Gosota-Kəmkàrje 5
5
Məəi dɔ rɔi’g mbata lə kaiya-dené lé
1Ŋgonəm, tuga mbii oo ne ta kəmkàr ləm ləm,
Ur mbii gèŋ oo ne ta gosonégər ləm ləm tɔ
2Gə mba kari aa ne dɔ ta
Gə́ i la̰ji toree məəi’g ləm,
Mba kar tai ŋgəm ne négər ləm tɔ.
3Mbata kaiya-dené lé təa lel
To gə́ ubu tə̰ji bèe ləm,
Ta gə́ təa’g lé kara kul yururu unda ubu ləm tɔ,
4Nɛ rudee ndá adə mbag-mbag to gə́ táa bèe ləm,
Adə làm-làm to gə́ kiambas gə́ ŋgaŋgee joo bèe ləm tɔ.
5Gɔlee aḭ par gə́ loo-yoo’g ləm,
Rəw-kabee aw njal teḛ ɓee lə njé gə́ d’wəi’g ləm tɔ.
6Rəw gə́ ka̰ si kəmba lé
Yeḛ gɔl aree ɔr njal el ləm
Yeḛ ila mbir-mbir rəw-kabeeje’g
Ɓó yeḛ oo loo gə́ aw gə́ keneŋ lé el tɔ.
7Ɓasinè lé ŋganəmje, ooje ta ləm,
Tɔɓəi ɔsje taje gə́ teḛ tam’g lé rəw el tɔ.
8Rəw-kabee lé ɔs rɔi ŋgərəŋ keneŋ ləm,
Tibi mbɔr tarəwkəi ləa lé el ləm tɔ.
9Nà banelə i a sané siŋgai dɔ njé gə́ raŋg’d ləm,
A kya̰ ləbi kar dəw gə́ njera né gə́ bɔsɔsɔ ləm tɔ.
10Nà banelə némajije ləi lé
Njé gə́ raŋg d’a kuba majee ləm,
D’a kuba maji kandə nékula ləi
Mee kəi lə dəw gə́ raŋg ləm tɔ,
11Nà banelə i a tuma̰ ŋgururu-ŋgururu
Rudu ndɔje’g ləi
Loo gə́ dakasi gə rɔi bura d’a gə tuji lé,
12Ndá i a pa pana:
See to gə́ ban ɓa ma m’ə̰ji ta
Gə́ deḛ gɔlm ne lé bəḭ-bəḭ ləm
Meem mbad ta gə́ deḛ pa səm lé ləm,
13Ma m’oo ta lə ɓémje-je el ləma,
Ma m’ur mbiim gə́ rɔ njéndoom néje’g el ləm tɔ wa.
14Nai lam bèe mba kam m’uru dan némajel’d
Gə́ tur dɔm pubug mbuna koso-dəwje’g ləm,
Gə mbuna deḛ gə́ mbo̰ dɔ na̰’g ləm tɔ.
Unda dené ləi dan kəmi’g
15Maji kari ai mán gə́ to mee jo’g ləi,
Man gə́ to mee bwa-mán’g ləi ya.
16Ŋgira manje ləi lé
See kəm kar mán teḛ keneŋ
Ula loo gə́ raga’g wa.
Kəm-rəw-manje ləi lé
See kəm kar dee d’ula ruba ndag-looje’g wa.
17Maji kar dee to d’wɔji dɔi-i nja gə kari ba
Ɓó a kar dəwje gə́ raŋg d’orè səi na̰ dɔ’g el.
18Maji kar dɔ ŋgira ma̰n ləi ai səgərə,
Tɔɓəi maji kari ra rɔlel gə dené
Gə́ i təa gə kasi ba,
19Yeḛ gə́ to asəna gə ma̰də arkas
Gə́ i ndigee yaa̰ ləm,
Gə ma̰də ndooi gə́ taa kəmi rəgm ləm tɔ lé,
Maji kar rɔi leli ta-ta dɔ ndigi gə́ i ndigee’g ləm,
Ar malee rai ŋgwɔd-ŋgwɔd gə́ kédé-kédé ləm tɔ.
20Ŋgonəm, see ban ɓa i ar mal kaiya-dené
Rai ŋgwɔd-ŋgwɔd wa.
Ar mal to gə dené gə́ raŋg
Rai togə́bè ləm tɔ wa.
21Mbata rəw-kaw dəw lé
To raga ndəgəsə kəm Njesigənea̰’g ləm,
Yeḛ ée loo kila-rəwje’g ləa lai ləm tɔ.
22Njemeeyèr lé
Néra kori-korije ləa-yeḛ nja wá ləm,
Kula kaiyaje ləa ɓa təa jo̰dɔrɔ ləm tɔ.
23Yeḛ a kwəi lal taa tandoo ləm,
Yeḛ a kunda ndolé
Mbata néra mbə ləa gə́ al dɔ loo sula ləm tɔ.
Ngambai Bible © Alliance Biblique du Tchad 1989, 2015.