Loo gə́ killa rea kəm Ja̰’g 19

1Gée gə́ gogo m’oo ndu boo-dəwje gə́ bula digi-digi gə́ ɓar dara pana: Aleluia! Kaji, ləm gə rɔnduba ləma, gə siŋgamoŋ ləm tɔ lé to ka̰ Ala lə sí ya, 2mbata rəwta-gaŋg ləa to gəd ləm, to gə dɔ najee ləm tɔ. Yeḛ gaŋg rəwta ila dɔ kaiya-dené gə́ njemina̰ naŋg nee gə mɔdkaiya ləa, yeḛ dal ba̰ məs kuraje ləa gə darɔ məsee-yeḛ nja#TtG 32.43, 2Mb 9.7. 3Deḛ pa gə́ gɔl joo ɓəi pana: Aleluia! Ndá sa pər ləa tuu gə ləbee-ləbee saar gə no̰#Esa 34.10. 4Ŋgatɔgje rɔ-joo-gir-dee-sɔ gə nékundaje lə Ala gə́ d’aw kəmba sɔ lé d’ula dɔ dee naŋg d’wa Ala gə́ si kalimbai’g lé meḛ dee’g, deḛ pana: Amen! Aleluia!

5Ndu dəw ɓar gə́ par gə́ rɔ kalimbai’g lé pana: Ɔsje gaji Ala lə sí, seḭ kuraje ləa lai ləm, seḭ gə́ ɓəleeje gə́ toje dəwje gə́ gɔ-gɔ gə dəwje gə́ boo lé ya ləm tɔ#Pak 115.13. 6Tɔɓəi ma m’oo ndu ɓar asəna gə ndu boo-dəwje gə́ bula digi-digi gə́ ɓar asəna gə mán gə́ ula u-u-u bèe ləm, asəna gə ndi gə́ ndaŋg paḭ-paḭ bèe ləm tɔ pana: Aleluia! Mbata Mbaidɔmbaije Ala lə sí gə́ to Bao-siŋgamoŋ lé yeḛ nja o̰ ɓee mba̰#Pak 93.1, 97.1, 99.1. 7Ar sí n’raje rɔlel, ar sí j’alje ne rɔ sí ləma, ar sí j’ulaje rɔnduba dəa’g ləm tɔ, mbata ndɔ ra naḭ taa dené lə Ŋgonbad lé kàree teḛ mba̰ ndá dené ləa wa dɔ gɔl rəa mbata ndɔ-naḭ lé mba̰ tɔ. 8D’un ndu dee gə mba karee ula kubu gə́ d’ṵji gə kúla palégal gə́ ndɔḭ ləd-ləd ləm, gə́ ndá kələw-kələw ləm tɔ lé rəa’g. Mbata kubu gə́ d’ṵji gə kúla palégal lé yee ɓa wɔji dɔ néra gə́ gə dɔ najee lə dee gə́ to gə kəmee.

9Kura gə́ dara lé ulam pana: Ndaŋ maktub ula dee ne pana: Deḛ gə́ d’a ɓar dee loo naḭ taa na̰’g lə Ŋgonbad lé rɔ dee a lel dee. Yeḛ ulam tɔɓəi pana: Ta neelé to gə́ kankəmta lə Ala ya#Mat 22.2-3. 10Yen ŋga, m’oso naŋg rəb gel gɔlee’g mba kwá məəm’g ndá yeḛ ulam pana: Ǝw rɔi! Ma m’to njeboakula ləi gə njeboakula lə ŋgakɔḭje gə́ d’ɔr goo ta lə Jeju lé. Ala nja ɓa maji kari wá məəi’g. Mbata goo ta lə Jeju to kankəmta gə́ ḭ rɔ Ala’g nja.

