Gosota-Kəmkàrje 28
28
1Njemeeyèr mbudu ŋgwɔd aḭ al kar dəw kore gée ləm,
Njemeekarabasur ndá mée kaḭ to gə́ kura toboḭ bèe ləm tɔ#Ləb 26.36, TtG 28.28, Esa 57.21.
2Loo gə́ ta to ɓee’g ndá mbaije bula digi-digi,
Nɛ mbɔl dɔ njegosonégər gə gər gin né lé ləb ɓeeko̰ ləa
Ḭ ne dɔ maree’d gə́ kédé-kédé.
3Dəw gə́ lal né gə́ buguru njéndooje lé
To asəna gə ndi gə́ ər gə lel gə́ ar nésɔ lal dəwje.
4Deḛ gə́ d’uba godndu d’ya̰ lé
Pidi njemeeyèr gə́ pidi,
Nɛ deḛ gə́ d’aa dɔ godndu kər-kər lé
D’ar meḛ dee o̰ dee dəa’g.
5Dəwje gə́ d’ula rɔ dee mbiriri dan majel’g lé
Gər gin né gə́ gə dɔ najee el,
Nɛ deḛ gə́ saŋg Njesigənea̰ ɓa gər gin néje lai.
6Njendoo gə́ njaa gə goo rəbee lé
Maji unda yeḛ gə́ to bao gə́ rəw-kabeeje nduni koŋ-koŋ.
7Yeḛ gə́ aa dɔ godndu kər-kər lé to ŋgon gə́ njegosonégər,
Nɛ yeḛ gə́ ɔr kura gə njembula nésɔje lé ila rɔkul dɔ bɔbeeje’g.
8Yeḛ gə́ wɔji lar dɔ maree’g ləm,
Taa manee dɔ’g ləm tɔ
Gə mba kar némajije ləa-yeḛ ḭ dɔ maree’d gə́ kédé-kédé lé
Mbo̰ dee mbata lə yeḛ gə́ a koo kəmtondoo lə njéndooje.
9Ɓó lé dəw kára un mbia rəw dɔ godndu’g ndá
Tamaji ləa kara to né gə́ mina̰ tɔ.
10Yeḛ gə́ ar dəwje gə́ njéra nédanasurje ndəm dan rəw gə́ majel’g lé
Oso mee bwa gə́ yeḛ nja uru’g,
Nɛ dəwje gə́ ra né gə goo rəbee lé
D’iŋga meemaji gə́ nénduba lə dee.
11Dəw gə́ to bao lé oo rəa-yeḛ nja gə́ njekəmkàr,
Nɛ njendoo gə́ to njegosonégər lé ə̰də gelee.
12Loo gə́ njémeekarabasurje d’un baŋga ndá
To rɔnduba gə́ boo,
Loo gə́ njémeeyèrje d’unda dɔ dee tar ndá
Nana kara iya rəa gə́ kiya.
13Dəw gə́ iya dɔ nékaltaje ləa lé a teḛkɔr el,
Nɛ yeḛ gə́ tegginee gə́ raga ləm uba ya̰ ləm tɔ ndá
Iŋga meekoso lemsé.
14Rɔlel nai gə dəw gə́ si gə ɓəl mée’g,
Nɛ yeḛ gə́ ar mée kədərə ndá a koso dan némajel’g.
15Njemeeyèr gə́ o̰ ɓee dɔ dəwje’d gə́ to njéndooje lé
To asəna gə toboḭ gə́ inja miḭ ləm, gə da-urs gə́ ɓó tɔlee bèe ləm tɔ.
16Njeko̰ɓee gə́ gosonégər lalee lé
Néra buguru ləa ḭ dɔ maree’d gə́ kédé-kédé,
Nɛ yeḛ gə́ to njeba̰ lə mal nékiŋga gə́ gə goo rəbee el lé
Ar ndɔje ləa ḭ dɔ maree’d gə́ kédé-kédé.
17Dəw gə́ ta məs maree wa dəa lé aḭ njal teḛ bwa-yoo’g,
Maji kar dəw ɔgee el.
18Yeḛ gə́ njaa gə goo rəbee lé a kaji ne,
Nɛ yeḛ gə́ un rəwje joo gə́ nduni lé a koso yeḛ gə́ kára’g.
19Yeḛ gə́ ndɔ-ndɔ ləa lé nésɔ asee nag-nag,
Nɛ yeḛ gə́ aiŋgwɔd goo néje gə́ mḭdé ba ndá
Ndoo ɓa asee nag-nag tɔ.
20Dəw gə́ to ŋgonkoji lé iŋga ndutɔr si danee’g bèdèg,
Nɛ yeḛ gə́ ndəb ndəb tel bao lé a lal kar ta wa dəa el.
21Kɔr kəm dəwje lé to sur el,
Dəw lé ya̰ rəa yag dan kaiya’g gə mbata goŋ muru ba ya.
22Dəw gə́ njekəmkəḭ lé ndəb ndəb tel bao,
Nɛ ndòo gə́ a gə teḛ dəa’g lé yeḛ gər el.
23Yeḛ gə́ ndaŋg mareeje lé iŋga majee gogo
Ur dɔ yeḛ gə́ ndəa̰ pata gə́ rii.
24Dəw gə́ ɓogo bɔbeeje gə kea̰je ɓa pana: To kaiya el lé
To njeboalookaw lə njetujiloo.
25Njebeelé ɔs gel takɔlje,
Nɛ yeḛ gə́ ɔm mée dɔ Njesigənea̰’g lé
Né asee nag-nag.
26Yeḛ gə́ ɔm mée jəb-jəb dɔ rəa-yeḛ’g lé to mbə-dəw,
Nɛ yeḛ gə́ njaa gə kəmkàr a kaji ne.
27Yeḛ gə́ ar njéndooje né lé ɓó a ɓar ria el,
Nɛ yeḛ gə́ lib kəmee jib-jib lé ndɔl ɓa wa dəa.
28Loo gə́ njémeeyèrje d’unda dɔ dee tar ndá
Nana kara iya rəa gə kiya,
Loo gə́ deḛ tuji ndá
Njémeekarabasurje d’ḭ dɔ maree’d gə́ kédé-kédé.
Ngambai Bible © Alliance Biblique du Tchad 1989, 2015.