Pakɔsje 25
25
Maji kari am m’gər loo ra torndui
1Pakɔs lə Dabid
Njesigənea̰ i nja ɓa m’tel kəm gə́ rɔi’g ya!
2Ala ləm, i nja ɓa m’ɔm məəm dɔi’g
Ndá maji kar rɔkul ḭ dəb dɔm’g el!
Maji kar njéba̰je ləm d’un baŋga dɔm’g el to!
3Deḛ lai gə́ d’unda meḛ dee yel dɔi’g lé
Rɔ dee a kul el,
Deḛ gə́ d’un dɔ mar deeje gə́ sḭ lé
Deḛ nja rɔkul a dəb dɔ dee’g.
4Njesigənea̰, maji kari am m’gər rəwje ləi ləm,
Tɔjim kila rəwje ləi ya ləm tɔ.
5Maji kari ɔr nɔm dan kankəmta’g ləi, gə́ ndoom ne né,
Mbata i nja to Ala gə́ njekajim,
M’unda məəm yel dɔi’g ta-ta ya.
6Njesigənea̰, ar məəi olé dɔ meekɔrjol’g ləi ləm, gə dɔ meemaji’g ləi ləm tɔ,
Mbata deḛ to saar gə no̰.
7Néramje gə́ to gə goo rəbee el loo gə́ m’nai ne basa ɓəi lé
Esé néra kori-korije ləm kara
Ar məəi olé teḛ dɔ’g el.
Ǝi Njesigənea̰, ar məəi olé teḛ dɔm’g gə goo meekɔrjol ləi ləm,
Gə goo meemaji ləi ləm tɔ.
8Njesigənea̰ lé to njemeemaji gə njera nédanasur,
Gelee gə́ nee ɓa yeḛ tɔji ne njékaiyaje rəw lé.
9Deḛ gə́ d’ula dɔ dee lé
Yeḛ ɔr no̰ dee dan rəw gə́ danasur’g ləm,
Deḛ gə́ d’ula dɔ dee lé
Yeḛ ndoo dee rəw ləa ləm tɔ.
10Deḛ gə́ d’aa dɔ ndu manrɔ lə Njesigənea̰, gə torndia lé ndá
Kila rəwje lə Njesigənea̰ lai to meekɔrjol gə kankəmta mbata lə dee.
11Ǝi Njesigənea̰, mbɔl dɔ rii lé ɓa
I ar məəi ti ne mbidi dɔ néra kori-kori’g ləm,
Mbata to né gə́ boo ya.
12See dəw gə́ ra ɓa ɓəl Njesigənea̰ wa.
Njesigənea̰ a tɔjee rəw gə́ kəm karee njaa keneŋ.
13Dəw neelé a kwa rəa dan maji’g ləm,
Ŋgakeaje kara d’a kiŋga ɓee lé gə́ né ka̰ dee ləm tɔ.
14Takə̰ji lə Njesigənea̰ gə́ to loo-kiya’g lé
To mbata deḛ gə́ ɓəlee,
Mba kar dee gər ne ta manrɔ ləa lé.
15Ma m’tel kəm par gə́ rɔ Njesigənea̰’g ya ta-ta,
Mbata yeḛ nja a kɔr gɔlm wul ba̰də’g kilam tar.
16Maji kari ila kəmi dɔm’g
Ɓó gə oo ne kəm lootondoo’g ya kari,
Mbata ma lé d’ubam d’ya̰’m
D’am m’isi ne gə́ njenékəmndoo ya.
17Néurtije gə́ d’ar ɓəŋgərəm ti dus lé
D’ḭ dɔ maree’d gə́ kédé-kédé ndá,
Maji kari ɔrm dan néɓəŋgərətije’g ləm ya kari.
18Maji kari oo kəmtondoo ləm ləm, gə ndookoo ləm ləm tɔ
Ndá ar məəi ti mbidi dɔ kaiya ramje’g lai.
19Maji kari oo to gə́ njéba̰je ləm bula yaa̰ ləm,
Oo meekɔs ŋgwɔḭ lə deḛ gə́ d’ḛjim bəḭ-bəḭ lé ləm tɔ.
20Maji kari tɔs kəmi dɔm’g
Ɓó gə ajim ne!
Loo gə́ m’saŋg njo̰loo-kula-dɔ ləm rɔi’g ndá
Am m’nai gə rɔkul el.
21Maji kar néra gə́ gə dɔ najee ləm, gə néra gə́ danasur ləm tɔ lé
D’aḭ bada dɔm’g
Mbata ma m’unda məəm yel dɔi’g ya.
22Ǝi Ala, maji kari ɔr Israɛlje
Dan néurtije’g lə deḛ lai ya!
Currently Selected:
Pakɔsje 25: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