Ta tel ree lə Kristi lé

11Tɔɓəi ma m’oo kəm dara teḛ ndá aa ooje, kunda-dɔmal teḛ keneŋ. Yeḛ gə́ njekubá lé ria lə Ŋgonkoji ləm, gə Kankəmta ləm tɔ ndá rəwta gə́ yeḛ gaŋg ləm, gə rɔ gə́ yeḛ rɔ ləm tɔ lé to gə dɔ najee ya#Pak 96.13, Esa 11.4. 12Kəmee ndɔḭ asəna gə ndo̰ pər bèe ləm, dɔguguje bula to dəa’g ləm tɔ. Ri kára gə́ d’unda dəa’g lé dəw kára kara gər el, nɛ yeḛ nja ɓa gər#LkD 10.6. 13Kubu gə́ məs wa keneŋ mbəgə-mbəgə lé yeḛ ula rəa’g. Ria gə́ deḛ ɓaree ne lé lə Ta lə Ala. 14Njéboo-rɔje gə́ dara lé d’al kunda-ndulije ndolè ne gée ləm, kubu gə́ d’ṵji gə kúla palégal gə́ ndá kələw-kələw gə àr ŋgad-ŋgad lé to rɔ dee’g ləm tɔ. 15Kiambas gə́ adə làm-làm teḛ təa’g mba kunda ne ginkoji dəwje gə raŋg. Yeḛ a ko̰ dee gə kag-larndul ləm, yeḛ a mbula kandə nduú, yee ɓa to gə́ boo-oŋg lə Ala gə́ Bao-siŋgamoŋ ləm tɔ#Pak 2.9, Esa 63.3, Joɛ 4.13, LkJ 14.20. 16Ri dəw ɓa ndaŋg kubu’g ləa ləm, gə biŋgee’g ləm tɔ pana: Mbai gə́ ur dɔ mbai mareeje’g ləm, gə Mbaidɔmbaije ya ləm tɔ.

17Ma m’oo kura gə́ dara gə́ aar dan kàr’g. Yeḛ pata gə ndia gə́ boi wəl ula ne yelje lai gə́ d’aw pə̰ dara’g lé pana: Gə́ reeje mbo̰je dɔ na̰ ɓó gə raje naḭ lə Ala gə́ boi#Ejk 39.17-20, 18ɓó gə mba sɔ dakasrɔ mbaije ləm, gə dakasrɔ ɓé-njérɔje gə́ dɔ naŋg nee ləm, gə dakasrɔ njésiŋgamoŋje ləm, gə dakasrɔ kundaje gə njékuba deeje ləm, gə dakasrɔ dəwje lai gə́ to gə ŋgankojije gə ɓərje ləma, gə dakasrɔ dəwje gə́ gɔ-gɔ gə njé gə́ boo-boo lé ləm tɔ.

19Ma m’oo da gə mbaije gə́ dɔ naŋg nee gə njérɔje lə dee tɔ. Deḛ mbo̰ dɔ na̰ gə mba rɔ gə yeḛ gə́ si gir kunda’g lé gə njérɔje ləa tɔ. 20Deḛ d’wa da lé gə njéteggintaje gə́ ŋgɔm lé na̰’d, deḛ gə́ ra nékɔbje nea̰’g su ne kəm dəwje gə́ deḛ tɔs nétorji lə da lé ŋgo no̰ dee’g ləm, deḛ pole ne néndajirea lé ləm tɔ. Deḛ joo bɔr lé d’ɔm dee dan pər gə́ tad rəg-rəg gə́ o̰ bilim-bilim gə́ kṵjee teḛ kas njir-njir#LkJ 13.1-18. 21Nɛ dɔkal deḛ gə́ nai lé kiambas gə́ teḛ ta yeḛ gə́ sí gir kunda lé tɔl dee. Yelje lai ree d’usɔ dakasrɔ dee d’ar meḛ dee ndan tub-tub tɔ.

Currently Selected:

Loo gə́ killa rea kəm Ja̰’g 19: SBA2015

Highlight

Copy

Compare