Pakɔsje 38
38
Tamaji lə njerɔko̰ gə́ kəmee inja dɔ majelje’g ləa
1Pa lə Dabid gə́ ɔs mba kar mee Ala olé ne dəa’g
2Njesigənea̰, maji kari tɔjim kəmkàr
Loo gə́ oŋg ḭ səi el ləm,
Ar bo̰ néram ɔs tam’g
Loo gə́ məəi ḭ səi jugugu el ləm tɔ.
3Mbata ɓandaŋgje ləi d’wam ləm,
Jii kara wɔi dɔm’g ndiŋ-ndiŋ ləm tɔ.
4Loo gə́ məəi oḭ ndá
Darɔm si gə́ majee gə́ tḛ́-tḛ́ bèe el ləm,
Kaiya ramje ɓa ar siŋgarɔmje yɔr ne yɔg-yɔg ləm tɔ.
5Mbata néra kori-korije ləm d’ḭ tur dɔm pubug
Asəna gə nékodo gə́ wɔi gə́ wɔim al dɔm sula bèe.
6Néra mbə ləm lé
Ar ta dooje ləm ndum oso yii ə̰də mbo̰.
7M’rugu m’wa koŋgoŋ ar ta yoom nai ne tebdé bèe,
Ta-ta ma m’njaa ne dan kəmndoo’g.
8Dunm nuŋga ne kəd-kəd ləm,
Darɔm si gə́ majee gə́ tḛ́-tḛ́ bèe el ləm tɔ.
9Siŋgam godo am m’iri njigi-njigi,
Meem gə́ pélé wəs-wəs lé am m’tuma̰ ne ŋgururu-ŋgururu tɔ.
10Mbaidɔmbaije, néje lai gə́ m’ndiŋga lé
To raga pai-pai kəmi’g ləm,
Tuma̰ gə́ m’tuma̰ ŋgururu-ŋgururu lé
Iya rəa kəmi’g el ləm tɔ.
11Kaarm ɓar ɗigi-ɗigi ləm,
Siŋgam teḛ wuduru rɔm’g ləma,
Kəm kara ndul kɔl-kɔl ləm tɔ.
12Baokuraje ləm gə deḛ gə́ gərm kara
D’unda rɔ dee ɓad rɔm’g mbata lə doo ləm,
Njé’g ləm gə́ pər ya kara
D’aar ŋgərəŋ səm ləm tɔ.
13Deḛ gə́ ndigi tujim lé
D’iya gumje lə dee nɔm’g ləm,
Deḛ gə́ saŋg loo kula kəm ndòo lé
Pa ta meeyèrje lə dee ləma,
Ta sukəmlooje ɓa deḛ la̰ji toree meḛ dee’g ta-ta ləm tɔ.
14Nɛ ma lé m’to asəna gə njembikudu ɓó m’oo ta el ləm,
M’to asəna gə njegwɔskudu gə́ teḛ təa pa ne ta el ləm tɔ.
15Ma lé m’to asəna gə dəw gə́ oo ta el
Ndá yeḛ oo loo kila maree ta’g el tɔ.
16Njesigənea̰, i nja ɓa m’unda məəm yel dɔi’g ya,
Mbaidɔmbaije, Ala ləm, i a tel kilam keneŋ tɔ.
17Mbata ma m’pana:
Maji kari un ndui ar dee d’al rɔ dee d’wɔji ne dɔm el ləm,
Maji kari ar dee d’ḭ d’oma̰ səm
Loo gə́ gɔlm unda ndolè lé el ləm tɔ.
18Ma lé nai lam ba karm m’oso ya,
Meeko̰ ləm kara to nɔm’g ta-ta tɔ.
19Mbata ma m’gər néra kori-korije ləm gao,
Kaiya ram lé am m’isi ne dan ɓəl’g.
20Njéba̰je ləm lé d’aw njam-njam ləm,
Siŋga dee to kɔgərɔ-kɔgərɔ ləm tɔ,
Deḛ gə́ d’ḛjim bəḭ-bəḭ lal né gə́ bèe lé kara
Bula digi-digi tɔ.
21Deḛ ra səm majel godə maji gə́ m’ra sə dee’g ləm,
Deḛ to njékoma̰ səmje mbata m’saŋg néra gə́ maji ləm tɔ.
22Njesigənea̰, maji kari ubam ya̰’m el ləm,
Ala ləm, maji kari unda rɔi ɓad rɔm’g el ləm tɔ.
23Mbaidɔmbaije, i gə́ to njekajim lé
Maji kari ɔs rɔi ɓad gə́ ree la səm ya.
Currently Selected:
Pakɔsje 38: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
