight

Copy