Loo gə́ killa rea kəm Ja̰’g 6

Ŋgonbad tɔr nérḛdə ta maktub misa̰

1M’aa loo gərərə m’oo Ŋgonbad ɔr nérḛdə ta maktub gə́ kára, nékundaje lə Ala gə́ sɔ lé m’oo ndu gar dee gə́ kára mbuna dee’g pata gə ndia gə́ boi wəl asəna gə ndi gə́ ndaŋg pana: Maji kari gə́ ree! 2M’aa loo gərərə ndá m’oo kunda-dɔmal ḭ keneŋ. Njekubá si gə ɓandaŋg jia’g. D’ula dɔgugu dəa’g ndá yeḛ teḛ ɔd aw gə́ loo-rɔ’g mba dum dɔ loo#Jkr 1.8, 6.3,6.

3Loo gə́ Ŋgonbad lé ɔr nérḛdə gə́ njekɔm’g joo lé ndá m’oo ndu nékunda lə Ala gə́ njekɔm’g joo lé pana: Maji kari gə́ ree. 4Ndá kunda-ndai teḛ raga. Njekubá lé d’un ndu dee d’aree gə mba karee ar meelɔm gə́ dɔ naŋg neelé udu bo̰ ləm, gə mba kar koso-dəwje gaŋg gwɔs na̰ ləm tɔ. D’aree kiambas gə́ boi pəmə tɔ#Jkr 1.8, 6.2.

5Loo gə́ Ŋgonbad lé ɔr nérḛdə gə́ njekɔm’g munda ndá m’oo ndu nékunda lə Ala gə́ njekɔm’g munda lé pana: Maji kari gə́ ree. M’aa loo gərərə ndá m’oo kunda-nduli. Njekubá lé nékwɔji kwɔi lə néje to jia’g#Jkr 6.2,6. 6Ma m’oo ndu ɓar mbuna nékundaje lə Ala gə́ sɔ lé pana: Ko-wa mee ŋgo kára, lar gə́ nda kára ləm, kó-ɔrj mee ŋgo munda ya lar gə́ nda kára ləm tɔ, nɛ ubu gə mán-nduú lé d’ɔrɔ yèree el lé godo. 7Ŋgonbad lé ɔr nérḛdə ta maktub gə́ njekɔm’g sɔ lé ndá m’oo ndu nékunda lə Ala gə́ njekɔm’g sɔ lé pana: Maji kari gə́ ree. 8M’aa loo gərərə ndá m’oo kunda-mwɔji ḭ keneŋ. Njekubá lé ria lə yoo tɔɓəi ɓee lə njé gə́ d’wəi lé aw səa na̰’d. D’un ndu dee d’ar dee gə mba tɔl dəwje gə́ dɔ naŋg nee gə́ dəb kára nɛ debee nai munda, mba tuji ne dəwje gə kiambas ləm, gə ɓoo-boo ləm, gə rɔko̰ ləma, gə da-ŋgaŋkasje gə́ dɔ naŋg nee ləm tɔ#Ejk 14.21.

9Loo gə́ Ŋgonbad lé ɔr nérḛdə ta maktub gə́ njekɔm’g mi lé ndá ma m’oo kankəmrɔ dəwje gə́ tɔl dee mbata lə Ala ləm, gə mbata ginta gə́ deḛ d’ɔr d’ar dəwje d’oo ləm tɔ d’isi ne ta loo-nékinjaməs’g. 10Deḛ no̰ gə ndu dee gə́ boi wəl pana: Mbai, i gə́ njemeenda gə njekankəmta lé see ban ɓa i bə rɔi lal gaŋg rəwta lé ɓəi wa. See ban ɓa i dal ba̰ məs sí gə́ ɔm dɔ dəwje gə́ dɔ naŋg nee el ɓəi wa. 11D’ar dee kubu gə́ nda gə́ ŋgal yududu-yududu kára-kára lai ndá yeḛ ula dee mba kar dee d’isi d’wa rɔ dee waga saar kar dɔkal deeje gə́ nai d’a ree kiŋga dee ɓəi, yee ɓa wɔji dɔ njéboakulaje lə dee ləm, gə ŋgako̰ deeje gə́ d’a kɔs yoo kwəi to gə́ deḛ bèe ləm tɔ.

12M’aa loo gərərə ndá loo gə́ Ŋgonbad lé ɔr nérḛdə ta maktub gə́ njekɔm’g misa̰. Naŋg yə ɓugu-ɓugu ləm, kàr tel ndul asəna gə wul-kunda gə́ d’ṵji gə́ ɓɔl ləma, naḭ gə kuburee kara tel məs ləm tɔ#LkJ 11.13, 16.18, Esa 13.10, Joɛ 2.10, 3.4, 4.15, Mat 24.29, Mar 13.24-25, Lug 21.25. 13Kéréméje toso naŋg asəna gə kodé gə́ lel-boo ɓiree widi-widi ar bəsəree gəḭ naŋg bèe səm. 14Dara kə́ dɔ na̰’d mber-mber to gə́ maktub gə́ kə́ na̰’d mber-mber bèe tɔɓəi mbalje gə dɔgoré-looje lé dee ŋgəs d’ya̰ loo-to dee gə́ kédé#Esa 34.4#LkJ 16.20. 15Mbaije gə́ dɔ naŋg nee ləm, gə dəwje gə́ boo ləm, gə ɓé-njérɔje ləm, gə baoje ləm, gə njésiŋgamoŋje ləm, gə ɓərje lai ləma, gə ŋgankojije bura ləm tɔ lé deḛ dəb rɔ dee bolè mbalje’g gə mbuna mbalje’g#Esa 2.19,21. 16Deḛ ra ndòo rɔ mbalje’g gə pil mbalje’g pana: Juraje, juraje dɔ sí’g, mba kar kəm yeḛ gə́ si kalimbai’g lé oo sí el ləm, mba kar oŋg gə́ ḭ gə Ŋgonbad lé wa dɔ sí el ləm tɔ#Oje 10.8, Lug 23.30. 17Mbata boo-oŋg lé kàree teḛ mba̰ ndá see na̰ ɓa askəm kaar dɔ gɔlee’g njaŋg wa#Joɛ 2.11, Mal 3.2.

Currently Selected:

Loo gə́ killa rea kəm Ja̰’g 6: SBA2015

Highlight

Copy

Compare