Gosota-Kəmkàrje 20
20
1Man-nduú gə́ mḭ to njekula sul dɔ loo’g ləm,
Nékaije gə́ mḭ ar njekaiee ra ne né tar ɓəgəgə-ɓəgəgə ləm tɔ,
Nana ɓa gə́ ra ɓəree ndá kəmkàr lalee.
2Meekḭ pu lə mbai lé to asəna gə ndu kinja miḭ lə toboḭ bèe,
Yeḛ gə́ ar mee mbai ḭ pu dəa’g lé ila tuji dɔ rəa-yeḛ’g ya#GTK 16.14, 19.12.
3Kar dəw ɔg rəa dɔ takɔlje’g lé to rɔnduba ləa,
Nɛ mbə-dəw gə́ rara kara ula rəa keneŋ mbiriri ya.
4Njedab ndɔ-ndɔ ɓara el mbata kul gə́ o̰ lé
Naḭ kinja kó lé yeḛ ndiŋga rəa gə mba kinja ya nɛ
Yeḛ iŋga né kára kara el.
5Néje gə́ dəw wɔji mée’g gə mba ra lé
To d’asena gə mán gə́ uru yaa̰,
Nɛ dəw gə́ njegosonégər ɓa gər loo to mán neelé#GTK 18.4.
6Dəwje bula d’ila mber néra maji lə dee-deḛ ya,
Nɛ dəw gə́ to gə́ ŋgonkoji lé see na̰ ɓa askəm kiŋgá wa.
7Njemeekarabasur lé njaa gə goo rəbee,
Rɔlel nai gə ŋganeeje gə́ gée’d gogo.
8Mbai gə́ si dɔ kalimbai gaŋg rəwta’g lé ndá
Kəmee gə́ aa ne loo lé ɓa ɔs ne néraje gə́ majel lai rəw.
9See na̰ ɓa a kaskəm pana:
Ma m’ar məəm àr ŋgad-ŋgad
Ɓó kaiya kára kara godo məəm’g, a pa bèe wa#1Mb 8.46, Jɔb 14.4, Pak 51.9, NKMB 7.20, 1Ja̰ 1.8.
10Kwɔi lə néje ɓəd-ɓəd gə́ joo ləm,
Gə némbudu-néje ɓəd-ɓəd gə́ joo ləm tɔ lé
Deḛ joo bɔr to néje gə́ mina̰ kəm Njesigənea̰’g.
11Ŋgon lé ɓó lé panjaa ləa a to gə goo rəbee ləm, gə àr ŋgad-ŋgad ləm tɔ ndá
Yeḛ ari gəree gə goo néreaje mba̰.
12Mbi gə́ oo ta gə kəm gə́ oo loo lé
Njesigənea̰ ɓa gə́ njera dee joo bɔr.
13Maji kari ndigi ɓi el nà i a tel to njendoo,
Teḛ kəmi ndá muru a kasi nag.
14Njendogo né pana: Majel! Majel!
Tɔɓəi loo gə́ yeḛ ɔd aw ndá yeḛ pidi rəa dɔ’g.
15Larlɔr to keneŋ ləm, mərkwɔji to keneŋ ya ləm tɔ
Nɛ tapa bao-gosonégər lé to né gə́ gadee to yaa̰.
16Maji kari taa kubu ləa jia’g
Mbata yeḛ ɔs né naŋg gə ri dəw gə́ yeḛ gəree el,
Maji kari wá kɔgərɔ-kɔgərɔ taa nékɔs naŋg jia’g
Mbata lə dəwje gə́ raŋg tɔ.
17Muru tər-kəm-loo lé lel ta dəw’g jula-jula
Nɛ gée gə́ gogo ndá yeḛ a to̰ naŋg keneŋ.
18Néje gə́ dəw wɔji-kwɔji ra lé aw lée’g béréré gə goo takwɔji-kəmkàr,
Maji kari wa dɔ gɔl rɔ jəb ɓa rɔ ɓəi.
19Yeḛ gə́ təd ta unda ta maree’g lé
Riba dɔ taje gə́ to loo kiya’g,
Maji kari wa kura gə njetaɓar el.
20Ɓó lé dəw ila ndɔl dɔ bɔbeeje’g əsé dɔ kea̰je’g ndá
Pərndɔ ləa a kwəi misi dan loondul gə́ ndul njudu-njudu’g.
21Nénduba gə́ ḭ kalaŋ taa lé
D’a tɔr ndu dee dɔ’g ndɔ gə́ raŋg’d el.
22Maji kari pana:
M’a ra səa majel godə maree’g bèe el,
Unda məəi yel dɔ Njesigənea̰’g ndá
Yeḛ nja a kilai tar ɓəi.
23Kwɔi lə néje gə́ ɓəd-ɓəd gə́ joo lé
Njesigənea̰ oo dee gə́ né gə́ mina̰ ləm,
Nékwɔji-né gə́ ŋgɔm lé to né gə́ majel ləm tɔ.
24Dəw lé Njesigənea̰ ɓa to njekwɔji rəw gə́ yeḛ aw gə́ keneŋ,
Dəw lé see askəm gər rəw-kabee gə dɔrea to gə́ ban wa.
25Kḭ kalaŋ kun ndu gə́ mḭdé dɔ né gə́ to gə kəmee’g lé
To gum kwa njeaje ləm,
Manrɔ ɓad ɓa tel kḛji gée ɓəi lé kara to togə́bè ya ləm tɔ.
26Mbai gə́ to njekəmkàr lé
Sané njémeeyèrje kad-kad
Ar gɔl pusuje nduburu dɔ dee’g.
27Kəmə lə dəw lé to pərndɔ gə́ Njesigənea̰ ɓa aree
Mba karee ndogó mée’g kəi kɔrɔg.
28Meemaji gə ŋgonkoji ɓa d’aa dɔ mbai kər-kər ləm,
Yeḛ kara gəd kalimbai ləa gə meemaji ləm tɔ.
29Siŋgamoŋ lé to nérɔnduba lə basaje ləm,
Yiŋga dɔ gə́ pudu ndá kələw-kələw lé to nékura lə ɓugaje ləm tɔ.
30Kunda njemeeyèr karee doo ɓa togo majel gə́ rəa’g ləm,
Kundá karee oso rəa’g pal kara to togə́bè ləm tɔ.
Ngambai Bible © Alliance Biblique du Tchad 1989, 2015.