Pakɔsje 19
19
Néro̰dubaje lə Njesigənea̰ gə́ maji dum
1Pa lə Dabid gə́ ar bao-pa mba karee ɔs sə dee lé
2Dara lé tɔji rɔnduba lə Ala ləm,
Loo-kil-lə-ndi kara riba dɔ kula gə́ jia ɓa ra ləm tɔ.
3Ndɔ gə́ ɓogənè pa taree ar ndɔ gə́ bèlè ləm,
Loondul gə́ ɓogənè ɔr gée ar loondul gə́ bèlè gər ləm tɔ.
4Taree neelé to gə́ takɔji dəwje əsé to tapa dee ɓa
Ndia a lal koso mbi dee’g el.
5Ta lə dee ɔr gwɔi naŋg nee njal ya,
Ndu dee ɓar ɔr rudu naŋg nee rɔd ya tɔ.
Lée neelé ɓa yeḛ la kəi-kubu keneŋ mbata lə kàr#Rɔm 10.18.
6Kàr lé to tana gə njedené-sigi gə́ ḭ mee kəi-tée’g
Uru loo-kabee’g gə meendakaḭ asəna gə bao-rɔ bèe.
7Yee ḭ gwɔi naŋg gə́ bər
Aw njal teḛ rudee gə́ dɔ-gó,
Kɔs gə́ yee ɔs kəd-kəd lé né kára kara askəm ko̰ kəmee el.
8Godndu Njesigənea̰ lé to maji dum,
Yee ɓa ar dəw aji ne,
Ndukunje lə Njesigənea̰ to kankəmta
Gə́ kəm kɔm mee dɔ’g,
D’ar njegərnéel lé tel to njekəmkàr.
9Ndukunje lə Njesigənea̰ lé
To gə goo rəbee sur,
D’ar dəwje d’al ne rɔ dee,
Godnduje lə Njesigənea̰ lé
To ta gə́ àr raŋg-raŋg,
D’ar kəm dəw lé inja ne bərəŋ tɔ.
10Ɓəl Njesigənea̰ lé
To né gə́ àr raŋg-raŋg ləm, to né gə́ to gə no̰ ləm tɔ,
Rəwta-gaŋg lə Njesigənea̰ lé
To tɔgərɔ ləm, to gə dɔ najee ləm tɔ.
11To né gə́ to ŋgonkəm ur dɔ larlɔr ləm, ur dɔ larlɔr gə́ àr ŋgad-ŋgad ləm tɔ.
To né gə́ rii gə́ ur dɔ ka̰ ubu tə̰ji gə́ ruba mee mbanee’g.
12Kura ləi taa ta ndoo keneŋ,
Nana ɓa gə́ ra née ndá a kiŋga ne née tɔ.
13See na̰ ɓa gər loo ndəm ləa wa.
Néje gə́ m’ra lal gər ginee lé
Maji kari ar məəi ti mbidi dɔ’g.
14Maji kari ɔs njébeeleje rəw rɔ ŋgonjelookisi’g ləi ləm,
Gə mba kar dee dum dɔm el ləm tɔ,
Bèe ɓa m’a to ne njemeenda ndá
Kaiya gə́ boo a ɓar rim el.
15Ta gə́ teḛ tam’g ləm,
Gə ta gə́ m’ə̰ji məəm’g ləm tɔ lé
Maji kari taa gə məəi rəgm,
I Njesigənea̰ gə́ to gə́ kɔr mbal ləm gə njetaa dɔm lé.
Currently Selected:
Pakɔsje 19: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
