Pakɔsje 21
21
Mbai gə́ askəm kɔm mée dɔ Njesigənea̰’g
1Pa lə Dabid gə́ ar bao-pa mba karee ɔs sə dee lé.
2Njesigənea̰, mbai lé al rəa mbata lə siŋgamoŋ’g ləi.
Wai! La gə́ i la səa lé ar boo-rɔkal ləa al ne dɔ loo sula ya.
3Né gə́ yeḛ ndiŋga lé i nja aree ləm,
Né gə́ təa teḛ dəjii lé kara i ɔgee el ləm tɔ.
4Mbata i wa dɔ gɔl nojimeendaje tɔr ne ndui dəa’g ləm,
I ula dɔgugu larlɔr gə́ àr ŋgad-ŋgad dəa’g ya ləm tɔ.
5Yeḛ dəjii kəmə mba si kəmba ndá
I aree ya ləm,
I aree si kəmba saar-saar gə no̰ ya ləm tɔ.
6La gə́ i la səa lé ar rɔnduba ləa to ne yaa̰,
I dolè gə riɓar gə boo-ronduba tɔ.
7I aree to né tɔr ndu dɔ’g saar gə no̰ ləm,
I dəaa gə rɔlel gə́ al dɔ loo sula nɔḭ’g ləm tɔ.
8Mbai lé ɔm mée dɔ Njesigənea̰’g jəb-jəb,
Mbɔl dɔ meemaji lə Njekurdɔloo’g lé
Gɔlee unda ne ndolè nda̰ el.
9Njéba̰je ləi lé i a kwa dee gə jii peb,
Jikɔli kara a kiŋga deḛ lai gə́ d’ḛjii bəḭ-bəḭ tɔ.
10I a kar dee tel to gə́ loo-kula-bṵda gə́ nuŋga kəd-kəd
Mee ndəa gə́ i a teḛ kəm dee’g wai.
Njesigənea̰ a kar dee d’udu guduru dan oŋg’d ləa ndá
Pər a roo dee dula-dula.
11I a kar ginkadɔg deeje sané pá dɔ naŋg nee ləm,
Ginkoji dee kara a kudu bo̰ mbuna dəwje’g ləm tɔ.
12Deḛ lé d’wɔji-kwɔji ra səi majel,
Deḛ d’ə̰ji néje gə́ majel meḛ dee’g gə mba ra to
Nɛ siŋga dee a godo.
13Mbata i a kar dee tel gir dee d’aḭ ləm,
I a rɔ dee gə ɓandaŋg ləi ləm tɔ.
14Njesigənea̰, maji kari ḭta tɔji dee boo-siŋgamoŋ ləi!
Jeḛ ndigi kɔs pa kila ne riɓar dɔ siŋgamoŋ’g ləi ya.
Currently Selected:
Pakɔsje 21: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
