Pakɔsje 27
27
Mbɔr Ala m’isi lɔm keneŋ
1Pakɔs lə Dabid
Njesigənea̰ lé to lookàr ləm ləm, gə kaji ləm ləm tɔ,
Ŋga see na̰ ɓa m’a ɓəlee tɔɓəi wa.
Njesigənea̰ lé to gə́ négəd rɔ dɔ’g ləm,
Ŋga see na̰ ɓa m’a ndəb pəd-pəd nea̰’g wa.
2Loo gə́ njémeeyèrje ree pər gə́ rɔm’g
Gə mba tim mbidi-mbidi sɔ
Deḛ gə́ to njékula kəm ndooje ləm gə njéba̰je ləm ləm tɔ lé
D’unda ndolè rəm d’oso ne.
3Ɓó lé njérɔje d’aḭ dɔm sub gə mba rɔ səm ndá
Meem a ɓəl né kára kara el,
Ɓó lé rɔ ḭ gə mba tujim kara
M’a si gə meekulɔm ya.
4Ma m’dəji Njesigənea̰ né kára gə́ ma m’ndiŋga lé
Ma m’ndəb ndəbee gə mba kiŋga:
Ma m’ndigi si kəi lə Njesigənea̰ saar gə nɔm ya
Gə mba korè ne kəm ndəŋ dɔ boo-ronduba’g lə Njesigənea̰ ləm,
Gə mba kar kəm wəi ne sḭ dɔ kəi-siée’g ləm tɔ.
5Mbata ndɔ gə́ nékəmndoo teḛ lé
Yeḛ a kaa dɔm mee kəi’g ləa ləm,
Yeḛ a kiyam pḛ́ mee kəi-kubu’g ləa ləm tɔ,
Yeḛ a kunm kundam dɔ biri mbal gə́ tar ndoi.
6Ɓasinè m’unda dɔm tar no̰ njéba̰je’g ləm gə́ d’aḭ dɔm sub,
M’a kinja nékinjanéməsje mee kəi-kubu’g ləa
Loo gə́ ndu to̰to̰ aw ɓar ləm,
M’a kɔs pa kila ne riɓar dɔ Njesigənea̰’g ləm tɔ.
7Njesigənea̰, maji kari lel mbii oo ne ndum gə́ m’ɓar ne rii lé
Maji kari oo kəm lootondoo’g ya kɔgərɔ kari ndá ilam keneŋ!
8M’ə̰ji goo ta gə́ i pa pana:
Maji kar sí n’saŋgje loo koo kəmi lé ndá
Ǝi Njesigənea̰, m’saŋg loo koo kəmi ya to!
9Maji kari iya səm kəmi el ləm,
Maji kari ɔs ŋgonjelookisi ləi gə oŋg ŋgərəŋ el ləm tɔ.
I nja ɓa to njela səm
Bèe ndá maji kari ya̰’m el ləm,
Ubam ya̰’m el ləm tɔ,
I Ala gə́ njekajim.
10Ɓó lé bɔmje gə kɔmje d’ubam d’ya̰’m ndá
Njesigənea̰ a kwam gə́ rəa’g.
11Njesigənea̰, maji kari tɔjim rəw ləi,
Maji kari ɔr nɔm dan kila rəw gə́ danasur’g
Mbata njéba̰je ləm d’isi gən.
12Maji kari ilam ji njéba̰je’g ləm
Gə mba kar dee ra səm né gə́ meḛ dee ndigi lé el,
Mbata njékɔrgoota gə́ ŋgɔmje d’ḭ səm,
Deḛ to dəwje gə́ d’əmə kəmə néra gə́ kərm-kərm ɓa dɔm’g.
13Wai, ma m’gər gao,
M’a koo meemaji lə Njesigənea̰ dɔ naŋg’d lə njésikəmbaje lé.
Ɓó lé m’gər bèe el ndá
See m’a ra ban wa.
14Maji kari ar məəi to yel gə́ dɔ Njesigənea̰’g!
Maji kari wa diŋgam məəi’g ɓó gə wa məəi kɔgərɔ!
Maji kari ar məəi to yel gə́ dɔ Njesigənea̰’g ya.
Currently Selected:
Pakɔsje 27: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
